قلبي لا يحتمل 💔 الفصل العاشر (انهيار)
احيانآ يكون الانتقام هو الشئ الوحيد الذي نراه وقت الغضب
حور:يعني انت دلوقتي بتسحب كل كلامك ليا ومفيش خطوبة مش كدا
زين :مين قال كدا
حور: هو ايه الي مين قال كدا هو انت مجنون انت اتنين في واحد بتقول الكلام وعكسه في نفس الجملة
زين:عرض الخطوبة كان لحور الي الكدب ميعرفش طريق للسانها وانت كدابة يا حور
حور:لا انا مش كدابة قالتها بأنفعال ليرد زين بنفس انفعالها
زين:لا كدابة يا حور
لتقول حور بأنهيار
ايوه كدابة يا زين انا كدابة مبسوط انت كدا مرتاح عايز مني ايه سيبوني في حالي بقا ابعد عني ابعد
ليقترب زين لتمنعه قائلة
متقربليش انت فاهم
ليرفع كفيه ببراءة قائلا
انا ملمستكيش انت الي بتتلككي على فكرة
لتنظر له بأنكسار ظاهر في عينيها قائلة
عايز يقتلني ولما فشل مرة حاول تاني لتتابع وقد انهمرت دموعها على وجنتيها قائله
انا معملتلوش حاجه وحشه في حياتي كلها انا كنت على طول جمبو وولا مرة اتخليت عنو كان بيخوني واسكت واحط جذمة في بقى واقول عادي نزوة زي اي نزوة كان بيهيني واقول معلش استحملي كان مبيجيش يعاملني حلو غير لو كان عايز قرشين ويروح يصرفهم على السهر والشرب كل الي حواليا كانو بيقولولي لا هو مش بيحبك مش كويس مش راجل حتى وانا كنت مغمية عينيا وسدة ودني عنهم ومبسمعش غيرو عمرى ما صدقت عنو كلمة وحشه كنت بصدقو واكدب عينيا ساعات بقول الغلط مش منو انا الي اتعشمت فيه زيادة وفكرت انو بيحبني زي ما بحبو او حتى يمكن بحبو اكتر كان على طول اقوله اننا هنكمل وهنفضل سوا ويقولي الدنيا تلاهي وهنفترق واقوله ليه تقول كدا طول ما احنا عايزين نبقى سوا هنفضل سوا بس اتعلمت اني مش لازم اتعلق او اتعشم في حد ولا اقدر في يوم اعاتب حد ان عشمي في زايد او اني كنت مغفلة واني اه كنت بقوله هنفضل سوا ومش هنبعد بس اتعلمت اني مش هقدر ابقى لوحدي مش انا بس الي هفضل اعافر واحاول في علاقتنا وهو مش فارقلو وبايع كنت بقول طالما اي اتنين بيحبو بعض ومتعذبين في بعد بعض بيبعدو ليه من الاول بس طلع ان مش كل وقت بنمشي فيه بيبقى معناه اننا مبنحبش شخص او بطلنا نحبو احنا بنمشي اما نحس اننا هونا على الشخص ده انا احس اني ولا حاجه في حياتو انا بعدت بس انا الي تعبت ليه انا الي اتعذب في بعدو وهو يعيش حياتو عادي ليه يظلمني ويعيش في دور المظلوم ويقلب الطرابيزه انا حسه ان جوايا اتنين واحدة بتحبو وواحشها وبتتمنى تلمح طيفو بس وواحدة بتكره سيرتو وشوفته واليوم الي عرفتو فيه انا بكره قلبي اوي يا زين بكرهو اوي
################
عزيزة:بقولك ايه يا واد يا عز
عز:قولي يا ماما
عزيزة:انا عايزة خمسة مليون جنيه
عز:نعم خمسة مليون ليه هتعملي بيهم ايه
عزيزة:هفتح كوافير
ليقول عز بأستهزاء
كوافير!؟هو انت امتى هترتقي وتعيشي العيشه الي بقينا عايشينها ياما ارتقي شويه اسمو بيوتي سنتر
عزيزة:سنتر ايه وزفت ايه اخلص انا عايزه الفلوس
عز: خلاص ياما هفكر سيبيني في الي انا فيه دلوقتي لينظر لهاتفه ويقوم بالاتصال برقم ما ليصرخ في المتصل قائلا
يعني ايه لسه عايشه بعد كل ده ولسة عايشه اقفل اقفل يا زفت ليغلق ويرمي هاتفه لتصرخ عزيزة قائلة
الله يخربيتك يا عز حد يرمي النعمة لينظر لها بأستهزاء لتأتي هي بهاتفه وتنظر ان كان سليم ام لا وتفتحه لترى خلفية هاتفه صورتها صورة حور لتقول ساخرة
عزيزة:لسه قلبك متعلق ببنت مهدي يابن عزيزة هتفضل خايب طول عمر...
