عاهرة القيصر

الجزء 3

سمعت دقان بالجهد تخلعت شحال من سيناريو طاح فبالي قبل مانوصل لباب غير حليت وتدفع لباب حتي تزديت مع لحيط كانو لبوليس تصدمت منين شفتهم دخلو قلبو دار كاملة رونوها سفاها علي علاها كيسولو علي هشام قبل مانهضر حيت تسرطات ليا لهضرة ماعرفت مانقول وقف ليا لفكر بديت غير كنشوف طلعو كيجيرو لسطاح انا تبعتهم كنجري كان هشام وجاد وواحد لبزناز كيستفو فواحد صاك ديال لحشيش ماعرفتش اش كانو غيديرو بيه هشام شاف لبوليس وهو يهرب من سطاح لسطاح جاد ماكانش عندو كيفاش يهرب هو وهداك لاخر شدوهم متلبسين شي واحد لي بركك بيهم داكشي لي كان خصني ماقدو فيلة زادوه فيل هشام تبعوه جوج وجوج لخرين شدو جاد وداك لاخر وهبطوهم انا هبطت كنجري نقولها لعزيزة لقيتها خارجة ببينوارها غير قلتها ليها هبطات كتجري لزنقة وتغوت للاسف هشام ماقدرش يهرب منهم شدوه فأخر لحظة عزيزة طاحت سخفات ومامات جاد حتي هي كتغوت وتنتف فشعرها انا غير كنتفرج تصدمت ماعرفت ماندير بقيت غير متكية علي لحيط و درب عمر بالبوليس سطافيط لبركاكة دراري عيالات كلشي تجمع دغيا بغاو غير فاش يتفرجو ويشدو نميمة وكترت لهراج شي كيفيق عزيزة شي كيسكت سعدية ملي مشات سطافيط وهي دور ليا سعدية كتسب وتعاير وتلوم كتقول ليا وجه نحس وديك لهضرة ديال لكيلو ولله ماهضرت معاها ولا شفت فيها لي فيا مكفيني بصح نيت راني وجه نحس ورجليه شديت راسي وطلعت عزيزة سدينا باب دار هي غير كتبكي وتنحط وضرب ففخاضها طيحات عليا ضيم ماعرفت ماندير شديت لارض حتي انا وبقيت نخمم ونبكي غير كنحلها من هنا وتعواج من هنا لله يستر وصافي
☆دوزنا دوك الايام بحال لعزا عندنا فدار انا نضت لخدمتي داكشي لي بقا خاصني كمل ليا عزيزة بعدا عندها عائلتها ميسورين شوية هازينها بالمصروف هي وولدها ادم جات كاع مها سكنات معانا انا ماكنتقابلش معاها نهار كولو كانكون خدامة كنجي باليل ونعس باشما نتصادعش معاها
مها من داك نوع لي مهووس بالشعودة وسحور ضل تبخر وتبات تبخر وكيما قلت ليكم لمصايب كيتجمعو فمرة مول لمخبزة فاش كنت خدامة قال ليك بغا يسد حيت كترو عليه لمصاريف لمخبزة ومكدخلش ليه مزيان ماعندو ربح فيها وديك لهضرة لخاوية اوي هاني رجعت لحياة لبطالة عاوتاني بنادم بلا نيفو بلا قرايا والو الي ماعندك لباك لفوق بحال الأمي ماتصلاح لحتي حاجة جاد وهشام وداك لبزناز حكمو عليهم ب3سنين لواحد... انا تهديت ومليت من لمشاكل وصداع كندعي لله تكون اخر المشاكل هيا هادي كيجيني راسي دايرة بحال داك لعمى نوض من حفرة نطيح فوحدة غرق منها مهم كنقول لحمدلله علي كل حال دوك الايام لي كنت ملاهيا مع هاد لمشاكيل ماتت مامات واهيبة حتي هي بقات فيا واهيبة حسيت بيها بقا ليها غير دم طيحو من عينيها صعيب تفقد شي حد عزيز وقريب لقلبك مها هي لي بقات ليها فهاد دنيا مشات عندلله من بعد ملي تخطات هاد الازمة غبرات شحال مابقات بانت انا رجعت لمشاكيل ديالي مع عزيزة ومها صحابهم انا خدامة عند باهم كل وحدة تبقا تأمر فيا صبني عجني خملي طيبي انا صابرة غير حتي نلقا شي خدمة ونقلب علي زبل مابغيتش نوض معاهم صداع حيت عرفت دار بسمية عزيزة غدا ولا بعدو دور فيا وتجري عليا كل مرة تعايرني بيها دار داري ولي ماعجبو لحال لباب يفوت جمل وانا كندير راسي حمارة ماكنفهمش حيت بصح ماعندي فين نعطي راس حتي واهيبة مابقيت لقيت ليها طريق تقول الارض سرطاتها قلت للهم نصبر لذل عزيزة ومها ولا نخرج لزناقي يلعب بيا لي يسوا ولي مايسواش زمان خايب شي عطاتو وشي زواتو لحمدلله عطاني ربي صبر اما كون نتاحرت شحال هدا ولا نتراكب شي جريمة ندخل لحبس ونتهني واحد نهار كنت كنشر لحوايج فسطاح كنسمع عزيزة كتهضر مع شي حد وتقول ليه ماكيناش هبطت بالزربا نشوف شكون ساع مالقيت حتي حد
