ملكت من الزين زين الخلايق

البارت (٥٠)

-
يتوجه ياسر ومعه سالم لان الحين بس العريس يتصور مع العروس وهم يدخلون اذا بغو يزفونها ،يدخل ياسر يشوف رنا عند الباب تنتظره ينطق هو :سالم كثر خيرك لا تدخل رنا عند الباب
هز راسه ب ايه ينطق بعلو صوته وهو متجه للقاعه :تتهنى ياعريس
ينطق ياسر بفرحه :امين وعقبالك ياربي
يدخل يناظر رنا ينطق :اوف وش ذا الشين اسود عاد يبي يطلقتس سهم
ناظرت فيه تثبت يدها على سلاحه تنطق :ماودك افرغه في راسك
ناظر لها يقبل راسها ينطق :والله انتس زين وازين المزاين ويخسى سهم يطلقتس
رفعت فستانها لجل تقدر تمشي تنطق :الحقني يا عريس
يركب خلفها يتوجهون للكوشه اللي مسوينها هو ولين لتصويرهم لجل ياخذون راحتهم وبعيد عن الناس ،يدخل يناظر المكان يشوف انها مو موجوده ينطق :وينها عروستي
ضحكت رنا تنطق :وش مستعجل عليه وانا اختك الحين المصوره تجي وتصورك وعاد هي تعلمك بباقي الاشياء
تأفف ياسر لانه كآن متلهف على شوفتها حيث دخوله تدخل المصوره تنطق :مبروك يا عريس
صد رغم انها بنقابها وعباتها ينطق :يبارك فيتس
تبداء هي تصوره وقت يلبس بشته ساعته ومن هذي الاشياء تنطق وهي تقول:عطنا ظهرك يا عريس
اعطاها ظهره يستغرب لانه يعرف انها تصور تبداء تشتغل موسيقى الزفه ،ينفتح الباب تدخل لين ممسكه بيدينها مسكتها بالورد الابيض
متوسطه خصرها النحيل تمشي بنعومه مبتسمه بتوتر تشوف المصوره تأشر لها ان تمشي بهدوء وبدون توتر تقف في خلفه تضع يدها على بشته ذات اللون الرمادي ،تنطق المصوره :التفت يا عريس
يلتفت هو يصرخ بأعجاب ينطق :دعوة والديني قسم بالله
ياخذها يحضنها له يقبل راسها وعنقها ينطق :ياقبلة الله ياعرب ربي
بسم الله عليتس يا امي انتِ استودعتس الله اللذي لا تضيع ودائعه
ياخذ بيدينها يشدها له يحاوط خصرها ،يبتعد لثواني يطلع جواله من جيبه براجف يديه ينطق :ابي اصورتس يا نبض قلبي
تبتسم تهز راسها بايه ترفع مسكتها على وجهها يصورها وتصورهم المصوره كلهم وكيف ان الصوره حلوه على القلب وقريبه من الروح ،يضمها مره اخرى له ينطق هو :والله اني فزت بتس
ابتسمت تتغورق عيونها بالدموع يهز راسه بالنفي وهو يقول:لا لا حبيبتي ما تبكي بحلو يومها ،يمسك يدها يكمل كلامه :انتِ عيونتس ما يحق لها تدمع الا لفرح العيون الزينه ذي ما انخلقت للبكي يا روحي
تبتسم هي ،تشد على كفه يقبل هو خدها ،يراقصها على الاغنيه اللي اخذتهم بعيد بكلمات لامست قلوبهم :
حنا إجتمعنا وشمل العاشقين إلتم
خضنا حروب الهوى فزنا وردينا
مهما يقولون مهما صار مهما تم
إنت البدايات وآخر ساحل ومينا
أهواك ما هي مواويل بها أترنم
ترى المواويل هي اللي تغنينا
منا الوفى يا وفيّ الروح يتعلم
وكل التعابير تبحر من شواطينا
مهما يقولون مهما صار مهما تم
إنت البدايات وآخر ساحل ومينا
حبيب عمري حياة القلب خل الهم
تقسى الليالي ولكن ما تقسينا
وإن كان جدت جدايد حبنا أقدم
لا عاش راس على الدنيا يبكينا
يناظر داخل عينها يعرف شعورها وشعوره وكيف انه يضاهي كبر السماء وعمق الارض،بلوحة تجسد معنى الحب والحرب هو اخذها بكسر الخشوم يذكر وقت نطق له حمد "والله ما تشوفها "وهو ينطق بسخريه "اجل صوم لك يا عمي ثلاث ايام ولا اطعم مساكين"
وقت كان الصبر فض منه ،والحين هو وهي يتراقصون معلنين للكل انهم على قلب واحد،يذوب قلب المصوره من اخذها ياسر يحضنها ببشته ،تمد لين يديها له يمسكها يرفعها لثغرة يقبلها بحب تمد لهم المصوره المبخره يمسكها هو تضع يدها فوق يده يبتسم هو من مسكت شماغه تبخره ما قدر يتحمل شكلها وعذوبتها وهي تبخره وكيف انها تمسك طرف شماغه برقه
-
-داخل قاعة النساء -
قلطو جميع النساء ينتصف الليل يقل عدد الحضور،والمنصه لا زالت تحترق من خطوات النساء عليها ،الجدران تتغنى بصدى المعازف والدفوف ،الكل يرقص ولا يجلس ابداً تقترب الغاده من المطربة تنطق لها : الزفه خمس دقايق وتبداء
ابتسمت المطربه تقرب المايكرفون من ثغرها تكمل غناء على طلب احد الحضور،توقف سمر ومعها رنا وكل وحده ممسكه بين يدينها خيزرانه تخوف فيها الاطفال اللي حاسو كل شي رغم انهم كاتبين في اسفل الدعوه ممنوع حضور الاطفال ،لاكن المشكى لله تنطق سمر بعلو صوتها:ياورع اذلف لمك
