ملكت من الزين زين الخلايق

البارت (٥١)

-

ناظرت الزين الشمس اللي تسطع فوق روسهم تنطق :اي خلاص انتهى الشتاء
ركب السياره تركب هي بجانبه يشغل المكيف على احر شي ،ينطلقون متوجهين للرياض ينتضرون اجمل الاخبار بتعافي الزين والكثير والكثير ناظر لها ينطق :تخافين انتِ
ناظرت له تنطق :لا بس يعني تعرف توتر المواعيد وكذا يعني مني بخايفه
ضحك يناظر للطريق ،بين سوالف يقطعون فيها المسافه ،تشهق هي تنطق بهمس وهي تضرب يده :مالك وقف على جنب
ناظر لها ينطق بخوف يشوف تغير وجهها وصوتها يوقف على جنب بسرعه ينطق :زيني فيتس شي
فتحت الباب بسرعه تنزل تفرغ كل ما في جوفها ترفع يدها على صدرها، نزل بسرعه وخوف عليها يمسك يهدها ينطق:الزين
قاطعته تنطق :ما فيني شي اكيد من الخط
هز رايه بالنفي يشد على يدها اللي ممسك فيها ينطق بخوف :الزين امانه ما يوجعتس شي الزين انتِ تخرجين ما في جوفتس قدامي وتقولين ما فيني شي
اخذ علبة الماء اللي في السياره يفتحها لها تصب منها في يدها تغسل وجهها يسندها رغم رفضها ،يتوجهون للسياره يركب بعد ما ركبها يناظر لها بخوف تبتسم هي تنطق لجل تطمنه رغم انها تحس الدنيا كلها تدور فيها :مالك لا تخاف انا بخير وبعدين لا رحنا المستشفى راح تتطمن
اخذ نفس يهدي نبضات قلبه المتسارعة يناظر رجفة كفوفه الخفيفه يرجع لمساره يكملون طريقهم وبين الدقيقه والدقيقة يسأل الزين "انتِ بخير" وترد بكل مره"بخير" يراوده الخوف من كل شي ممكن يصير ،وقفو امام المستشفى ينزل هو يتوجه لبابها يسدنها رغم رفضها الا يعرف انها تعبانه وتقاوم يمطق بحده :الزين انتِ تعبانه لا تقاومين
يدخلون للاستقبال يمد ورقة الموعد تأشر له الموضفه انهم يرتاحون ،تجلس وهو يجلس بجانبها ينتظرون دورهم يناظر الشاشه المخصصة لعرض الارقام وكان الرقم"٣٠٢"ومن الواضح ان وراهم وقت انتظار طويل بما ان رقم الزين"٣٣٠" يوقف ،رفعت راسها من كانت ساندته على يدها تنطق بهمس :وين بتروح
مالك اقترب من شاف تغير صوتها :الزين امشي نروح الطواري ماني بمنتظر هنا
اخذت نفس الزين تشوف كيف يتكلم بحده تعرف خوفه تنطق بهمس :مالك خلاص ما عاد باقي الا شخصين
جلس عشان خاطرها رغم ان قلبه مو مرتاح ابداً ،يلتفت من سمع الممرضه تنادي باسم الزين ،يوقفون يمسك يدها لجل يسندها يتوجهون لغرفة الكشف
-
-الديره -
امتلى البيت بريحة العود والهيل يستقبلون عرسان العيد ، اقتربت سمر من رنا تنطق لها بهمس :ترا الحب حقتس موجود
التفت لها رنا تبتسم تنطق:والله
ضرب كتفها سمر تنطق :خفيفه قسم بالله اي شوفيه بالمجلس حق الرجال وتأكدي ان مافيه احد
التفت لها رُبى تنطق :سمر ماشاء الله كل شي تعرفينه راحت لين من غير شر جيتي انتِ
دخل حمد بعد ما تنحنح ينطق:سمر امي وين ؟
التفت له سمر تنطق :في مجلس الحريم وبعدين ترا البيت فاضي حنان و جميله راحو يعايدون أهلهم خذ راحتك
التفت على الطاوله يشوف صينة الحلا ياخذ حبه وينطق :مين اللي مختاره ابيها بكلمة راس
التفت نورا عليه تنطق بأبتسامه :انا
اقترب منها ياخذ حبه ثانيه ينطق :نورا حبيبتي انتِ الحين مقتنعه ان فيه شوقلاطه بالفراوله
هزت راسها ب ايه تنطق :تصدق يا خالي ان الفراوله فيها فيتامينات كثيره
كتمت سمر ضحكتها التفت بعينها تشوف غدي ورُبى ماسكين ضحكتهم ،شكل نورا وهي تحاول تبرر لحمد مضحك جداً، اخذت رُبى علبة ماء تفتحها تبي تشرب ولاكن طاحت عينها بعين سمر ينفجرون الثلاثه ضحك تناظر لهم نورا وهي ودها تضربهم على حركاتهم الغبيه ، التفت حمد عليهم ينطق:وش يضحك انا وبنت اختي نسولف
اخذت سمر علبة ماء تشربها تبّل ريقها اللي نشف من كثر الضحك تنطق :حمد انت اكثر واحد المفروض ما يسولف
ناظر لها حمد يرفع يده على عقاله ينطق :قدها
مسكت طرف فستانها مخططه على الهرب تنطق :اخر وحده توصل ام عيال
فزو البنات يركضون خلف سمر اللي طلعت من المطبخ ومن البيت كله تتوجه للحوش وخلفها البنات واخرهم حمد اللي ماسك عقاله يلحقهم فيه ،نطت سمر لداخل المقلط تقفل الباب خلفها تاخذ نفس من تعبت من الركض والتهرب من حمد ،التفت تشوف سعود راقد تبتسم بمكر من طرت في بالها فكره ،تطلع بهدوء تسكر الباب خلفها،تتوسع عيونها من شافت حمد مقبل لها ينادي وهو يقول:جيت لموتك يا تارك الصلاه
ناظرت سمر للبنات تشوفهم يضحكون عليها تأشر لهم وتنطق بعلو صوتها:هين يا الوراعين هين تضحكن
التفت تصرخ من اقترب منها حمد اكثر تركض وتهرب منه ،ينادي لها بعلو صوته :سمر هين يا سمر
التفت له تنطق :حمود ما سويت شي انا بريئه
-
-في مجلس الرجال-
دخلت رنا تبتسم من شافته جالس تتنحنح ،يناظر لها ينطق :رنا ارحبي يا ربيع قلبي
جلست بجانبه يحاوط خصرها تنطق هي :البقى يا سهم
رفع يده من على خصرها يمسك كفها يعدل جلسته يصير مقابل لها عينه في عينها من قربه لها يخشى هدب عينه يلامس هدبها يعل حاله بسبها بشكلها اللي يفتنه كل ما تشوفها عينه ،ما يقوى الكلام يصبح ابكم لاكن عيونه تتطرز كثير الحكي ،يناظر حدت عينها سواد اهدابها ينزل عينه لعنقها ما يقوى الصبر ،لهفة شفايفه طورت في عنقها ،ابتعد عن عنقها يناظر استسلامها التام له ،ياخذ نفس من عبيرها يمتلى صدره ينطق :رنا ابيتس مني ولّي