لتبتر كلامها عندما سمعت صوت الدق المفاجئ والقوى على باب المنزل
عزيزة:يساتر يارب افتحي يا مدعوقة انت لتفتح الخادمة الباب وما ان فتحت حتى دخل زين ورجاله الي المنزل
زين:فين الي مشغلك يا بت انت
ليخرج عز اليهم
عز:زين باشا نور..
ليقطع كلامة اللكمه التي لاقاها من زين
عز:في اي يا زين باشا انا عملت ايه بس
زين:لا من ناحية عملت ايه فدي انا هعرفعالك كويس بس مش هنا يا حبيبي ليأمر رجاله بأخد عز من منزله الي المكان الذي اتفق معهم عليه لتصرخ عزيزة قائلة
ابني هتاخد ابني فين يا راجل انت
زين:ما انت لو مخلفه راجل يا حجه مكنتيش هتلاقينا هنا
################
كانت رهف في كافيتيريا المستشفى بعد ان انتهى موعد الزيارة لحور لتجد من يأتي ليجلس على نفس طاولتها قائلا
كرم:مش ناوية تفكيها بقا
رهف:هي اي دي الي افكها يابا
كرم:سحنتك يا بنتي ده احنا حتى هنبقى اهل
لتقول رهف بسخريه
اهل اه انت هتقولي ونعم الاهل لتكمل وقد انتهت لديها اي ذرة صبر
انت عايز مني ايه يا جدع انت مدبقني في الراحه والجاية ليه كدا ها
كرم:مدبقك! عارفه يا رهف
رهف:لا معرفش يا سيدي
كرم:الي يشوف شكلك الرقيق والبرئ ده ويعرف اسمك يقول عليكي ملاك متطلعش من بوقك العيبة لكن الي يعرفك يبقى عايز يغير اسمك يابنتي ده انت لايق على لسانك الي عايز يتقص ده اسم عطيات او سماح او اقولك عبده
رهف:عبده ؟وعطيات؟! انت عبيط يلاه
كرم:وأه نسيت بيئة انت بيئة
لتجاوب رهف بأنفعال
والله ؟ طب وطالما انا بيئة قاعد مرزوع هنا ليه
ليرد بما اثار استفزازها
كرم: اصل انا بحب البيئة اوي
لتنظر له رهف بأشمئزاز وقد تجمعت الدموع في مقلتيها
رهف:شكرا يا محترم لتنصرف من امامه بعد ان حدث شئ جديد بداخل كليهما الان
################
سلسبيل : بقولك اية يا عزة انا مخنوقه اوي فهد بطل يكلمني خالص وواحشني اوي
عزة:طب ما هو قدامك اهو جربي تكلميه الحفلة قربت تخلص ومش هتعرفي تكلميه
لتتشجع سلسبيل وتذهب لصديقتها
سلسبيل:فهد هو انا ينفع اتكلم معاك
فهد:ايوه طبعا يا يروحي انا كمان عايز اتكلم معاكي في حاجه ضرورى اوي
هل يحدثها هي حقآ هكذا حدثت نفسها فهي معجبة به من اول يوم رأته به ليذهبا معا الي مكان بعيدآ عن الحفلة
سلسبيل:كنت عايزني في ايه يا فهد
فهد:عايزك في حاجه ب ٢مليون ياروحي
لتقول سلسبيل بذهول
اتنين مليون ده كلام ايه ده
ليظهر فهد هاتفه ليريها ما ان رأته حتى سكب عليها كدلو الماء البارد
يتبع.....
##########################
جماعه انا ملتزمه بوقت نزول كل فصل ومفيش ريتش وانا مش بنزل اصلا عشان الريتش بس بجد انا لو الروايه استمرت على الاعداد القليلة دي من اللايكات او الڤيو بجد مش هقدر اكمل انا مقدرة الناس الي ممكن بتقرأ الروايه بس قصاد ده مش لاقيه اي تقدير
أنت تقرأ
قلبي لا يحتمل 💔
Romanceبريئة كل ما تريدة حياة هادئة دون صراعات وضغوطات تطمح ان يستريح قلبها وهو صارم لا يرى سواء عمله ولكنها غيرت كل حياته في لمح البصر واعتمدت قلبه كعرش لها