تفرغ المنصه تماماً من الاطفال ما يبقى فيها الا بعض النساء تمر الدقايق تفضى المنصه تماماً يرتبونها البنات من الحوسه الخفيفه اللي صارت فيها ،تنطق المطربه :تغطو يا حريم الرجال يبون يدخلون
تبدا الزفه اللي متفقه عليها لين مع المطربه تجي سمر تركض لها تهمس لها تغيرها تبتسم سمر لان الان خطت ياسر نجحت بأنهم يغيرون الزفه لزفه بصوت ياسر يغنيها هو تبتدي الزفه بالعزف واللحن ،ينفتح باب المدخل يدخلون رجال ال راكد المحارم للين يتوسطهم ياسر بأسود بشته ،يوقفون عند الكوشه ينتظرون دخولها عليهم صادين النظر عن الكل تدخل لين بجانبها الغاده بلثامها وخمارها تزفها لطلب من لين وبعدما ترجّتها لانها الان تبي تقول للكل ان الغاده هي بمقام الام او اكثر بعد ،تبتعد عنها الغاده من وصلت قريب منهم يقترب منها ياسر يقبل راسها يمسك بكفها يصعد فيها للكوشه تسلم على جدها ابوها وعمها يقتربون منها سالم وسعود يحاوطونها يخفون عبرتهم ،يبتدي صوت ياسر يشدو بكل مكان يغني بكلمات تعبر عنه وعنها :
معشوقتي جر القصايد مواويل
لين الهواوي يستلذ بغرامه
مع الفجر والعصر وان خيم الليل
نوحي ليا رحت نوح الحمامه
ايه افخري بي ما عشقتي لتس خبيّل
يفداتس رجلً ما تشيله اعظامه
ولايا نشتدك منقل القال واليقيل
منهو عشيرتس عرفينا مقامه
قولي عشيري بينكم كنه سهيل
بين النجوم بطلعته واعتصامه
وانت وربعك بين عشيري قناديل
ياللي غناي امقوم بنقل النمامه
وان ضايقتس يأم الرموش المضاليل
لا تدفني راستس سوات النعامه
تنومسي بي نعنبو بارد الحيل
ما يلحقتس يابنت فيني ملامه
-
ينذهل الكل من سمع صوت ياسر وعذب كلامه لها يمثل لها انه هو العزوه لها وانها هي تسوا عنده الكثير ولا يرضى لها الضيقه ابداً
تشد هي على كفه يحس هو برجفتها بكفوفها يهمس لها :هدي من روعتس يا معشوقتي
تستمع لباقي كلامه العذب :
قولي عشيري اية العصر والجيل
قرمً ينومس من يحب القرامه
من متعبين الخيل ذباحة الحيل
لاطامة العايل فحول الزعامه
فقير لاكن نادر بالمشاكيل
واختار دربً غير درب السلامه
في اعتزي بي وانا سعوط المهابيل
ويبشر بيومً مثل يوم القيامه
نذرً علي والنذر ما فيه تبذير يا جارحتس ما يهتني بمنامه
قلته وانا قد اليالي المقابيل
من داس لتس جره تراني كعامه
و انا كّاني من خيار الرياجيل
اعطيني البرقع ودوك العمامه
-
تلتفت الزين لسمر اللي واقفه بجانب رنا تحاول تحبس عبرتها من عذب الكلام اللي تسمعه ترفع كفها لعينها تمسح الدموع العالقه في رمشها تشوف سمر اللي حضنت رنا تبكي ،تنطق هي :سمر وجع لا تخربين مكياجتس دافعه ست مية وتروح من الدموع
نطقت سمر بين شهقاتها اللي تحاول تخفيها :ما اصدق ذي الورعه تتزوج
همست رنا :اجل لو تزوجو نورا و رُبى وش بتسوين
اخذت نفس تتنحنح تنطق بكبرياء:ما ابكي انا عشان الورعات ذلي
نطقت لمى بينما كانت تسكت فرح اللي تبكي :يمه منتس يا سمر ترا فيه مثل يقول من حبك سبّك وانتِ حتى الدبج دبجتيهن
يلتفون البنات للكوشه يشوفون ابتسامات ياسر وكيف هو شاد على كف لين تنطق الزين :والله انه صبر ونال ماشفت كثر عذابه ذيك الايام رغم انه ما يطلعه لنا
التفت سمر للزين اللي عيونها تطلع قلوب من حلو شكلهم ،التفت ياسر على سمر يغمز لها تفز هي تطفي اغلب لمبات القاعه ما يبقى الا القليل من الاضائه والنور اللي يتبعمهم يشد على يد لين يلتفت لعمامه ينطق : ما ودكم تترخصون يعني بدون مطرود
التفت له سعود ينطق:اقول انا ابي اردح
تأفف ياسر من حركات سعود يأشر لسمر بعينه انه مو الحين ،تشتغل احد الاغاني يبتسم سعود يتقدم لهم سالم يمسكون كفوف لين يراقصونها معهم رغم دفاشة رقصهم الا انهم زرعو الضحكات بين كل الحضور وكيف هم يدورونها بينهم وكل واحد ياخذها يراقصها ،يقترب منهم ياسر بملل يختلط بالغيره ينطق :خلاص عاد اربعه وعشرين سنه معكم خلوها لي
ابتسم سالم يطبطب على كتف ياسر :جعلك لها ذخر وسند ،يلتفت للين ينطق لها :وانتِ انتبهي له تراه اخوي وعضيدي