ثقل لسانها عرفت غايته ومناه يبي قربها لا شي غيره تنطق :انا منك ولك
ابتسم من ردها رغم انه كان متوقع انها ممكن ترفض ينطق :تبين عرس حفله فستان ابيض نفس باقي البنات تم على ذا الخشم ابي زواجنا الاسبوع ذا دامتس راضيه واذا ما تبين عز الله اني على ما تشتهين حاضر
رنا عدلت جلستها تنطق :انا معك بكل خطوه دامك تبيه الاسبوع هذا انا ابيه بعد
اخذ نفس يموت فيها وفي كلامها ما يخفى عليه ابداً لهفتها ويضن انها تعادل لهفته او اكثر :عز الله اني اخترت لي ملاذ
ما تنكر ان شعورها ما تتمنى انه يخف ابداً تحب وقت يكون معها وقت يتغير كله تحب مبادرته الدائمه وكيف هو يوضح لهفته لها ،عدل جلسته يتراكى على الكنبه ينطق :متى نروح نختار القاعه
ناظرت له تنطق :ما ابي قاعه ولا زواج كبير
ناظر لها ينطق :تبينه هنا في الديره
رنا تربعت تنطق له : تصدق فكره حلو ومانبي ناس واجد اهلي واهلك لان لو جت رانيه وبناتها ذولي انا بنفسي راح اصفقهم
سهم استغرب ينطق :من ذولي؟
رنا ناظرت له تشوف استغرابه تنطق :ياحبيبي ذولي شياطين على هيئة بشر قسم بالله قبل شهرين مدري ثلاثه جو عندنا وتهاوشنا معهم والصراحه يعني هم اللي غلطو
ابتسم سهم يسمع لسوالفها اللي تطرب مسامعه يحب كيف هي تتكلم بحماس تشرح له عن الهوشه اللي صارت ،ماكان منتبه لها انما يتأملها ينطق بهدوء :يا هديه من ربي
ناظرت له ما تستوعب لانها هي في وسط كلامها عن الهوشه يقطعه كله تتأمله لثواني تستوعب جُملته اللي قالها تخجل تنطق :سهم يعني مو هامتك سالفتي
تنحنح سهم ينطق:لا هامتني انتِ بكبرتس مهمه عندي شلون سالفتتس ما تصير مهمه!
-
-الرياض-المستشفى-
جالسه هي بجانبه ينتظرون نتيجة التحاليل اللي اعلمهم الدكتور انها راح تطلع بعد ساعتين والحين مر نصف الوقت ،يطمئن هو من كلام الدكتور وان ما فيه اي اعراض تدل ان القلب فيه خلل انما كل شي سليم وهذا اللي ريّح ضميره وعقله ،ناظر لها ينطق:تبين قهوه؟
عدلت جلستها بينما كانت مراكيه راسها على الكرسي تنطق :سعوديه؟
ابتسم هو ينطق :اي ،تبين مقطره
هزت راسها بالنفي تنطق :لا ابي قهوه سعوديه
وقف هو يناظر المكان حوله ينطق لها :لا تروحين اطلب وأجي
هزت راسها ب ايه تناظر ظهره مشيته وكيف عدل شماغه من كان طرفه على اليمين يصير بالجهه الاخرى ،تناظر المكان حولها تشوف الهدوء اللي في ارجاء المكان كله وصوت الاجهزه الطبيه البعيده عنهم ،اخذت نفس عميق من حست بغثيان بطنها يزيد تتمالك نفسها لانه ما خف ابداً انما يزيد ،عدلت نفسها من شافت زوله جاي يمها تحاول ما توضح له شعورها لانه تشوف خوفه وتعبه عشانها تخفي شعورها كله ،يمد لها كوب القهوه ينطق :انتبهي تراها حاره
ابتسمت هي تمسك الكوب بحذر منها يجلس بجانبها ،ينطق بهدوء نبرته:تصدقين احس اني فرحان انتِ بخير ياربي لك الحمد والشكر
ناظرت له تعدل نقابها ،يرتفع صوت الممرضه تنادي باسم الزين يوقف مالك يمد يده باخذ الكوب منها ينطق :ينادون
توجهو لغرفة الدكتور يدخلون يلقي مالك السلام ،يبتسم الدكتور ينطق بعد ما رد السلام :تفضلو
ابتسم مالك ينطق :ان شاء الله ان كل شي بخير
الدكتور ناظر الجهاز اللي امامه ينطق :بخير واكثر من ما توقعنا صحتها بخير وقلبها بخير بعد بس على موضوع الغثيان
عدل مالك جلسته يناظر الزين اللي جالسه امامه يرجع نظره للدكتور يسمع باقي كلامه ،ناظر الدكتور للزين ينطق :الغثيان خف؟
هزت راسها بالنفي تنطق :يروح ويرجع
ناظر الدكتور لمالك ينطق : لازم تنتبه لها يا مالك
قاطعه مالك ينطق :ليش خير ان شاء الله
ابتسم الدكتور من شاف في عيونه الخوف ينطق :خير خير بس الحين المسؤليه زادت عليك وعليها
عقد مالك حجاجه بأستغراب ينطق :زاد تعبها فيه شي ما اعرفه
ناظر الدكتور الزين يلاحظ توترها من فركها لكفوفها ينطق :بتصير بابا
مالك وقف بعدم استيعاب ينطق :هاه ؟
ضحك الدكتور يناظر هدوء الزين والواضح انها ابداً مو معهم ينطق :الزين حامل
ناظر له مالك بتعجب ما يستوعب شي نهائيًا انما عينه على الزين فقط ينتظر منها ردت فعل بس من الواضح انهم كلهم مو مستوعبين شي ،جلس مالك يناظر الدكتور ينطق :الزين حامل؟
مالك :احلف بالله انك صادق
الدكتور ابتسم من شاف ردت فعله وكيف استهل وجهه ينطق :اي حامل وهذا اللي مسبب لها غثيان فا راح احولكم على دكتورة نساء وولاده لجل تاخذون كل المعلومات اللي تحتاجونها
يطلع من بعدها تاركهم في عز صدمتهم مالك يناظر الزين اللي كان منها الهدوء يناظر لها يمد كفه يمسك كفها ينطق :زيني انتِ حامل
ناظرت له تستوعب كلامه تنطق :انا حامل! يعني انا بصير ام قطعه مني ومنك
هز راسه ب ايه تمتلي عيونه دموع يوقف هو يحظنها بكل قوته يقبل راسها ينطق برجفة صوته:انتِ حامل زيني راح اصير اب راح تصيرين ام !
