بالصدفه ببص فمرايا
مقلتش حد جوايا
غير بس صورتك
انا كنت حالفه مشوفش وشي
من اول ما سيبتك
و ياريتني بجد ماشوفته
الميت حيي جوايا
و كأني زورتك
مش قادره اوقف
و لا اقول كفايه
بتدور بسرعه ف عقلي سيرتك
كله بينعاد من البدايه
و ياريتني ما مشيت مسيرتك
و لا قرب كان
و لا بعد كان
و ياريت ماكان قلبي و مشورتك
انا ليه مش عارفه انساك
ده كأنك عايش في مكانك
و كأنك موشوم علي قلبي
و من الصعب اشيلك
محتاجه لنار حاميه عشانك
تكويك منه و تفك اسيرك
انا ليه لما اتنفس عادي
اشم عبيرك
و كأنك لسه قصادي
و شايفه تعابيرك
انا ليه تفكيري رايحلك دايما
و سايب غيرك
كل ده جه فبالي
و انا شيفاك فمرايتي قبالي
و عقلي بيحكيلك
فثواني اترصت افكاري
و اتحاصرت حواليا
اتفقوا يهدوا اسواري
و اتكاتروا عليا
و بقا نفسي اجيلك
و برغم اخطائك و بلاويك
و برغم قليلك
قلبي المخبول لسه شاريك
و بيتمني
ربنا ياخد من نبضه و يديلك
محي كل غيابك و عيوبك
و افتكر انه ف يوم كنت دليله
و كان هو دليلك❤