ناظرته لين بغضب ظنن منها انه راح يوصي ياسر عليها ،يضحك سالم يضحك معه ياسر،ينطق بنبرة حاده نوعًا ما:ياسر بنتنا صارت على ذمتك انتبه لها
ياسر اخذ بيدها يشد ينطق :في قلبي وعيني ومجرى دمي لا توصي وانت خابر اللي في القلب
ابتسم سالم لانه يعرف قدر محبة ياسر للين ،غلاها عنده ،يبتسم ياسر من طلعو كبار ال راكد ولا يبقى الا سالم وسعود ،يطلعون هم بعد ما حسو انهم لاصقين في ياسر اللي كان كل دقيقه ودقيقه يحارشهم ،تبداء تشتغل احد الاغاني اللي طلبها ياسر خصيصًا من سمر ،يمد يده للين :تراقصيني اميرتي ؟
ناظرته لين تنفي بعيونها يبتسم هو من بداء اللحن يعتلي يحاوط خصرها ،يمسك يدها بيده هي تحاوط عنقه ،يتناغمون بالرقص
تخجل هي من نظراته لها وابتساماته ينطق لها بين ثانيه والاخرى "ياحظي " وهو ما كذب ابداً انما هو محظوظ فيها جداً ،يناظر فراغ المكان ينطق بهمس :لا تخافين
يشد على خصرها يشيلها لفوق يدور فيها تصرخ بخجل ،يصرخون كل الحضور يصفرون بحماس تنطق رنا :عشت يا عريس
توقف سمر تزغرط بعلو صوتها تقوم معها رنا يزغرطون يصفقون بحب لشكلهم اللطيف ،تنطق سحر بضحكه :تتوقعين احد درا انهم متزوجين عن حب
نطقت الغاده بضحكه :ماشاء الله تبارك الله خليهم يختي يعيشون يومهم والله ان لين خاطرها ماش حسبي الله على من كان السبب
-
-في حوش قاعة الرجال-قبل الفجر-
تفضى القاعه من كل الحظور تقريباً ما يبقى ال المقربين
جداً لـ ال راكد ،ترتفع اصوات السماعات يتلطمون الشباب ،ياخذ سعود شماغ احد الشباب يربطه على خصره وهو متلثم يجي له ريان يسوي نفسه يطلب من بتال انه يشغّل الاغنيه ،يلتفتون يتأكدون من عدم وجود احد من الكبار ،من ابتدت طق الطبله يصرخون بحماس يشوفون كيف ان سعود حريف في رقصه يرددون مع الاغنيه :
انا لا مسطول ولا بطوح
انا جاي اجامل و مروّح
واشوف اللي بعني
وسابني وخانني
اه يمه اه يابا
دي عيله وطيه ونصابه
والليله جينا نهنيكم
هاتو الفلوس اللي عليكم
خطب خطب كذا وقت منحوس
-
يهز سعود اكتافه وخصره يدخلون صغار الشباب معهم في جنونهم وكيف انهم مندمجين مع الاغنيه ،يشوفون هز اكتاف ريان السريع
يدخل معهم ليث يحاول بشتى الطرق انه يقلد حركاتهم ولاكن كل شوي يطيح ،يطلع من القاعه مالك بجانبه سهم ينطق
بصدمه :ابن ابوي
ضحك سهم ينزل عقاله يتلثم بشماغه :نلعب معهم ما حنا  خسرانين شي
يرفع مالك ثوبه يربطه على خصره يطلب منهم يحطون دبكه لانه يعرف يرقصها او يحترفها بالمعنى الاصح ،يتلثم يمسك سبحته يتشابكون كل اللي في الساحه يصير هو بداية الصف ،يبتدي طق الطبله المهيج ،يبداء الشباب بالدبكه اولهم مالك يحرك سبحته للاعلى يقدم خطوه وياخر خطوه ،تضرب أقدامهم بالأرض  ،يدخل عليهم راكد يناظرهم يوقفون هم يبتسم لهم ويقول:ليه وقفتو كملو
يصرخون العيال بفرح يقترب منهم راكد ما يدبك اننا يتابعهم فقط،يمر قليل الوقت ينطق سالم لياسر اللي جلس بتعب :ما تبي عروستك ؟
التفت له ياسر يبتسم بلهفه لانها الان تبي تنزف له لسيارته لبيته تصير في امانته تطلع من ذمة ابوها واخوانها تصير على ذمته تماماً ،يعد شماغه يناظر لسالم ينطق :شكلي زين؟
يضحك سالم ينطق :والله زين وزين الشباب بعد يالله لا نتأخر عليهم 
ابتسم ياسر يعدل بشته ،يمشون يتوجهون للداخل يبتسم من شاف عمشه بجانب لين،يلتفت لها يشوفها بعباتها البيضاء اللي تدل انها عروس يقترب منها ياخذ بيدها امامهم كلهم ،تنطق عمشه بنبرة مرتجفه تنطق له بنظرات تميل للجديه :خذها امانه لا تردها بيت ابوها عاشت فيه بعز تعيشها انت بعز والله والله ان حسيت انك مزعلها يا ياسر ان ما تشوف الخير هذي امانه قطعه غاليه
ابتسم ياسر ينطق بجديه :والله انها في وجهي وشنبي من جور ايامها ولا تبكي الا في فرح والحزن ابعده عنها لو انه يرجع علي ما يمسها شي بأذنه وهي في ذمتي
ابتسم حمد ينطق وهو يقول:نزفك يا عريس
اخذ ياسر بيد لين ينحني لاذنها يهمس :عليتس كعب ؟
تهز راسها بالنفي ،لانها هي بدلت كعبها بسلبر ابيض ،ياخذ بيدها يركض وهو ممسك بيدها يصرخ بعلو صوته:اخذتها خلاص لي هي