ناظرت له تبتسم فقط تهل عيونها الدموع ما تستوعب حجم الفرحه حجم الجبر اللي داخلها تحط يدها على بطنها تناظر له :مالك انا داخلي روح راح اصير ام
ابتسم ياخذ نفس يمسح دمعته بطرف شماغه ينطق :اي انتِ بتصيرين احن ام واجمل ام
جلس هو ما تستحمل رجوله الوقوف ما توقف دموعه ابداً يبتسم يناظر لها ،كان فاقد الامل نهائياً ولا عاد يفكر فيه بس الحين يجيه الخبر هذا جبر له ولتعبه طول الايام والاشهر الماضيه يوقف يسجد سجود شكر لله يرفع يدها يمسح دموعه يحظنها ،تحاوطه تشهق تبكي تنطق بين دموعها :مالك
اخذ وجهها يضمه بين يديه ينطق :عيون المالك وروحه سمي ولبيه
رفعت يدها تمسح دموعه اللي تسري على خده تنطق بين شهقاتها :جعل عينك ما تدمع الا لفرح
هز راسه ب ايه ينطق :هذا فرح يالزين والله ان الارض ماهي مكفيتني صدري اوسع من السماء والله ان همومي انزاحت انتِ جبر
انتِ اطلبي وتبشرين فيه
دخل الدكتور يناظر لهم ينطق : حولتها للدكتوره تاخذون باقي التفاصيل منها
ابتسم مالك يتوجه للدكتور يصافحه ينطق :لك معده بقلبي تصدق ذا الخبر لي كم انتظره والله انها ايام كثير الله يسعدك كثر ما اسعدتنا
ابتسم الدكتور ينطق :الله يتمم لها على خير
طلعو متوجهين للدكتوره ما يصدق ابداً ان هذي اللحظة جت ما يصدق ابداً ،شد على كفها يحس ان الدنيا ما توسعه ابداً ،ابتسمت تشوف فرحته ولهفته هي مو اقل منه ابداً ماهي مصدق تتمنى ان هذي السعاده تدوم طول العمر تتمنى انه يجي او تجي بصحه وعافيه ،يدخلون عند الدكتوره يجلس مالك تتوجه الزين لسرير الكشف تنطق الدكتوره بعد ما وضعت الجل الخاص بالسونار على بطن الزين تنطق وهي تناظر الشاشة تنطق :الحمد لله كل شي بخير
بس لازم اقول لكم شي مهم مره
ناظر مالك للزين بخوف ،تنطق الدكتوره :الجنين صغير بس ان شاء الله كل شي بخير بس انو فيه احتمالات كثير وحطو كل شي سلبي وإيجابي انا راح اوصف لك مثبتات تحافظ على الجنين ومقويات للمناعة لك انتِ
مالك ناظر للزين ينطق:اهم شي هي بخير ؟
اعطت الدكتوره منديل للزين تمسح فيه بواقي الجل ،تنطق :بخير بس لازم الراحه الراحه ولا تجهدين نفسك لا فكري ولا جسدي لا تشيلين هم شي
هزت راسها ب ايه تخاف من كلامها رغم انها تطمنهم تنطق :راح يكبر داخلي
ابتسمت الدكتوره تطمنها :ان شاء الله وراح نسمع نبض قلبه او قلبها
اعتدلت الزين تجلس ،تبتعد الدكتوره تتوجه لمكتبها تجلس ،يتوجه مالك للزين ينطق من شاف سكوتها :لا تشيلين هم يا ابوي انتِ اهم شي انتِ بخير
ناظرت له تنطق :وجنيني بخير
هز راسه ب ايه يبتسم ينطق :وجنينتس بخير لا تخافين
ناظر الدكتوره اللي نطقت:كتبت لك مواعيد كل شهر واذا حسيتي بشي مو طبيعي قبل شهر تعالي وان شاء الله كل شي بخير
الزين وضعت يدها على بطنها تنطق :كم عمره
الدكتوره  :اسبوع تقريباً
مدت لهم صوره من السونار و ورقة الصيدلية ،يبتسم مالك من شاف الصوره ما يصدق شي ابداً ما يصدق الرضى اللي جالسين يعيشونه والراحه العظيمه ما يخف الحمد و الشكر لله من لسانه ابداً يطلعون من المستشفى كله ،يبتسم لها يتوجهون للسياره يركب بعد ما تركب هي يناظر لها ياخذ نفس يبتسم يناظر كفوفه يشوف رجفتها ما استوعب كامل الاستيعاب يضن لوهله انه في حلم ناظر لها ينطق:الزين انا في حلم ولا علّم
ابتسمت تشد على راجف يده تنطق :والله في علم انا بنفسي ماني مصدقه احتاج استوعب انا بعد
-
-الديره-
وصل ياسر ولين من وقت يمتلي بيت ال راكد بالعائله كلها واهل سهم يلبون دعوة ال راكد لهم لانهم الان صارو من ضمن العائلة
،يدخل سعود بعد ما تنحنح يشوف سمر جالسه قريب الفرن على جوالها ينطق :سمر
التفتت له تنطق:هاه
سعود تراكى على رخام المطبخ ينطق:هواه للعدو طفشت
سمر قفلت جوالها تناظر له : بالله! اذلف لريان اللي انت وياه مسوين عصابه عليها ديون
دخل سالم يناظر لهم ولنقاشهم والواضح انها بداية هواشهم المعتاد يتوجه للثلاجه ياخذ علبة ماء ،ناظر لهم ينطق :خسارة العمر فيكم والله انكم ورعان
ناظروه تتخصر سمر يتخصر سعود بالمثل ينطقون :لابالله!!
ضحك يغمز لهم يعدل شماغه يطلع من المطبخ والبيت كله يتوجه لمجالس الرجال تاركهم يرجعون لنقاشهم ،دخلت عمشه لهم تسمع علو اصواتهم تنطق بغضب :سمر اذلفي يم الحريم وانت الرجال ينتظرونك
اشر سعود لسمر بعيونه بمعنى انه يراقبها وهي تأشر على عنقها على انها بتذبحه ،يتفرقون من بعدها
-
-في الصاله -
كانت الاصوات تجمع حلو السوالف ،الضحك الكثير والراحه في وجيههم ،الاستقرار العظيم اللي يحسونه التفت نورا على الباب من انفتح تدخل عليهم الزين المبتسمه تنزل عبايتها تعلقها تعدل شعرها هي بدلت ملابسها لفستان صيفي ،وقفت رُبى تتوجه لها تنطق :زينوه تأخرتو مره
الزين عدلت روجها تنطق :اي طولت الفحوصات مره بس اشوا لحقنا على العشاء على الاقل
ضحكت رُبى تنطق :صدق انتِ همتس بطنتس
ضحكت الزين و رُبى صادقه في كلامها هي الان يهمها داخل احشائها جنين روح يحي روحها ،مسكت رُبى يد الزين يتوجهون للجلسه تسلم الزين على الحريم الموجودات كلهم تجلس بجانب البنات ،يرجعون لحلو السوالف ابتسمت حنان تنطق موجه كلامها لام سهم :متى نزف عروستنا ياام سهم
هي قصدها متى موعد الزواج لان المتعارف عليه ان اهل العريس هم اصحاب الشأن في احتيار موعد الزواج بالاتفاق مع العرسان ،ابتسمت ام سهم تنطق :والله ان سهم كل يوم يعطيني موعد ميّر قريب ماهو بعيد وانتم اهل العروس اهل بنتنا 
ناظرو البنات رنا اللي تحاول قد ما تقدر تخفي ابتسامتها لانها تعرف انهم راح يمسكونها طقطقه بعيداً عن كل الناس ،ناظرت لها سمر تهمس لها:اضحكي وعلمي الكل انتس تحبينه وش عليتس منهم
ناظرت لها رنا بصدمه :لاوالله !عشان حظرة جنابتس تمسكيني طقطقه انتِ والورعنه اللي معتس
الزين ابتسمت من سمعت حوارهم تنطق بهمس لهم :رنا اي خليتس فطين ترا ياخذنتس رايح جاي انتبهي !