انا:عزيزة شكون سول عليا
عزيزة:شكون
انا:انا لي كنسولك شكون جات عند وقلتي ليها ماكيناش
عزيزة:ديك صاحبتك واهيبة
انا:وعلاش قلتي ليها ماكيناش
عزيزة:اوي نكدب علاه انتي كاينة راه هي سولاتني واش كاينة فدار ماشي واش كاينة فالسطاح
انا:علاش كاديري هكا اعزيزة علاش قلتي ليها ماكيناش اشنو فيها الي جات عندي صاحبتي واش حتي هي حرام تجي تشوفني
عزيزة:ماعجباتنيش شغلي هداك داري هادي وانا حرة فيها ندخل لي بغيت ونخرج لي بغيت
صارحة كتاب ليها عمر جديد تحكمت فاعصابي غير بزز اما كنت غادي ندير فيها شرع يدي دخلت ودوزت داك نهار باشما بغا لله حاولت مانتلاقاش معاها قبل مانفقد اعصابي لغد ليه فالصباح لبست عبايتي وجمعت شعري وهزيت ادم وخرجت نجيب لحليب ولخبز تلاقيت مع سعدية(مامات جاد)وبدات عليا بشي هضور خاوية كنت غنجفف بيها داك لحانوت كون ماداك لبرهوش لي هازا نعلت شيطان وتميت غادية حتي وقفات عليا واحد لبنت جارتنا سولاتني علي لحال والاحوال
هي:سلمات عليك لبارح واهيبة قالت ليا شحال من مرة كتجي عندك ماكتلقاكش
انا:اه اجي واش عارفاها فين كاينة
هي:عندي نمرتها عطاتها ليا بلاتي نتسخر ونجيبها ليك
مشيت لدار وجدت لفطور وحطيتو ليهم حتي سمعت دقان مشيت حليت لقيتها بنت جارتنا عطاتني نمرة خرجت مشيت تيليبوتك حيت ماعنديش تيليفون بحال ناس عادي حاجة من بزاف لي ماعنديش مهم ماعلينا مشيت كنصوني عليها ماكتجاوبش حتي عيت رجعت لدار هكاك نهار كاملو كنصوني ماكتجاوبش حتال لعشية قلت غانجرب اخر مرة جاوبات هو هداك ماجاوباتش غاتكون عطاتها نمرة غلط صونيت لمرة للولة تانية وهو يحاوبني راجل كنت غانقطع والكن تشجعت
انا:الو واش نمرة ديال واهيبة هادي
هو:وي ديالها
انا:واخا دوزها ليا عفاك
هو:ماكيناش دابا مهم منين تجي شكون نقول ليها
انا:اه واخا قول ليها سهيلة صاحبتها عفاك ماتنساش قول ليها راه بغيتها دوز عندي ضروري
هو:واخا بسلامة طيط طيط طيط
ولد لحرام قطع عليا فوجهي مي ماعليش مني طلعات نمرتها مرة خرا نصوني ليها واخا بقيت كنتسأل شكون هداك واش كيدير عندو تيليفونها وافكار كيطيحو عليا واش راجلها واش صاحبها خاطيبها خدامة معاه مهم ماعطانيش لله راحة غير كنفكر... رجعت لدار عزيزة ومها مالقيتهمش كانو خارجين مشاو لشي عراضة سبوع ولا عرس مهم دار شحال زوينة ولكالم منين ماكاينينش نضت درت عشاية تعشيت تفرجت شوية ونعست ماجاو حتال 6ديال صباح انا شبعت نعاس هوما نهار كاملو ناعسين حتي داك لبرهوش انا لي قابلتو مو ناعسة مامسوقاش واخا يبكي ماتديها فيه هزيتو وبدلت ليه واخا هكاك عزيز عليا دريويش وانا كنحماق علي دراري صغار كنموت عليهم دوزت نهار فسكات وراحة بردو ليا ودنيا من صداعهم تفو وجدت لكاسكروط عاد فاقو بعجاجتهم جمعت ديك روينة وغسلت لماعن ودابزت هو للول مع عزيزة كتقلب