أغمضتها كي لا تفيض فأمطرت

14

راودها شعور غريب وهي تشوف المدخل، شعور غير مُريح
وقفت شوي وتحس ان راسها يدور
تتذكر مشاهد وأصوات وصور غريبة
ميزت صوت نايل بينهم "اكرهيني بس ماراح اخليج الحين.."
غمضت عيونها ومسكت رأسها بألم
في هالمكان نفسه اللي هي واقفة فيه راودتها ذكرياتهم
هي طايحة بالأرض تبكي وتشهق بحرقة، نايل يركع على ركبته ويحضنها..ويشد عليها وما يخليها
هي تردد: اكرهكم كلكم
يرد عليه بهدوء: اكرهيني بس ماراح اخليج الحين
يبوس راسها ويحضنها لين تهدا بحضنه..
تنطق بعدها: نايل طلقني..
تمشي وتخليه وقلبه مكسور مليون مرة...
تذكرت لقاءهم الأخير قبل ما تدخل غيبوبة وتفقد الذاكرة لكن كل شيء قبله ضبابي! كيف وصلوا لهالحال؟ هذا اللي كانت تجهله.. تقدمت بخطوات واثقة تدوس فيها على قلبها وشعورها، مهما كانت مرتبكة وخايفة من اللي بيواجهها ماراح تبين او تظهر للشخص المجهول ضعفها...
دخلت الشاليه وشافت نوف! زميلة قديمة لها من ايام الثانوي والجامعة، عقدت حاجبها بإستغراب: نوف؟
ابتسمت نوف: هلا والله..سمعت انج نسيتيني قلت اذكرج فيني
رفعت حاجبها غاية: وانتِ شلون تعرفين ريلي نايل؟
ضحكت نوف ضحكة قوية: ريلج؟ شلون اعرفه؟ يمكن لانه حبيبي اللي من سنين انا وياه سوا؟
ضحكت غاية بخفة: وتبيني اصدق؟ يصير خير
تنهدت نوف وهي تقوم من مكانها: اووه مشواري طويل معاج، ياحليلج يا غاية نسيتي كل شيء واستثقلتي فكرة انه حبيبي؟ عيل لو تعرفين باقي المصايب شنو بتقولين؟
صدت غاية عنها تبي تطلع بس وقفها صوت نوف: نسيتي اخوي ناصر؟ كل شيء بدا من عنده..ولا نبدأ من محمد؟
ألتفت عليها: منو ناصر ومنو محمد شتقولين؟
قالت نوف: اقعدي وانا اعلمج كل شيء من الألف للياء، صج اني اكرهج بس ما يهون علي اشوف نايل يستغلج واسكت

جلست غاية قدامها: غردي بشوف كذبج لوين بيوصل
ابتسمت نوف: مو كذب الا حقيقة!

***
في قصر ابو جابر كانت ريم جالسة في الصالة مع امها و عايشة والحفيدات الحلوات، تنهدت ريم لأن ايامها صارت حيادية، لا ابيض ولا اسود، لا فرح ولا حزن، مجرد فراغ قاتل..فراغ نجلاء
دخلت العاملة ومعاها باقة ورد كبيرة باللون البيبي بنك المفضل عندي ريم..وتوجهت لها: مس ذس از فور يو
قامت ريم من مكانها مستغربة: اوك ثانكيو
ام جابر: حركات من منو؟
ضحكت عايشة: معجب سري شكله
طنشتهم نجلاء وفتحت الكرت المكتوب فيه:

بترجعين لو قلتلك اني أحبك للأبد
بترجعين لو جيتلك بكره على اخر وعد

طول خريف أيامنا طول وانا صبري نفد
ما حسني فاقد حبيب أحسني فاقد بلد

- نجلاء
وكان في بن كود بأسفل الكرت لما فتحته طلع عنوان مقهى

ضحكت ريم بخفة ودمعت عيونها، نجلاء زعلتها بس تعرف ان زعلهم ماراح يدوم، وعرفت كيف تراضيها..
ام جابر: ليه تبكين؟ شسالفة؟
قالت وهي تشهق عبراتها: الورد من نجلاء، بطلع اشوفها
أخذت باقة الورد الكبيرة جداً وصعدت غرفتها
وقفت قدام المرايا تصور مع الورد
وارسلت الصورة حق نجلاء: اعتذارج شبه مقبول
ردت عليها نجلاء: لا تتأخرين انتظرج بعد ساعة
ابتسمت ريم بحماس ودخلت غرفة تبديل الملابس محتارة شنو تلبس، كشخت اقوى كشخة عندها ولبست احلى عباية وحطت ميك اب خفيف يبرز جمالها ويخفي تعب الأيام اللي فاتت بدون رفيجة دربها وأختها و روحها نجلاء
طلعت بكامل سعادتها وأناقتها: شرايكم؟
صفرت عايشة بإعجاب: واااو هذا كله عشان نجلاء؟ عيل لو خطيبج شبتسوين؟
ضحكت ريم: نجلاء اهم من خطيبي لازم يعرف انها تجي اولاً
ابتسمت ام جابر: زين طاح الحطب بينكم عقبال نايل و غاية
تنهدت ريم من طاريهم وواضح موضوع مطول
كملت ام جابر: انبسطي واخذي راحتج اليوم
طلعت مع الدريول (السايق) وتوجهت للكوفي اللي دايماً يلتقون فيه كوفي Earth في مشيرب
ابتسمت ودخلت لما تلقتها نجلاء فاتحة ذراعينها: وحشتيني
ردت ريم: لو وحشتج صج ما طولتي الغيبة
حضنوا بعض شوي ثم جلسوا على الطاولة
قالت نجلاء: ادري اني غلطت، ومالي عذر! بس بوقتها ماكنت اشوف شي الا غاية..سامحيني
نطقت ريم: ماعندي اخت عشان احس بشعورج، بس فاهمتج طبعاً..غاية ما تستحق اللي صار لها من اخوي رغم اننا مانعرف الاسباب بس اللي مرت فيه شي قوي وما يجي من امر عادي
تنهدت شوي: بس لازم تفهمين ان المشاكل بينهم مفروض ما تأثر علينا يا نجلاء، هذا اللي زعلني انج رميتي صداقة سنين عشان لحظات غضب وعاطفة...
نزلت عيونها نجلاء: تصرفت بطريقة طفولية، بس سامحيني
حست ريم بحزنها وصدق اعتذارها، هي تعرف نجلاء اكثر من نفسها حتى و تفهمها بدون ما تنطق
مدت يدها تربت على كف نجلاء: خلينا ننسى طيب؟
ابتسمت نجلاء: اكييد ننسى
ضحكوا لبعض وطلبوا قهوتهم والحلا وجلسة نجلاء تتكلم عن سفرتها مع غاية وكيف انبسطوا وتجاهلت ذكر المواقف اللي ظهر فيها نايل ماتبي تعكر صفو جلستهم بعلاقة اختها واخوها
تنهدت ريم: يالخاينة تركتيني فالجامعة بروحي اسجل حضورج كل يوم والدكتور شاك بالعدد، لو مسكني بعترف عليج
غمزت نجلاء: بس لو كان دكتور عبدالعزيز كان انبسطتي صح؟
ضحكت ريم بخفة: يوه ترا نسيته كان كراش فترة
ضحكت نجلاء وهي تشوف ريم تهرب بعيونها: اي صدقتج ولا كانج للحين تتابعين حسابه الشخصي من حسابج المجهول
ابتسمت ريم وهي تشوف نجلاء عارفتها وحافظتها