-
-مجلس الرجال-
بين صوت هز الفناجيل وصب القهوه ريحة البُن وكيف العيال يتناوبون بصب القهوه ،يبتسم راكد من الهدوء اللي صاير وكيف مافيه اي اصوات مزعجه انما اصوات الضحك والسوالف ،التفت ياسر على مالك المبتسم والواضح انه مو حولهم ابداً يدق رجله بالخفاء ينطق بهمس :ابو عبود وراك مهوجس بعيد منت بمعنى ابداً
تنحنح مالك يعدل جلسته ينطق :والله ياخوي ان الدنيا طايرةً فيني ماني بمستوعب حاجه ابد
ياسر مسك يد اخوه يخاف ان فيه شي يخبيه:فيك شي وانا اخوك
التمس من نبرته الخوف عليه يشد على كفه ينطق:فيني اللي يسعدني ويسعدك ياخوك بس يجي وقته
قاطعه ياسر ينطق :اهم شي انك بخير هذا ما بالدنيا ومافيها
التفتو من نطق ابو سهم يلفت انتباههم :العرسان حددو عرسهم وانا تو يبلغني الذيب سهم وعلمي علمكم بس زواجهم بطلب منه ومنها يبونه في الديره هنيا واخر هذا الاسبوع
ابتسم مالك يشوف كيف سهم يعدل شماغه مبتسم يوضح فيه كمية الفرحه ،ينطق راكد :والله وزين ما اخترتو يا سهم اي بالديره والاجواء الزينه وابد متى ما بغيتو شي ،اشر على مالك ورائد ينطق :عندك مالك ورايد وان تبي احد يرتب معكم سعود وريان ابد تراهم بالخدمه
توسعت عيون سعود وريان ينطق سعود لريان :جدي ورطنا يحسبنا ابو هنود وداهنين على روسنا زيت
نطق ريان بحسره :جدي شوي ويشغلنا عند النياق اقول خلنا نسكت لا يجدول علينا
ناظر له سعود ينطق:نروح نجدول على البنات
نطق ريان يبتسم ينطق :اللي وصيتك فيه جايبه
سعود نطق :افا عليك بالسياره
ضرب كتفه يبتسم ينطق:كفو ياولد خالي
وقف ريان ينطق :ماعليك زود ،نمشي؟
طلعو من مجلس الرجال يتوجهون للمطبخ بما انه المكان  الوحيد المسموح لهم يدخلونه بدون اي مشاكل او يصادفون احد غير محارمهم ،دخلت سحر تنزل الصينيه الفارغه على الطاوله تناظر لهم تنطق :وراكم بلا؟
تنحنح ريان يدق جنب سعود لجل يسكت ولا يتكلم :نبا  ماء
ناظرت لهم تنطق بسخرية تقلد كلامهم بطريقه مضحكه :نبا ماء !اذلفو بس الكراتين مليانه في المجالس
ناظر سعود ريان وده يصفقه على رده الغبي ينطق هو:عمه نبا نجلس هنا
ناظرت لهم تمشي تطلع من المطبخ يتنفسون براحه من كانو راح ينكشفون بسبب غباء ريان على قول سعود له
-في صالة الحريم-
جلسو البنات بتخمه اخذت نفس رُبى تنسدح على الكنبه تناظر غدي اللي تشرب الشاهي تنطق لها :صبو لي شاهي
سمر شمقت لها تنطق :اقول يا العصكول منت بناقص نقص حديد قومي
جلست رُبى تنطق :جعل الحديد فداه ياشيخه دامه يروق فيني
نطقت الزين وسعد ولد جنى بحضنها تلاعبه:يروق فينا كلنا ماهو بس انتِ بس كثرته ماهي بزينه
ابتسمت جنى من شافت حنان الزين لولدها سعد ولطافتها معاه تنطق :سعد حبك كثير
سمر شمقت لرُبى وهي تشوف غدي تمد لها كاسة شاهي ،تلتفت للزين تنطق :والله اللي ما يحب الزين خسران
نطقت جميله :عز الله انه خسران وياحظ اللي يحبها
بينما كانت هذي سوالفهم وضحكهم ونغزاتهم على بعض بضحك ومزح ،تلتفت لين على الدريشه اللي كانت تطلع على الشارع تشوف النار اللي اعتلت خلف هذي الدريشه تتوسع عيونها تأشر على الدريشه بتأتأه بسبب خوفها من النار و لهيبها يلتفتون البنات يفزون بخوف من سمعو صوت انفجار قريب من عندهم دب في قلوبهم الخوف والرعب ،اخذت لمى فرح اللي كانت بحضن عمشه تنطق بخوف للبنات :نار !!
