أغمضتها كي لا تفيض فأمطرت

3

جالس في المقهى، مرسم في ثوبه الأبيض وغترته وعقاله، يتأمل جواله ويناظر الدرب...تأخرت عن الموعد ساعة بس انتظرها

بعد دقايق دخلت من الباب لابسة عباتها السوداء وشيلتها ثابتة على راسها، نظارتها الشمسية وشنطة ديور وكعبها الشبه عالي، كانت هالتها فخمة وأنيقة كأنها شيخة بنت شيخ

رفع يده يأشر له: هنا
رفعت حاجبها ومشت عنده بكل ثقة رافعة راسها وعلى وجهها ابتسامة سخرية: هذا أنت! وين ريم
ضحك بخفة: انتِ تدرين ان ريم ماراح تجي صح؟
قالت وهي تجلس على الكرسي قدامه: اي ادري، لهالسبب تأخرت..عسى ما نقعتك ساعات؟
رد عليها وهو يأشر للويتر يجيب المينو: جيت متأخر انا
هزت رأسها: اي واضح! قول شعندك وخلني امشي ماعندي وقت
طلب لهم قهوة وحلى
غاية تناظره بهدوء ورافعة حاجبها: يلا شتبي؟
رد وهو يرتشف اول رشفة من قهوته: ليه ترفضيني!
ضحكت بخفة: احلف بالله؟ كل هالدراما وتخلي اختك تكلمني عشان نتقابل وتسألني ليه رفضت؟ يعني ليه مثلاً؟ ممكن لأني ما أبيك ولا تعجبني، وانك مُريب جداً وكأنك stalker تلاحقني من لندن لين هنا بشكل غريب؟
شافها تضحك وتتكلم بثقة وكأنها عارفة نواياه: يمكن مُعجب؟
تنهدت ورجعت ظهرها على الكرسي بثقة: معجبيني كثار ماراح استغرب، بس انت وراك شيء ثاني يا نايل ولد محسن
فهم ان ماراح يقدر يلعب عليها، لانها ذكية وكشفته من أولها
ناظر للسقف شوي ثم قال: طيب، من الآخر يا بنت خليفة، وافقي ولا بتشوفين ابوج في السجن
عقدت حاجبها وضحكت: واااو تهدد؟ عبالك بخضع الحين؟ وبعدين ابوي مثل الصفحة البيضاء ماتقدر تمسك عليه شي يعني تهديدك هذا بله في الماي وأشربه
قامت من على الطاولة بتروح بس وقفها صوته: جربي ارفضي مرة ثانية وشوفي
حطت عينها في عينه: انا غاية بنت خليفة محد يهددني، انا اللي اقطع ذراعي قبل لا تلوي ذراعي يا ولد محسن، وأعلى ما بخيلك أركبه..هذا لو لقيت شيء على ابوي طبعاً
ابتسمت بتحدي وطلعت من المقهى
وهو جالس يتأملها تطلع ويبتسم بهدوء: انتظري خبر

ثاني يوم تقدم من جديد لخطبتها ورفضت بنفس اليوم وصله الرد ابو جابر كان معصب من الرفض الثاني
بس نايل ابتسم: يعني تتحديني يا طير خليفة؟
******
******
******
بعد يومين كان حفل تخرج غاية في قصر ابو راشد
كان الحفل في الحديقة الخارجية
بما ان غاية ماعندها رفيجات وايد في الدوحة تولت نجلاء مهمة الضيوف وأرسلت دعوات للكل بدون استثناء
كان الحفل بمستوى عالي
غاية كاشخة بفستان بيبي بينك من ماركة miu miu وشكلها أنيق جداً وراقي، غابت عن انظار الكثير لذلك الكل يشوفها مُبهرة ومختلفة...
حضرت ريم الدعوة وتقربت من غاية: اعذريني بليز اذا حطيتج بموقف خايس مع أخوي بس أونه (يعنني) كبرياءه انجرح
ابتسمت غاية: شكله بينجرح كثير عيل

انتهى الحفل، صعدت غرفتها تبدل وتريح شوي
سمعت صوت صراخ في الصالة ونزلت مفجوعة
شافت امها منهارة تبكي واختها نجلاء مصدومة وتبكي
امل واقفة بصدمة ومتجمدة
وريّان واقف قدامهم
قالت وهي مفجوعة: شفيكم شصاير؟
رد ريان: أخذوا ابوي للتحقيق
حست ان الدنيا تدور حولها، مصدومة! يعني سوا اللي براسه ولد محسن!!! واخذ ابوها للتحقيق
ارتبكت: مستحيل! شنو السبب
تنهد ريّان: سوء استخدام السلطة فاتحين معاه تحقيق وراشد لحقهم للمركز وانا الحين بروح
قالت: انتظرني البس عباتي واروح معاك
رفع حاجبه: وين وين؟ اقعدي هنا ماتدخلين المركز
قالت بتحدي: اذا ما خذيتني، بروح مع السايق
ماكان عنده حل الا انه ياخذها
دخلت مركز الشرطة وشافت اخوها راشد قدام غرفة التحقيق
قال راشد بعصبية: ليش جبتها معاك؟
رفع ريّان اكتافه بالنفي: أنت تعرفها زين!
نطقت غاية: شصار مع ابوي؟
رد راشد: المحامي عنده وللحين ما طلع
جلست على الكرسي تفكر في مصير أبوها وكيف دخل هنا بسبب عناد ابن محسن
طلع المحامي: الوضع صعب، في تقارير تثبت هالشي
صرخ راشد: كذب وافتراء ابوي ما يسويها
قاله المحامي: يابو خليفة هدي نفسك بنحاول نطلعه منها بأقل الاضرار اصبر خلني افحص الاتهامات من كل الجوانب
غاية تسمع كلامهم وعرفت ان الوضع صعب
سندت راسها على الكرسي: أنا أوريك يا نايل
ولما طرت أسمه شافته يمشي في الممر الثاني قدامها
نهضت من كرسيها: بروح اشرب ماي وأرجع