يلتفت لها يحاوط خصرها يحملها يدور فيها بينهم كلهم بحوش القصر ،يتمم نهاية ليلتهم الحلوه السعيده على الكل وعليه وعليها هي بالاكثر لان الليله هذي تتوج من احلى الليالي لهم هم بعد طول انتظار بعد مرّ الحياة اللي عاشوها ورغم الفراق اللي حصل غصبًا عنهم كلهم الحين هي له حلاله في بيتهم ،تبتسم نورا بين دموعها لانها صورت هذي اللحظات كلها وماتدري ان عدسة جوالها تبي تصور اللذاذه في صوره ،يصرخ سعود بحماس :عاشو العرسان عاشو
يبتسم له ياسر يتوجهه له سعود و سالم بجانبه وابوهم ايضاً يزفونها لين السياره تركب هي بمساعدة ياسر اللي كانت الفرحه تنطق من عيونه ،يركب هو السياره يلتفت من سمع طرق على الدريشة،يفتحها ينطق لعمه:لبيه ياعمي
ابتسم حمد ينطق وهو يأشر على لين :بنتي امانه في عنقك لا يجي يوم تجيني تبكي وانا عراف انك رجال وسيّد الرياجيل
ابتسم ياسر فقط يشد على يد لين ينطق :ما اخيب ضنها ولا ضنك يا عمي
-
-في احد غرف القصر -
جلس يُخرج جواله من جيبه ،يدور رقمها يتصل عليها هو متلهف لشوفتها بكشختها وحلو شكلها اللي ما يختلف فيه اثنين ينتظر انها ترد عليه يبتسم من وصله صوتها تنطق بين اصوات المعازف والاغاني :لبيه
مالك :لبيتي في منى تعالي اقبلي علي انا في احد الغرف قولي لرنا وهي تعلمتس
نطقت بصوت عالي لانها هي ما تسمعه :هلا ما سمع شي ارفع صوتك
اخذ نفس يعلي صوته يعيد نفس كلامه ،يبتسم من اجابته :زين جايه
تتوجه هي لرنا تناظرها تنطق :رنا وين مالك ؟
رنا اخذت نفس تنطق بينما هي تبعد الاطفال عن المنصه:شوفي في الدور الثاني اخر غرفه يمين
تلتفت على احد الاطفال اللي يدخل بتخفي تصرخ:ياورع اذلف لامك
تبتسم الزين تنطق وهي ماشيه :قواتسن الله يا حبيباتي
تتوجه للدور الثاني ترفع طرف فستانها يوضح حذائها العالي اللي يكسر لون فستانها بلون اللحمي يبرز حنطي لونها الجاذب اللي يمل للبياض اكثر ،تتوجه للغرفه المقصوده تدخل ،يفز هو من شافها ينطق بهيمان : الزين !
ابتسمت ترجع شعرها للخلف تنطق بخجل لانها تشوف ردة فعله :لبية يا عيون الزين
اقترب منها يناظرها ينطق وهو يمد يده لشعرها الاسود يبعده عن عنقها :تسلم عيونن تقول لبيه
رفعت يدها لصدره ،يبتسم هو من صار وجهها مقابل وجهه الكعب زاد طولها وصارت تقاربه بالطول تقريباً ،يحاوط خصرها يناظر فتحت الفستان اللي تعري جسدها اكثر من ما تستره رغم انه طويل الا انه يبرز مفاتنها اللي تجيب اجله كله ترمي به يمين ويسار ،ياخذ بكفها لكفه ينطق :كل ذا الزين وانا اخر من يشوفه
ابتسمت تضحك هي لانها تشوف كيف يناظر لها بحب تشوف لهفته في عيونه تنطق:من اول احتريك تجي مع عمّاني و بالزفه ولا جيت
مالك انحنى لعنقها ياخذ من عبيرها لصدره ينطق :صعبه اجي دقيقه واطلع
ياخذ بيدها يشوف الكنبه اللي في منتصف الغرفه يجلس وهي تجلس بجانبه ،ياخذها لصدره ينطق :اقربي يمّي خليني اتمقل فيتس انتِ اللي ينقال عنها حوريه فوق الارض نجديه
اخذ بكفها يخلخل اصابعه في اصابعها ،يناظر لها ما يعرف ايش يقول الحين هو يبيها بجانبه بس امام ناظريه يبي يشبع نظر منها رغم انه يعرف ان لو يتأملها سنين وقرون عديده ماراح يمل ،اخذ نفس بهيمان ينزل نظره لاقدامها يشوف فتحت الفخذ اللي تبينه كله ياخذها يقربها له اكثر ظهرها يصير على صدره يحاوط خصرها وبطنها يغرق وجهه في عنقها ينطق :ياسحري اللي ما ابي له ترياق
تنطق هي مبتسمه :يا عوضي من ذي الدنيا كلها وحبيبي
التفت لها يناظر بعيونها ينطق :اخر كلمه وش هي
ابتسمت من شافت ابتسامته اللي اظهرت صفة اسنانه :انت حبيبي
مسك بيدها ينطق :ياجعل حبيبتس فداتس
شدت على كفه تنطق :مجار يا روحي
وقف هو من شاف اقتراب اذان الفجر ،توقف هي معه ينطق:نصلي الفجر ونمشي لا تروحين مع البنات ابيتس معي
ابتسمت تجاوبه بأيه ،يمسك وجهها يقبل ثغرها ومن ثم خدها ينطق:والله ما ارتوي من ثغرً معسول
يبعد هو من انفتح الباب تدخل سمر تناظر لهم :ما شبعت ياخي خلها معنا يكفي الفجر الظهر طول وقتها معك حتى ما شبعت منها