ينطلق انفجار ثاني قريب من عندهم ايضاً ،يسمع الرجال صوت الانفجارات هذي يوقف مالك ورائد والباقين من الشباب والكبار يطلعون يركض مالك من شاف نار ينشاف دخانها اكثر من لهيبها يدخل البيت يعرف خوف الزين من النار واللهيب يصرخ بخوف ينبهه النساء انه راح يدخل ،دخل صاد يشوف تجمد الزين بمكانها تناظر النار بدون ما ترمش بخوف رغم صغر النار لاكن دخانها وصل صدر السماء،يركض لها ينده بأسمها ينطق للبنات :اطلعو اطلعو النار قريب من البيت
اخذ بيد الزين يضمها له ما تحاوطه ابداً يرجف خوف عليها ،يطلع فيها وهي ما زالت ما تتكلم ابداً ولا حتى صدر منها اي ردت فعل ،يناظر لسكونها في حضنه يدها على بطنها تلمع عيونها بالدموع يطلع من البيت بكبره يشوف سكونها اللي اعتاد ان يكون بعده انهيار عظيم ،يبتعد عنهم تماماً يتوجه لسيارته ينزلها داخل السياره يناظر حوله يشوف الكل منشغل انه يطفي
النار اللي حتى ما يعرفون سببها ابداً ،ناظر للشارع سعود وريان جاين يركضون بأسرع ما عندهم من سمعو واحد من اهل الديره ينطق "بيت جدك يشب"
من بعدها ما يدرون وش يسون غير انهم يركضون متجهين للبيت بدون حتى التفكير يشوف بعض اهل الديره زود على اللي كانو معزومين جاين يفزعون اللي يتصل على الدفاع،دخلو سعود و ريان لخلف البيت انفجعو من شافو السواد اللي انتشر حول الجدران والدرايش نصف الجدار تحول للاسود الداكن السود المرعب اكثر من كونه لون فقط انما اللي يشوفه يعرف على الفور ان اللي خلف هذا اللون هو نار مشتعله لهيب يذوب حتى العظم من قوة لهيبه وش لون ما يصمد جدار كثرت سنينه وصدوعه ،اخذ نفس يعدل دقات قلبه المتسارعه بسبب الخوف اولاً والركض ثانياً
ينطق بخوف يتطمن عليهم يشوف جده امامه :جدي انتِ بخير عماني بخير عماتي بخير محد جاه شي
التفت عليه ينطق :الحمد لله لحقنا عليه وكلنا بخير محد فيه شيً ابد
التفت سعود على سالم يشوف تحول ثوبه للاسود غترته اللي على كتفه محترق نصها اثر محاولته انه يطفي النار ،ينطق له :صار لك شي؟
سالم نفض يدينه ينطق:لا الحمد لله مرت سلامات
التفت على عمه وابوه اللي جلسو على على الدكه بجانبهم ابو سهم وباقي شيبان الديره ،انحنى مالك للزين اللي تناظر الفراغ تنطق بهدوء :كنت راح اموت ؟كنا راح نحترق ولدنا يعيش بدون اهل؟
هز راسه بالنفي يتأكد انها من بوعيها ابداً انما تهلوس ،اخذ يدها بين يدينه يناظر لها ينطق :الزين ابوي انتِ انتِ بخير وانا بخير و ولدنا لا تخافين
امتلت عيونها بالدموع تسري كمسرى السيل في وسط الربيع ،تحرق قلبه لانها مو بوعيها ولا هي معه اصلاً بعيده عنه بعد تام يخاف عليها وجداً يخاف تتئذا ،جلس بجانبها يضمها لحضنها ومكان لها الا ان تبكي بعلو صوتها لجل تخفف شوي من روعتها وخوفها اللي انحبست وسط صدرها تخفف من خوفها من روعتها ،ينطق مالك بينما هي بين احضانه :والله ما يمستس شي يا ابوي انتِ ما يمستس لا تخافين
نطقت بينما كانت تناظر له :خفت مالك خفت اموت ويموت ولدنا جنيني خفت انت تموت بسم الله عليك ويصير بدون اب مالك لا تخلينا
ضمها لصدره مره اخرى يقبل راسها لدقايق طويله يطمنها بأنه معها ولا راح يخلها يرجف صدره شعوره من قالت "لا تخلينا"يعرف ان المسؤولية عليه زادت رغم انها حلوه الا انه يخاف يتركهم ،غمض عيونه يستغفر يتعوذ من الشيطان على الافكار اللي تجيه
يطمنها بكل الكلام مد لها علبة ماء ينطق :لا تخافين يا حبيبتي
-
-في الحوش -
توجه ياسر للين يشوفها واقفه بجانب عمشه تسولف معها تخفف عنها ،يتوجه لها يقبل راس عمشه ينطق :الحمد لله على السلامه جت خفايف ياربي لك الحمد
اخذت عشمه نفس تناظر له تنطق:كلكم بخير ؟
ابتسم ياسر يطمنها ينطق :بخير يمه الحمد لله محد جاه شي
ناظر للين ينطق لها :ارتعتي ؟
ناظرت له تهز راسها بالنفي تنطق :لا ما خفت اصلاً
اخذ بيدها ينطق بحده:لين
التفت تناظر له تنطق :تبي الصدق خفت بس ماهو بكثير
ضحك ياسر يشد على كفها الملاصق لكفه ينطق :وشوله المكابر يا حبيبتي كان قلتي خايفه وانتهى الموضوع
مسكت ذراعه تنطق بنبره متحشرجه :بس يخوف ياسر
ناظر لها ينطق:ليني تبكين!
هزت راسها بالنفي تمسح دموع عينها تنطق :ما ابكي
ابتسم ياسر يضمها له يضحك ينطق :ابكي ترا حضني لك ذرا
ابتسمت تحاوطه تدمع عيونها ما تخطت الموقف المرعب ولا شكل النار ولهيبها ،اخذت نفس ترتب نفسها تبلع غصتها ماتبي تبكي لانها تشوف حال جدتها وحزنها على احتراق بيتها والحديقه ايضاً لمسها بعض من حرارة اللهيب ،ابتسمت سعود ينطق :وش هالجلسه الرومنسية
ابعدت لين عن ياسر تنطق :ياخي اذلف ما تهكب انت
ضحك سعود من تهزيئ لين له ينطق بضحك :كملو كملو ما كأنكم تشوفوني
نطق ياسر يكتم ضحكته :وجهك مغسول بمرق!اسمع كلام اختك واذلف
ناظر لهم سعود يشمق تنطق لين :متحور سمر جاك يعني ولا من زود الحب تأثرت
نطق سعود بغضب :ما باقي الا سمر احبها !!
اقتربت منهم سمر من سمعت اسمها رافعه طرف قميصها الاحمر تنطق :ماباقي الا انت احبك يا احر حبه دز امها ما اتشرف بحّبك
اقترب سعود منها ناوي يصفقها تركض وهي تقول :اصفقني و اوريك نجوم الليل في عز القايله
-
-في السياره-
اخذ نفس مالك يشوف انها غطت بالنوم تتوسد صدره ،يناظر ظلام الليل يسمع اصوات الناس والعمال في كل مكان ياخذ جاكيته العسكري يغطيها فيه يقصر على مكيف السياره يتنهد لانه شهد على انهيارها ويعرف الفوبيا اللي عندها وخوفها من النار جاهل السبب اللي ادى لهذي الفوبيا ولاكن يبصم بأصابعه العشره ان تركي ابوها له يد في هذا الموضوع ، فتح جواله يشوف اقتراب موعد نهاية اجازته اللي ما خذها بدون راتب كله لجل يجلس معها في تعبها يداريها، فزت من نومها يسمي عليها ناظرت له تاخذ نفس من ادركت انهم بعيد النار ولا حولها ابداً تنطق :مالك احد تأذى ماما بخير
نطق يطمنها :بخير الكل بخير يا ابوي انتِ
سندت راسها على صدره تناظر للفراغ ينطق بهدوء بحنان: فيه شي بخاطرتس لين الحين ولا طلع
هو يقصد ان باقي بكاء باقي خوف ما طلع لانه يعرف انه راح يأثر عليها بشكل سلبي ،ابتسمت تشد ذراعه اللي محاوطتها :ما يبقى في خاطري شي وانت معي
قبل راسها لثواني طويله يسترجع حيله ،التفت للدريشه يناظر العمال والشباب كيف كلهم يتعاونون على تنضيف مخلفات الحريق ،ينطق بهدوء:الزين انتِ بخير ؟
عدلت جلستها تضم جاكيته لها تنطق :بخير يا روحي
فتح الباب ينزل يتوجه للباب الامامي ينطق :سمر تأخرت !
