تمارا

13

بعد مرور يومين..

طبعا الفاضل حققو معاهو وبقو منتظرين امر المحكمة..

حاول يورط عمر معاهو وقال ليهم انو البنقو د بتاع عمر..

لكين الشرطي قفلها ليه في راسو لمن وراهو انو عملو لي عمر فحص دم وطلع نضيف..

سِت حنان جاتو..

وقرر يستخدم اخر ورقة رابحة عندو..

ف قعد يتمسكن..

وراها انو عمر ياهو البلغ عنو..

وانو اتقبض بي سبب عمر..

في الدار..

صوت الكف صدح في كل الإتجاهات..

تمارا وباقي البنات ختو يدينهم في خشمهم بخلعة وهم بعاينو لي عمر الواقف قدام سِت حنان ببرود..

سِت حنان كوركت ببحة:بي سببك اخوك اتحبس وم معروف ح يطلع منها ولا لأ

عمر وهو ضاغط على اسنانو:د م اخوي

سِت حنان لزتو:اسكتت..يخي انت شنو م عندك قلب؟!..طيب م فكرتا فيني؟! في شفع الدار؟! بشتنتنا وبهدلتنا في انصاص الليالي

عمر بس بعاين ليها..

سِت حنان:انا بالله كنتا ح اروح خمسة دقايق واتحبس بي سببك

عمر ساكت..

هو الطلعها..

بي سبب وصيتو لي محمد انو م تجيها عوجة..

لو م كد كان ح يجرجروها لي يوم الليلة..

قال:م بي سببي بي سبب البشربو وخاليهو معانا في الدار

سِت حنان:يخي ما يشربوو انت مالك ومالو؟؟..انت ابوهو؟!

عمر:وهسي انتي مالك ومالي؟!..انتي امي؟!

سِت حنان ختت يدينها في راسها:انت مستحيل تكون بني ادم..انت جنيت ي عمر

عاين ليها مسااافة وهو ضاغط سنونو بي غضب..

عاين لي تمارا الواقفة في عتبة المطبخ وخاتة يدينها في خشمها ودموعها 10 10..

اتحرك ماشي..

سِت حنان جرتو:طالع وين نص الليل د؟!

فكا يدو منها من غير ما يتلفت عليها اصلا..

سِت حنان اتلفتت على تمارا وقعدت في الكرسي بتعب..

تمارا دخلت المطبخ وهي بتمسح في دموعها..

عُناب جات اتكلمت معاها شوية تمارا ابت ترد ليها..

مشت خلتها..

عمر..

ماشي في الشارع ومدخل يدينو جوة جيوبو..

حاسي بي ضيق..

وحدة..

خُذلان..

وحاجات كتيرة كعبة غيرهم..