ناظر لها مالك يحاوط خصر الزين ينطق :حرمي مالتس شغل وبعدين اشبع ما اشبع مالتس دخل
كشت عليه تناظر الزين وتنطق :ترا ماعاد فيه احد امشي نسولف كلنا موجودات حتى خوالي مشو للشمال ماهم راجعين معنا الديره
ناظر الزين مالك ارتفع صوت اذان الفجر ينطق :الله اكبر ،نصلي الفجر ونمشي زين ؟
هزت راسها بايه تخرج مع سمر ،ينزل هو شماغه يحطه على كتفه وطاقيته و عقاله على راسه ،يطلع من القاعه بكبرها يشوف العيال كلهم يتوضون ينطق راكد :المسجد قريّب لا تشغلون السيارت الحين
بالفعل طلعو متوجهين للمسجد مشي على الاقدام ،يرتفع صوت الامام يُقيم للصلاه يصتفون جميع ،طلعو من المسجد يلتفت مالك على ابوه اللي من الواضح انه يكلم ،يتوجهه لسهم ينطق :ما حددت زواج انت ورنا ؟
نطق سهم :مدري والله بس قريّب ماهو بعيد
ابتسم مالك يتوجهه للداخل يشوف الكل جاهز الحريم بسود عبايتهم يتوزعون على السيارات
-
ابتسم ياسر يناظر بشته على الكنبه شماغه فوقها يشوف طرحتها وتاجها على جنب يبتسم من اخيراً تحقق مُناه صارت له في بيته يحتري خذا اليوم طول السنين ،يبتسم من طلعت له ببجامه حرير باللون البيبي بِنك يوضح صفاء نحرها ولمعته طول عنقها ،ينطق :والله وتحقق مناي شوفو حبيبي معاي
اخذ بيدها يجلس وتجلس هي على فخذه ينطق :ياسعّد يومً اتمقل في حسن وجهتس
ابتسمت تحاوط عنقه تنطق بدلع :احبك ياسر
ابتسم تبين اسنانه العلويه وتظهر غمازة خده الايسر ،يحاوط خصرها يقبل ثغرها يرتوي عطشه ،يغني اليوم بفرح بلهفه بحب بعد طول السنين والبعد والجفى اللي صار بعد عذاب سنين ولهفة عليها "يا وصلها الغالي هلا حيت يا عز الطلب " تنطرب النجوم بوصلهم الاول بالوصل اللي لا طالما حارب لاجلها ولاجل قربها ،يتغنى الليل فيهم يقرح بفرحهم تتراقص النجوم لاجلهم تصير هي لين قلبه ، يفرح يغني الليل لهم"هلت سحابة وصلها على حياتي و ازهرت " ،هي تصير حلم الايام الشداد و الليان ،بعد وحشة ليله يسطع النور على حياته كالقمر في دامس الليل ،تعود هاجوس ليلته
-
-في طريق الديره-
يناظرون شروق الشمس تلون السماء بالحمّار ،يناظر لها يحضن كف يدها ينطق :كيف الزواج عسى تعبتو
الزين :والله الزواج يجنن ما هكبت انا والبنات شعللنا الساحه صح ان رجولي تفككت
مالك عدل التكيف يشوفه بارد عليها ينطق :للحين توجعتس امر الصيدلية اجيب لتس مرهم تراها قريّب
هزت راسها الزين بالنفي تنطق :لا عادي لانه من الكعب والرقص
فتح مالك جواله يناظره ويناظر الطريق يشوف التاريخ ينطق بتذكر:الزين عندتس موعد الاربعاء هذا
الزين عدلت جلستها تناظر له :لـ أيش؟
مالك نزل جواله ينطق :يشوفون صحة قلبتس والتحاليل العاديه
ابتسمت هي لانها بخير واكثر من اي وقت الان هي مرتاحه جسديًا رغم انها تشوف انه يشيل هم وتحاول بقدر الامكان انها تعرف ايش هو بس ما تلقى اجابه ابداً :ان شاء الله بخير انا ولا فيني الا العافيه ولا تشيل هم الحمد لله ما صار لي اي اعراض انو جسمي ما تقبله او تعبت وهذا كله من فضل ربي ثم حرصك يا مالك
التفت لها ينطق :والله انه واجبً علّي ان ما حرصت عليتس من احرص عليه يا ابوي انتِ
-
-الديره - بعد يومين-
تطلع سمر بجانبها الزين تحمل هي فرشه تفرشها على التراب في احد زوايا الحوش الصاده عن الرجال تنطق :زيون اجلسي يختي انا ابي اشغل اللي ابي ارش الحوش لجل نبرد شوي
تلتفت من خرجت رنا وبين يديها صينية حلا تنطق :هلا بالحامل والمحمول
تنطق رنا بعد ما نزلت الصينيه على الفرشه :هلابتس ،وين البنات ما جّن
الزين :اذا قصدتس الدقدق ما ضنتي يجن بس لمو وين ؟
رنا :قبل شوي دقيت عليها تقول ارقد فرح و اجي بس غريبه الجو حار رغم ان الليل قرب ينتصف
سمر اخذت لّي الماء تفتحه بأخف درجه ترش الارض اللي حولهم :شوال وحر يعني وش تتوقعين
فتحت جوالها رنا تنطق :بنات ابي اقول للهنوف تجي
مر قليل الوقت تطلع لهم الهنوف وبيدها صحن تمشي لهم جلالها فوق راسها تنزل الصحن على الفرشه تنطق :سويت لكن فطاير تحبها قلوبكن
اخذو البنات من الفطاير يتذوقونها تنطق سمر :هنو ماشاء الله لذيذه تذوب من زمان ما اكلت فطاير كذا الا فطاير حنان