الزين ناظرت له تنطق:ليه وش تبي فيها
مالك تراكى على الباب يناظر للمكان ينطق :ابيها تجيب
لتس عبايه العماله ملّي المكان
طلعت لهم بعباتها وعباة الزين بين يدينها تناظر لمالك تمد له العبايه تنطق بهمس لمالك:الزين بخير تعبانه فيها شي تأذت ؟
ابتسم مالك ينطق :بخير يا قمر زمان جدي لا تأذت ولا شي الحمدلله
ناظرت للسياره تنحجب عنها الروئيه بسبب الظلام تنطق :وينها ؟
مالك التفت للسيارة يناظر للزين يأشر ليمر عليها ينطق :مسرع انعميتي !!
ركزت نظرها تنطق :ياخي الواحد يعني غصب يناظر زين
مد مالك العباية للزين تاخذها تلبسها تنزل من السياره تناظر لمالك اللي نطق لسمر :ويش صار من البدايه
سمر نطقت بهدوء :والله وانا عمتك مدري يعني لو لا الله ثم لين ونبهتنا كان قلبنا دجاج مشوي على الفحم
ضرب كتفها بخفه ينطق بحده :بسم الله عليكم لا تفاولون وبعدين الحريق صغيّر ماهو موذي احد
الزين نطقت :سمر والله دمتس صاير نفط
سمر ناظرت لها تنطق :اي من لقى احبابه نسى اصحابه وبعدين النفط ذا ذهب اسود
مالك لفها يوجهها للبيت سلطان اللي الكل راح له بحكم كبر حجمه :يا ام ذهب اسود تقلّعي لبيت ابوي وراتس صب قهوه لين الفجر
سمر تأففت توخر يده عنها تنطق :ياخي اول مره اشوف ناس حتى على حريق تعزم
مالك نطق بطقطقه :الكرم ذا ماتعرفين سلوم العرب انتِ
هزت راسها بالنفي تنطق:ابك حنا نعلّم الناس سلومنا وانت تراعي اني ما اعرف سلوم العرب اهبي يا وجهك
الزين مسكت يد مالك تنطق :قل اعوذ برب الفلق ،بسم الله طلعت اللهجه صدق
ضحك مالك ينطق :كفو كفو سمر انتِ عن ستين رجال و شقرديه وسنعه وبنت رجال
سمر مشت بخطواتها متجهه لبيت سلطان تنطق بصوت يسمع مالك :غصبن عنك
توسعت عيون مالك يناظر للزين ينطق :متقوّصده هرجها ذي
ضحكت الزين بخفه ترفع اكتافها تنطق : يا حبيبي سمر وتعرف حركاتها يعني المفروض تتعود
دخلها تحت جناحه يمشي بها يم بيت ابوه ينطق :ريحي عمرتس ولا تقومين واجد
رفعت يدها على خشمها تنطق :على نخرتي (خمشي)
قرص مالك خشمها بخفه ينطق :عليه الشحم
وصلها البيت يوصيها على نفسها ،يتوجه هو للرجال يساعدهم باللي باقي جلس بجانب سهم بتعب :صب لي قهوه ما عليك امر
مد له سهم الفنجال ينطق :انت اهلكت عمرك من العشاء لين الحين وانت واقف فوق روس العمّال
تنهد مالك ينطق :العمّال يبي لهم مراقبه والسملق سعود و ريان ماهم يم العمال ابد ان قلت لهم امسكو اللّي تروشو به تقل ورعنه وياسر  ماهو بيمي وسالم حمقي وجدي اهلك عمره
سهم قاطعه ينطق:ابد اجلس وريح والعمال عنده رائد قايم بالمهمه 
جلس سعود بجانبهم ياخذ فنجال قهوة يرتشف من بصوت مزعج ينطق :هذي القهوه اللي تقند الراس
رفع مالك الدله على سعود ينطق :سعود اسكت ولا اذلف زودً على خبالك جاي تزعج
سعود تربع يصر على انه يجلس ينطق :ياخي انت اليوم مره معصب مره مستانس مره منفس ياخي اركد على مود واحد
سهم رفع الفنجال على سعود ينطق بحده :سعيدان دام فيك طاقة هرج رح اغسل الجدران
سعود وقف يتذمر ينطق :الحق علي اني جلست معكم مير انتم منتم بوجيه ينجلس معها اروح لريان ابرك لي
مالك اخذ نفس ينطق :ابرك واسعد
مالك وقف من شاف عمه عبدالاله ابو خالد داخل من البوابه ينطق :ارحب يا عم
ابتسم عبدالاله ينطق :البقى يا مرحب
تقدم مالك يسلم عليه وبعد السوال عن الاحوال نطق عبد الاله :سالمين؟
ابتسم مالك ينطق:سالمين يارب لك الحمد
اخذ نفس عبدالاله ينطق :والله اني جيت متروع وفكني الله بغيت اقلب من دقت علي نورا تصيح
مالك تنهد :الحمد لله على سلامتك يا عم والبنيت ذروقات ،اقلط يا عم الرجال في بيت ابوي
ناظره عبدالاله ينطق:ماوقفتو العزيمه !؟
هز مالك راسه بالنفي ينطق :جدي حلف وننتظر العشاء اقلط يا عمي
اقترب منهم ريان من شاف زول ابوه يحضنه يقبل راسه ويده ينطق :الحمد لله على سلامة الاسفار يبه 
ابتسم عبدالاله يحاوط ولده ينطق :الله يسلمك يابوك اخبارك علومك طيبين كلكم
شد ريان على يد ابوه ينطق :بخير يبه بخير ،انت بخير ؟
رد عليه عبدالاله "بخير"يلتفت ينطق :اخوك خالد وينه ما اشوفه
ريان رفع اكتافه بمعنى ما ادري ،ينطق مالك :راح يودي الصحون للمطعم
تقدمو كل العيال يسلمون على عبدالإله بحكم انهم ما شافوه بالعيد ابداً ولا حتى قبل العيد بسبب اشغاله في الشرقيه ،التفت ريان لأبوه الجالس وسط الناس يسولف مع هذا وهذا ينطق بهمس له:يبه البنات يبّن يسلمّن عليك
هز راسه بايه يكمل حديث مع الرجال ،يجلس ريان بجانب سعود ينطق بملل :انا اقول لابوي البنات يسلمن عليه وهو يصدق يعني ما كأني ابي اكلمه !!