علي صداع انا كنعيا نصبر ليها وهي غير زايدة فيه وخرجت نشم شوية دالهوا تقرهنا بريحت لبخور وصداع دزت عند هاديك لبنت لي عطاتني نمرت واهيبة جلست انا وياها فالعتبة عطاتني تيليفونها نصوني علي واهيبة اخيرا جاوبات قالت ليا تشوفني دابا حدا دروج لي فشارع لي ورانا حدا جردة كيجلسو تما ناس حتي انا كنت نجلس تما مرة مرة مشيت انا وديك لبنت مجمعين تما حتي وقفات حدانا واحد طوموبيل غزالة فالكحل كتعمي بالشعا هبطات منها واحد لبنت انا وديك لمعايا شادين نميمة الله يسمح لينا واخا مابانش لينا وجهها حيت هبطات وبقات كتهضر مع داك لي سايق من زاج شحال عاد ديمارا وهي جات قاصدانا انا غير شفتها قربات تصدمت حليت فمي علي قدو واش واهيبة هادي ولا كنخايل ناري ناري كتبان بحال دوك عارضات الازياء فنة
انا:هاي هاي هاي علي واهيبة اش هاد زين كولو
عنقاتني وبدات كتضحك انا كنشوف فيها وكنشم مخلطة بالروايح وشعر مصايب ولبس واعر ولحم بيض ونقي وضفار طوال فليتها مزيان كلشي قلبتو جلسات حدانا
واهيبة:واخا علي مك الكلبة فين غابرة ديما كنجي عندك ماكنلقاك غير ديك صفريطة ديال مرت خوك لي كنلقا
البنت:مهم نخليكم بسلامة البنات دابا تقلب عليا مي ماتلقاني وتحيح
مشات وخلاتني انا وواهيبة
انا:اربي سكتي عمرني ماخرجت ديما دار راه غير ديك سوسة لفعة بلعاني كتقول ليك ماكيناش
واهيبة:بنت لحرام وانا علي نيتي صحابني نيت ماكتكونيش اش خبارك مالكي اختي ضعافيتي بحال الي عايشة فصومال
انا:اح عليك نتي لي زيانيتي العفريتة فين كنتي مخبية هادشي كاملو يامات لكحط وتجرتيل
واهيبة:عفا علينا لله من لكحط وجوع انا خدامة غير علي راسي
انا:اجي شكون هداك لي جابك ناس ديال لحديد
واهيبة:وانتي مالك سوليني غا علي حالي اش بغيتيه هو
انا:(كنضحك)اودي حالك باين زيانيتي وتقاديتي وتيليفون هاي هاي
واهيبة:زيدي نحيدو من هنا بغيتك تعاودي ليا من للول حتال لخر فين كنتي غابرة
مشيت انا وياها لواحد لكافي هاي هاي سيدة تبدلات ولات تعرف تهضر وتصرف بحال شي سيدة اعمال لبس كيداير وريحة باينة غالية اودي لي عطاه زمان جلسنا كنهضرو ونجمعو عاودت ليها كلشي وهي مابغات تعاود ليا والو كتقطر عليا فالهضرة ماعليش حتي انا ماديت ماجبت
واهيبة:غدا نجي عندك مع 6ديال لعشية نلقاك واجدة هزي وراقك وداكشي لي غاتحتاجي واجي جلسي معايا خلي عليك داك زبل لهلا يحيها تخدمي عليها هي وديك لعقروشة ديال مها
انا:(تصدمت)فين غانمشي معاك اواهيبة
واهيبة:انا كارية واحد دار انا ولبنات جلسي معايا مرحبا بيك اصاحبتي نتي راه بحال ختي مانقدرش نخليك مع دوك جوج شوفي حالتك كيف ولات فين هي سوسو لقديمة لي كنعرف وليتي تباني بحال الي عندك 70عام
انا:والكن...
واهيبة:دابا نبدا نسب الخرا ماكين ماوالكن غدا نجي عندك نلقاك واجدة الي قالت ليا عاوتاني ماكيناش عليا بليمين حتي نخلي دار بوها
انا:ههه نتي نيت الخوافة هههه
واهيبة:تي نوضي اشمن خوافة غدا مع 6 كيما تافقنا مهم نخليك دابا عندي خدمة مهمة وتعطلت ماسخيتش بيك احبيبة باستني وعطاتني 200درهم وخلصات داكشي لي شربنا ومشات انا شديت طاكسي ومشيت شريت سندويش كليتو دخلت لدار هزيت صاكي جمعت فيه شي حوايج وجمعت لوراق ديالي كاملين لحالة لمدنية ولاكارط وكلشي داكشي ديالي وتكيت سديت عليا لباب ونعست