اخذت نفس الزين تشوف سعود وريان طالعين من المقلط تتغطى بجلالها تتغطى والبنات ايضاً تنطق سمر :ياصبر الارض ذولي ما يهكبون نبي نجلس لحالنا نسولف وذولا ناشبين هنا ،اشرت على خشمها بغضب توقف تبي تروح لهم ،تنطق رنا بحماس :كفو عليتس يا بنت جدي اي عطيهم
الزين التفت لها بصدمه تنطق:خبله انتِ وش اللي كفو ذول عيال دفوش والله ليكسرون عظامها
-بيت حمد-
دخل هو لغرفته يشوفها جالسه على الكنبه بين يدينها جوالها يتنحنح وينطق :غاده
التفت له تتعدل بجلستها تنطق :هلا
جلس بجانبها ياخذ بيدها تلتفت له من نطق :يا سحر البيان
حاوط خصرها ينطق بشعره اللي يغني فيه لها :
مطنوخة الزين كله والدلع والحنان
الغادة اللي سبت فكري وعقلي سبي
من زينها الطاغي يغارون كل الزيان
العنق عنق المها والعين عين الظبي
موتٍ حمر وان تثنّت كأنها الخيزران
الحكي حكي عربي والدم دم عربي
-
احمرت وجنتيها من كلامه لمساته لها تعرف مدى حبه تنطق :تعرف يا حمد
اقترب منها اكثر ينطق :لبيه لو تبيني اعرف الكفت عرفته لجلتس
نطقت الغاده :احبك رغم كل شي صار لنا رغم التعب و البعد
رفعت نظرها له تشوف لهفته بعيونه ،تعرف انها ما تعطيه حقه بس هو وافق ورضى على شرطها ،يناظر ثغرها المروّي ينطق :غاده تسمحين لي
قبل ثغرها من كانت تبي تنطق يقاطع كل كلامها يتلذذ بعذوبة ثغرها يرتوي ،يطلب وصلها تلبي طلبه تعرف حبه لها ولا يخفى عليها ابداً يسعد بوصلها بعد طول العذاب والتعب يصير القرب اللي طال وهو يتمناه تعب في ذي الدنيا اخذته يمين ويسار عصفة فيه والحين بعد كل العواصف تمطر حياته بوصلها تشرق شمسه بعد الدجى
-
-في المقلط -
دخلت سمر بكل قوه بدون ما تناظر مين الموجود لانها واثقه ان ما فيه احد الا محارمها تناظر سعود ريان اللي على السوني تنطق بغضب :ورع انت وياه حنا جالسي بالحوش قسمً بالله ان شفتكم موطوطين اني لا اتوطى في بطونكم
نزل سماعته سعود يناظر لها ينطق :ها وش تقولين ما سمعتس
صرخت بقهر لانهم يتجاهلونها تنطق بغضب :هواه يا ورع انا عمتك احترميني ولا اشوفكم توطوطون بالحوش
وقف ريان ينزل اليد على الارض ينطق :حوش جدي مالتس شغل
تخصرت تناظر له بحده تنطق :حوش ابوي قبل لا يصير جدك
تنحنح حمد يصد ،يوقف سعود يغطي سمر وهو يقول:يا ولد محارمنا
اخذ ريان شماغه اللي كان طايح على الارض يغطي فيه سمر يناظر حمد وهو يقول:استر ما واجهت يا الاخو
تنحنح حمد ينطق بهدوء:ما صار الا الخير
توسعت عيونها تستوعب ان كل شي صار امام حمد ينفجر وجهها خجل ما توقعت انه موجود بينهم ،تدف سعود عنها تطلع جري من المقلط ،تتوجه للبيت ما تمر جلست البنات ابداً
تكلمت الزين من شافتها تركض لداخل البيت :اكيد انهم صفقوها ابي اروح لها
-
دخلت البيت تتوجه للمطبخ تاخذ نفس رفعت يدها على عنقها تحاول ترتب انفاسها هي تحس نفسها في موقف لا تحسد عليه ابداً ،التفت من صفقت الزين تناظر لها تنطق:مو قايله لتس انهم يبون يصفقونتس بس ما تفهمين
ناظرت لها سمر تنطق :يخسون يصفقوني بس اجلسي لازم اقول لتس
ناظرت لها الزين تجلس على رخام المطبخ تنطق :لا لازم رنا معنا
سمر نطقت بتوتر :والله بتخليني رنا علكه في حلقها
الزين تنطق بفضول :عجلي دمي يحرقني وش السالفه
اخذت نفس تناظر لك شي الا عيون الزين تنطق:حمد شافني وانا اتناقر من العيال
انفجرت الزين تضحك تنطق من بين ضحكاتها :طيب عادي حمد اخوتس ولا لا يكون تقصدين
قاطعتها سمر تنطق :اي اي هو اللي في بالتس
ابتسمت الزين :فيه مشروع زواج جديد على ما اعتقد يعني
توسعت عيون سمر تضرب كتفها :زيون وش ذا الكلام عيب
-
-داخل احد الغرف -
جلست رُبى تناظر نورا وغدي اللي يتناقشون عن موضوع تخرجها اللي راح يقام بعد اسبوع ،اخذت القطو تحطه في حضنها تمسح على فروها الناعم :بنات احس فقدت الشغف يعني احس اني خايفه بكرا اروح اخذ عباية التخرج من الجامعه
ناظرت لها نورا يقطعون حوارهم تنطق هي :رُبى اللحين اللي من بداية رمضان وانتِ مبلشتنا تخرجي وتخرجي اللحين فقدتي الشغف على قولتس !