سعود ناظره ينطق بضحكه يكتمها من غضب ريان:وش تبي به ؟
ريان ضيّق عيونه بغيض ينطق :ابي اخطب زين ارتحت يوم عرفت
قرّصه سعود ينطق:اخص يا ريانوه تخطب ولا تعلم رفيقك ماحنا بزاغرينك
-
-صالة الحريم -
جلست سمر بتعب بعد ما انتهت من صب القهوه للمره الالف تقريباً تنطق للمى :هجاد بطونهن قربه ما يشبعن هلكت وانا اصبصب لهن
ضحكت لمى بخفه تكتم ضحكتها من تحولت الانظار لها بسبب هدوء المكان تناظر لسمر اللي تحاول قد ما تقدر ما تضحك ،صدح صوت خالد ينطق :العشاء عند الباب
تاخذ نفس لمى من ابتعدت الانظار عنها تشكر خالد من كل قلبها تنطق لسمر :اي مغير تتحلطمين وانا اكلها
قامت سمر تأشر للبنات يقومون معها تناظر للزين اللي كانت بتقوم تأشر لها بأنها تجلس ،تنهدت الزين تناظر امها اللي تسولف مع حنان والواضح ان الموضوع مهم جداً من حماسهم الواضح بحركات يدينهم ،قامو الحريم للعشاء ،يجلسون البنات ينظفون المكان من الحوسه الخفيفه فيه ،تنطق نورا للمى :ترا ابوي جاء بس يحتري الناس يروحون ويسلم علينا
لمى نزلت فرح من حضنها تنطق : يا قدمي عن ابوي استغفر الله اخر عهدي فيه بشهر ثمانية
نورا نطقت :كلنا وبعدين ابوي مشغول مره يعني بالقوه لقى له وقت يجي وحتى زواج ياسر و لين ما جاء ولا عيّد علينا
التفت رنا تناظر لهم تنطق :ترا حددو زواجي
التفتو لها البنات يناظرون لها ينتظرونها تنطق ،اخذت نفس تنطق :اخر هذا الاسبوع وفي الديره
ابتسمت الزين تنطق :وش ذي الاخبار الحلوه الله يوفقكم يا حبيبتي رنو
سمر تربعت تنطق :يعني نجيب طقاقات ودفوف ؟
نطقت جنى بينما كانت توكل ولدها :يعني نجي من بدري ؟
نطقت سحر بعد ما رمت المنديل في الزباله :تعالو من الظهر يا حبي لتس تجون تشوفون التجهيزات والدنيا
-
-في مجلس الرجال -بعد العشاء
راح اكثر الرجال بعد ما تعشو يبقى القريبين بس او بالاصح ال راكد و سهم وابوه يجلسون في احد زوايا المجلس الكبير بينهم الدلال والقدوع ،ناظر ريان ابوه ينتظر انه يقول بس ابي اسلم على خواتك بس لين الان ما فضى ابداً يتنحنح بخفه ينطق لابوه اللي بجانبه :يبه خواتي يبّن يسلمن عليك
وقف عبدالاله يشرب ما بقى من فنجاله ينطق لريان :ياللا وانا ابوك
ابتسم ريان  يعدل شماغه يطلعون من المجلس يلتفت ريان لابوه ينطق:يبه ابيك بكلمة راس قبل لا تسلم على خواتي
عبدالاله ينطق بجديه  :اسلم وانا ابوك قل اللي عندك
تنحنح ريان ينطق بعجله من امره :ابي اتزوج يبه
ابتسم عبدالاله يضرب ظهر ولده بخفه ينطق :ما بغيت يا ريان بتصك الثلاثين !
ريان ابتسم ينطق:شدعوه يبه حسيتني اني شايب تراني ما عديت الخمسه وعشرين لهلحين
ضحك عبدالاله ينطق :من بنته اللي تبا ؟
ريان عدل وقفته ينطق :رُبى بنت خالي تركي
هز راسه بايه ياخذ نفس ينطق :اللي تشوفه يا بوك مير نفد لي امك وخواتك اسلم عليهن و اشوار امك واللي كاتبه ربك يبا يصير
ابتسم ريان يكتم حلو شعوره يركض لبيت سلطان يطق الباب ينطق بعلو صوته :يمه نورا لمى ابوي يبا يسلم عليكن
توسعت عيون سحر تنطق بغضب :كلن عرف ان ابوك يبا يسلم
التفت على نورا ولمى اللي جالسات بين البنات تنطق :امشن معي ريان ازعج الدنيا كلها
طلعو له ناظر لهم ياخذ نورا بحضنه يدور فيها ينطق بفرح :ابي اعرس يمه
توسعت عيون نورا تضرب كتفه تنطق بغضب :ياخبل نزلني مسكينه تعيسة الحظ فيك
نزلها ينطق بنبرة سخرية:اقول اسكتي الا ياحظها فيني جمال وفلوس وهيبه وطول وش تبا اكثر من كذا 
سحر ناظرت له تنطق:من هي سعيده الحظ اللي تبي تتزوج ولدي حبيبي ريان
ريان تنحنح ينطق بفخر وحب :رُبى بنت خالي تركي
توسعت عيون سحر تنطق :عز الله زين ما اخترت وانا امك
ناظر لها ريان بعد ما كان يناقر نورا ينطق بصدمه :يمه يعني موافقه!
هزت راسها ب ايه تنفجر تضحك من ركض للحوش يتشقلب يطيح شماغه على التراب يصرخ :اخيراً
يناظر لسعود المصدوم يتوجه له يضمه بكل قوته ينطق بفرح :ابي اخذها يا سعيدان ابي اخذها اخيراً صارت لي
سعود ابعده عنه ينطق :مبروك يا حبيبي مبروك
طلع خالد ومالك ورائد وسهم اخرهم من الازعاج الحاصل ينطق خالد :ريان وش اللي حاصل هنيا
ناظرهم ريان يتقدم يحضن خالد بقوه يبادله خالد الحضن ينطق باستغراب :فيك حمى انت ؟تعبان فيك شي ولا شي ؟شارب شي ؟
ضحك رائد من شكل خالد المستغرب جداً ينطق له ريان بفرح :ابي اخطب
توسعت عيون خالد ينزل عقاله يوهم ريان انه راح يضربه ينطق بغضب وهمس :استرجل يا رجال والله لو انها حوريه على ذي الفرحه
نطق ريان بغضب يهمس لخالد :والله انها عندي تسوى الدنيا وما فيها
بعد هذي الحوارات اللي دارت بينهم ورغم ان ما صار اي شي رسمي ولاكن فرحة ريان كانت تعّلم الكل ان اللي كان يحتريه من زمن صار او بالادق بيصير ،ينتصف الليل عليهم يودعون اهل سهم وسهم ايضاً يفضى المجلس من كل الرجال يدخلون البنات ينظفونه يبدلون مكان الدلال والاباريق بفراش لجدهم في وسط المجلس لجل ينام لان الكل راح يتوجه لبيت الشباب زي العاده في المقلط
-
-في جناح مالك -
نزل ثوبه يرميه في سلة الملابس ،يلتفت للزين اللي تنزل اساورها تحطها في صندوق المجوهرات ،تمسح بواقي مكياجها اللي راح اغلبه من الدموع ،ينطق مالك :عساتس ما اجهدتي عمرتس
