أغمضتها كي لا تفيض فأمطرت

10

حضنت أخوها وبكت: تكفى قولي شصاير ليه غاية تعبت؟
رد نايل بنبرة مكسورة: معاهم حق انا السبب
شدت على حضن أخوها وبكت بصوت عالي: طيب خل نطلع من هنا تكفى وضعك ما يطمن، خل نروح لين يهدون أهلها ونرجع
سحبت اخوها بالعافية يجر خطواته بثقل، مسكت ذراعه وطلعت وعيونها دموع..بهاللحظة خسرت رفيجتها نجلاء، وماتبي تخسر أخوها بعد
نجلاء ناظرتهم يبعدون عنها، شافت ريم تمشي بإنكسار
بعد ما طلعوا ناظر نايل المستشفى نظرة اخيرة وتنهد: ما نلت غايتي، مو هذي غايتي يا غاية

مرت أيام وغاية على حالها
نايل الندم أكله، عيلته مصدومين من الموضوع لكنه ماحب يتكلم بالموضوع..عيلته زاروها بالمستشفى يواسون أهلها
بينما نايل قرر ما يزورها، ما يحق له يشوفها او يتطمن عليها وهو سبب بلواها وعلتها..لو مادخل حياتها كان ماصار فيها شي

جالس في الشاليه ينتظر نوف توصل
دخلت نوف بارتباك
رفع حاجبه: ما بغيتي!
جلست على كرسي مُقابل له وعيونها مرتبكة: شنو تبي مني
قال ببرود: اللي عندج، من فيديوهات
ردت: بس انا ماعندي شيء حذفتهم من سنين
ضحك: تستغبيني يا نوف؟
ردت عليه بخوف: نايل حبيبي شفيك
قاطعها: حبيبج؟ يا حسافة كل سنيني اللي راحت معاج طلعتي مو كفو ود ولا كفو حشيمة لا انتِ ولا اخوج الخسيس اللي ظنيته صاحبي الصالح المسكين المغدور
تنهدت بضيق: سمعت انها بغيبوبة..صدقني انا زعلانة عليها
رد: زعلج ما يهمني، والموضوع كله ما يهمني! عطيني التسجيلات وكل شيء النسخة الاصلية وانا بتصرف
ابتسمت: يعني بتسلمها للشرطة؟
عقد حاجبها من كمية الحقد والسواد اللي في قلبها: يعني عندج تسجيلات وتقولين حذفتي كل شيء؟ شكثر تكذبين يا نوف تعبت أعدي لج والله
قالتله: التسجيل عندي بفلاش قديم لازم ارجع البيت أدور له

راحت بيتهم وطلعت فلاش صغير وكان نايل ينتظرها في سيارته برا البوابة ابوها مسافر ومافي حد فالبيت اخذت راحتها

ركبت سيارته وعطته الفلاش: شنو خطوتنا الجاية؟
ضحك نايل: خطوتنا؟ للحين تحسبين إننا فريق يا نوف؟ غريب امرج صراحة..بس قوليلي أكيد هذي النسخة الوحيدة من تصوير كاميرا المراقبة ومافيها غيرها
ردت بإرتباك: مافي غيرها ترا انا من ذاك اليوم ما شفت شنو في بداخل الفيديو يعني ما شاهدت المحتوى بس اعرف ان الكاميرا صورت فيديو في ذاك اليوم وأخذته بعد ما عطلتها

ضحك بخفة: حلو، اعترافج صار عندي (تدليس الأدلة وإخفاءها عن العدالة) ولو اكتشفت انج تلعبين بذيلج من وراي او تمتلكين نسخة من هذي التسجيلات صدقيني اقطج ورا الشمس يا نوف، وكل فضايحج صارت عندي من ممنوعات وغيرها الله يخلي ربعج الخمّة من طلعت لهم بطاقتي اعترفوا عليج لذلك انتبهي مني
نوف خافت منه: كم مرة اقولك ماعندي غير هالتسجيل
لبس نظارته الشمسية: كل حركاتج مراقبة مني، يلا انزلي
اشر لها تنزل ونزلت من السيارة بخوف وقهر
كيف رفيجاتها يعلمونه بكل شيء؟ كيف خسرت نايل مرة وحدة