تربعت غدي تناظر لها تنطق بفلسفة:انتِ اللحين كم لتس تحاربين في هذي المعركه الدسمه الشرسه اللي انتِ في اعلى سلم النجاح
ناظرت لها رُبى تعدل جلستها تنطق :اما عاد تصديق اول مره احس انتس تصلحين للدب سعود كلكم تتفلسفون في اخيّس وقت
نورا صفقت بكفوفها :رُبى صح وغدي صح وانا صح وكلنا صح
غدي ورُبى بوقت واحد:اما عاد واو أينشتاين حليتيها ذكيه الله يحفظتس لأهلتس
-
الظهر -بيت سلطان-جناح مالك-
ابعدت البطانيه عنها تحس بالحر الشديد تناظر التكيف تشوفه على ابرد درجة حراره تناظر مالك اللي نايم :مالك
هو اللي كان غارق في نومه ،تدق كتفه تنادي عليه :مالك قوم
يرد عليها بتمتمه دليله انه يسمعها تنطق هي :مالك ابي جح
ناظر لها ينطق بنعاس :مالك راقد جح في ذا الحر الساعه وحده حتى المكيف ما يبرد وبعدين شوفي الثلاجة اكيد فيها جح
ناظرت له تنطق :ابي جح في سياره ددسن تضرب عليها الشمس في نص الخط
توسعت عيونه ينطق :الزين انتِ صادقه يعني
تخصرت الزين تناظر له تنطق بترجي:لا بالله يعني اكذب ياخي قم جب لي تكفى ابيها حمرا
ناظر لها يستغرب طلبها ،يوقف يناظر لها يأشر على خشمه ينطق :على خشمي بس اذا مالقيت اللي تبين اجيب من البقاله
هزت راسها بالنفي ،يهز راسه بخيبه لان تصرفاتها غريبه بس طلباتها عنده اوامر ،يتوجه للحمام " اكرمكم الله "يغسل يوضى يطلع يمسح وجهه يناظر لها يشوفها تدور شي ينطق :وش تدورين
الزين بينما كانت تناظر اسفل السرير :جوالي مدري وينه ابي اوريك الجح اللي ابيه
مالك اخذ نفس بقل حيله:اما عاد حتى نفس الشكل تبين !
هزت راسها بايه يبتسم هو من غرابة تصرفاتها ينطق :شكل الموعد مخرب اعدادتس يعني قلنا انه اليوم بس تدورين عذر عشان ما نروح
اخذت نفس تجلس على السرير تنطق :ما اخاف بس انا مشتهيه جح
بينما هو يلبس ثوبه يسكر ازاره :الجح في الثلاجه امس عمي حمد جايبه
ناظرت له :ياحبيبي يا مالك انا ابي اللي يبيعونها في سيارات انت تعرفها ابيها تكفى
فرش سجادته يهز راسه بايه ،يبتسم لها يرفع صوته يقيم للصلاة يصلي ،اكملت هي تدور على جوالها في الغرفه كلها سمعت صوته يرن تتبع الصوت تاخذ نفس بفرح من وجدته داخل المخده ترد على سمر اللي تتصل :هلا
سمر ثبتت جوالها على كتفها تاخذ السلطه تحطها في الصحن :وينتس ما جيتي قومي مالك وتعالو تغدو ياسر ولين يبون يجون اليوم
الزين وقفت تتوجه لدولاب الملابس تفتحه تنطق لسمر :اكشخ ولا لا؟
سمر نفضت يديها تتوجه للمغسله تغسل وتنطق :تعالي بقميصتس ما فيه احد ولا اذا فيتس حيل للكشخه فستان ناعم وصلّ الله وبارك
-
-في الرياض -احد الفنادق-
دخل ياسر بصينية الغداء ينطق :ليني تعالي تغدي حاشي يحبه قلبتس
ابتسمت لين تعدل فستانها الصيفي تجلس بجانبه على الارض ،تناظره يرفع اكمام ثوبه يعدل جلسته ينطق :بسم الله
تسمي هي يتغدون ،اخذ نفس من ما عرفت تفتح علية البيبسي ياخذها منها يفتحها يمدها لها ينطق:سمي
اكملو يا كلون ،ينفض يده ياسر يحمد الله ،يغسل وهو يقول:لين متى نمشي الديره العصر ولا الحين
رفعت السفره تحطها على جنب تنطق :مدري انا اشتقت للديره وللبنات رغم انها ثلاث ايام بس والله اشتقت لهم
مسح كفوفه من الماء ،يجلس على الكنبه تجلس هي بجانبه ينطق :جعل ما يشتاق لتس عدو اي والله اني مشتاق لهم واجد نمشي الحين ؟ والمه واغراضتس والمه ولا ؟
ابتسمت توقف تعدل فستانها تنطق :اي خلاص بس ابي اعدل شكلي ونمشي
اخذ نفس يوقف يناظر لها ينطق :انتِ كذا ولا كذا احلى المخاليق
ابتسمت بخجل رغم انها المفروض تتعود على حلو كلامه ولاكن كل مره يبه ها اكثر يغرقها بعسل كلامه
-
-الديره-
يتجول في الطرقات يدور اللي يبيعون البطيخ مثل ما تبي الزين وعلى وصفها انها تبيها حمرا ومليانه سكر،لبس نظارته الشمسيه يعدل شماغه يناظر احد السيارت اللي محمله البطيخ يشوف انه يبي يمشي