اخذت بجامتها من الدولاب تبدل تنطق بينما هي تسكر باقي ازار البلوزه :لا والله حتى احس ان البنات حاسين ما خلوني اسوي شي
رفع حجاجه يجلس على السرير ينسدح عدا جزئه العلوي  ينطق :وعساتس كنتي تبين تشتغلين
جلست بجانبه ترتكي على صدره تنطق :لا والله بس كلن الشغل واجد وحبيت اعاونهن
قبل راسها يده على بطنها ويده الاخرى تحاوط كفها ينطق :ان كانتس تغليني وتحبيني يالزين امانه معتس لا تشغلين نفستس
شدت على كفه اللي على بطنها تنطق :اي والله اني احبك واغليك وابشر على خشمي ماني بمشغله نفسي
ناظرت له تنطق :مالك متى نعلمهم ؟
مالك ابتسم من تخيل ردة فعل ال راكد من يبلغهم ينطق :متى ما تبين انتِ انا معتس
اخذت نفس تناظر لكفه اللي بكفها وعلى بطنها يحتضنون جنينهم بداخل احشاءها تبتسم تحس بقبلاته على راسها بين الثانيه و الاخرى تعرف انها محاطه بكمية حنانه وحب ،تغط بنومها يقبل راسها يعدل نومتها بحيث تصير تنام على ذراعه يحتضن بطنها يقبل عنقها يغرق هو بنومه مثلها ينتهي يومهم على خير رغم وجود بعض العوائق،ينتظرون حلو الايام المقبله عليهم رغم كثر الضغط على مالك من كل جهه وخوفه المفرط على الزين
-
تمر الايام بحلوها يمر اسبوع بلمح البصر اسبوع كان يعج بتجهيزات زواج سهم ورنا وعقد قران ريان و رُبى والفرحه اللي تعج من ريان بعد ما سمع موافقة رُبى كان وده وكثير الوده انه يحطها بين احضانه بس يعرف ان الوقت اللي يجمعه معها قريب وجداً بعد
-صباح زواج سهم ورنا-
الكل في ساحات الديره يجمعون العمال والشباب لجل يركبون بيوت الشعّر ،التفت ياسر ينفجر ضحك من شاف سعود رابط ثوبه متلثم بشماغه يحمل مع احد الشباب الرواق ينطق ياسر :قواكم الله ياشباب
سالم التفت لياسر يناظره فاضي ما عنده شي ابداً ينطق له:ياسر تعال عندي هنيّا
توجهه له ياسر ينطق :وش تبا ؟عندي اشغال الدنيا
سالم ناظر له بتعجب ينطق :وش هي الاشغال يا الكذوب لك ساعه واقف وقواكم الله قولكم الله امش معي نبا نجيب الحطب عند الحلال
ياسر نزل عمامته من على راسه يحطها على كتوفه
ينطق: واجد الحطب ؟اجيب ريان و سعود يعاوننا
سالم هز راسه بايه يتوجه ياسر لهم يناديهم يتوجهون لددسن يركبون ياسر وسالم في الغماره الاماميه و سعود وريان في الصندوق بسبب وجود اسطوانات الغاز فس المرتبه الخلفيه،ينطق سعود بينما هو متلثم عن الهواء الحار اللي يضرب في وجيههم :الحين ابا اسألك حنا حاسبينا خرفان ولا وش كل مره وحنا في الصندوق
ناظره ريان ما يسمع بوضوح بسبب صوت الهواء ينطق بعلو صوته :هاه
رفس سعود جنب ريان ينطق بصوت اعلى :هويت من الددسن قل امين
ريان رفسه بقوه اكبر من رفست سعود له ينطق :امين على الداعين اذلف لا اطشك من الصندوق وترجع متحرول
ضغط سالم الفرامل يخرج راسه من الدريشه ينطق بعلو صوته:يا الديكه انثبرو لو لفيت وطحت انت وياه ماني بفاضي اجرجركم يم المستشفيات
سعود وقف يناظر له ينطق يحده:اعوذ بالله فال الله ولا فالك اهب يا وجهك !
كملو طريقهم متوجهين للحلال يوقفون عند الكنتيره ينادي سالم العامل ينطق :يا راجي الحطب جيبه
طلع راجي يناظر لهم ينطق بعربيه متقنه :تعال انت وياه انا ما اشيل شي عمي راكد قاله
زفر سعود ينطق:ياخي ماهو بداري تعال عاوننا ما حنا بمجانين بنشيل مية كيلو حطب 
تذمر راجي يتحلطم بصوت عالي بكلام ما يفهمونه ينطق ياسر :ذا يسبنا ياعيال !!
ناظر سالم لراجي ينطق لياسر :طنش يا ولد اهم شي نحّمل ذا الحطب
ابتداء العيال يحمّلون الحطب يركبونه بالصندوق بكميات ضخمة دليل على ضخامة الزواج اللي يبي يصير في الديره
-
-بيت راكد -
رجعو ال راكد لبيتهم بعد ما انتهو العمال من التعديلات والكهرب يرجع كل شي زي ماكان واحسن بعد ،تزفر سمر بتعب بينما كانت ترتب علب الماء اللي مكتوب عليها عبارات ترحيبه وبالاسفل "رنا&سهم" تصفها بجانب بعض تدخل رُبى تحمل بين يدينها صندوق كبير يضاعف حجمها مرات كثيره تنزله برفق على البلاط تنطق:الحلويات وصلت باقي الفطاير والموالح و استقبال العشاء
التفت لمى لرُبى تشوف انها لين الان ببجامتها تنطق :ابوك يا البرود ملكتتس العصر ولين ذبحين ما تجهزتي
جلست رُبى بجانب سمر تناظر العلب تاخذ وجده تفتحها وتشربها تنطق :العصر قلتيها وحنا الحين الضحى يعني تونا وبعدين ما تبوني اعاونكم 
كشت عليها لمى تنطق :اماه بس البنيت يخجلن ولا يطلعن من غرفتهن وانتِ تفرفرين في كل البيت
رُبى انفجرت تضحك اخذت نفس تنطق :وراتس قلبتي امي عمشه
دخلت الزين تناظر لهم تبتسم تجلس على الكرسي تنطق :رُبى عطيني مويا
مدت لها رُبى الماء تنطق :انتِ بخير وجهك اصفر
اكلتي شي
هزت راسها بايه تنطق :اكلت بس اليوم تعبانه شوي
لمى ناظرت لها توقف تتوجه لها تنطق :الزين قومي معي
ناظرت لها الزين تستغرب طلبها تقوم معها تنطق لمى بعد ما طلعو من المطبخ :الزين تشكين انتس حامل ؟لان تعبتس مو تعب عادي ابداً
ابتسمت الزين تنطق :هو انا اصلاً حامل الاسبوع اللي فات عرفت
ضحكت لمى تضمها بكل ما عندها تنطق بفرح يشابه فرحة العيد :ياربي لك الحمد اللي عيشنا ذي اللحظه الله يتمم لتس على خير يا ووحي انتِ
حاوطتها الزين تدمع عيونها تنطق :امين يا حبيبتي انتِ بس هاه خليه بيني وبينتس انتِ خربتي المفاجاة وانا هليت السبحه