يتوجه له يأشر له من شافه يحرك ،توجه لسيارته يلحقه يأشر له
بأنه يوقف ،يوقف هو على جنب ينزل راعي البسطه من السياره ،يتوجه له مالك ينطق :السلام عليكم
رد عليه السلام يصافحه ،ينطق مالك بينما هو يتفحص البطيخ :ابي جح عليه الكلام مضبوط
هز راسه ب ايه ياخذ وحده من حبات البطيخ يفتحها امام مالك يمد له قطعه بعد ما قطعها ينطق :ابد ان ما اعجبتك لا تدفع حقها
اخذها مالك يتذوقها ما يختلف اثنين من لذاذت طعمها :خلاص بالله ابي هذي وابي وحده كبيره بس هاه نفس ذي طيبه بالحيل
هز راسه بايه ،ياخذ البطيخ يركب للسياره يتنهد بفرحه لانه ما تعب كثير رغم انه يحس بدوار من حرارة الشمس يلتفت على المقعد الامامي يمد يده ياخذ علبة ماء يزفر بملل من كانت كأنها مياه مغليه
يشغل السياره يتوجه لبيوت ال راكد ،ينزل شماغه على كتفه احد حبات البطيخ ،يتنحنح لجل يلقى له طريق ينطق بعلو صوته:طريق يا ولد
يدخل من سمع صوت امه تأذن له بالدخول ،ينزل البطيخ بجانب الجلسه يتوجه لهم يقبل راس جدته ام وخالته جميله يجلس يدور بعيونه الزين لاكن ما يلاقيها ،تنطق جميله :الزين مع البنات فيها شي؟
ابتسم مالك ينطق :ما فيها الا العافيه بس ان كانها ولامه نبي نمشي ما ودي نتأخر عن موعدها
عمشه عدلت جلستها تنطق :يا ويلي على بنتي هي فيها شي
مالك وقف ينطق :لا ما فيها شي موعد عادي يا يمه
ابتعد عنهم يخرج ياخذ البطيخ اللي في سيارته يتوجه لبيت ابوه ،دخل المطبخ ينزل البطيخ على الرخام يكفف اكمامه ينزل شماغه من على كتفه لطاولة الطعام ،ياخذ صينيه من احد الادراج يحط البطيخ عليها ياخذ سكينه كبيره نوعًا ما يقطع البطيخه بالمنتصف يبداء يقطعها مربعات صغيره يبعد الجزء الاخضر منها ياخذ حافظه صغيره يحط فيها البطيخ المقطع يحطه في الثلاجة
يطلع من بعد ما رجع كل شي لمكانه
-
-في بيت راكد-
الصاله الداخليه ،جلسو البنات حول بعض وسط جلستهم صينية شاهي احمر يمتزج معه النعناع ،تمد سمر بيالة شاهي للزين تنطق :مالك شكله يبي يمشي بدري
الزين اخذت البياله ترتشف منها القليل تنطق :اي عندي موعود والصراحه خايفه مع ان ما فيني الا العافيه
نطقت رُبى بينما كانت تسولف مع نورا :تعوذي من ابليس هذي وساويس
اخذت الزين نفس تناظر بجوالها اللي رن تشوف اسمه ينور شاشة جوالها "مالك الزين" التفت على البنات تنطق :بنات ابي اروح سلمو لي على لين اتوقع انهم يجون قبل لا نجي بس يا ويلكن ترقدن ابي نسهر مع بعض
ناظرت لها لمى تنطق :اذا رقدو الجنون اللي عندي جيت
نطقت سمر :خوفي انتِ ترقدين قبلهم يختي فرح ولا هي مزعجه وليث عن العيال
طلعت الزين تعدل عباتها ترفع طرحتها على راسها تغطي وجهها تتوجه لبيت عمها سلطان ،تشوف الهدوء فيه لان الكل في بيت راكد
تنزل طرحتها على اكتافها ترقى الدرّج تشوف باب الغرفه مفتوح تدخل تناظر مالك اللي بدل ملابسه وجالس على جواله ينطق لها :اذا خلصتي نمشي ؟
توجهت للكنب تنزل عبايتها تنطقت :نمشي ، جبت الجح اللي ابي
ضحك مالك يعدل جلسته ينطق :اي جبته بس اذا بغينا نمشي تاخذينه
اخذت نفس تتوجه للدولاب تخرج لها بنطلون اسود رياضي مع تيشيرت اسود تاخذ عبايتها من الدولاب تبدل ،تتوجه لتسريحه تجمع شعرها بوني تيل ،تلبس عباتها تناظر له تشوفه يعدل كُم ثوبه يسكر الكبك ،ياخذ نظارته الشمسيه هي تاخذ نظارتها اللي بجانب نظارته ،اخذ كفها بكفه ينطق لها :نمشي يا الزين كله
ابتسمت تعدل طرحتها ،ينزلون من الدرج مع بعض يتوجه هو للثلاجه ياخذ الحافظه ،يطالع بالزين ينطق :اليوم يا هو حر ماهو طبيعي

_______
استغفر الله واتوب اليه
اعتذر عن قصر البارت ولاكن اقتراب موعد الاختبارات ما صار لي كثير الوقت ،لا تنسون النجمه وعلقو على كل شي
حسابي انستا التنزيل يومي
raweat _shadan