Blue Diary ( Echo of My Blue )

9. Untitled, 2019-2020

၂၀၁၉ ခုနှစ်၊ ဇူလိုင်လကုန်။

" DID ဖြစ်စဉ်မှာ ယေဘုယျအားဖြင့်တော့ သူတို့တွေကို alters ( ပြောင်းလဲမှု၊ တစ်နည်းအားဖြင့် ကိုယ်ခွဲ ) လို့ ခေါ်တယ်။ မင်းကိုတော့ Host ( မူရင်း တည်ရှိမှု သို့မဟုတ် လက်ခံသူ ) လို့ ခွဲခြားသတ်မှတ်ရမှာပေါ့ "

ဒေါက်တာ ကင်မ်ဂျီအွန်းထံသို့ သည်လမှာလည်း ထပ်ရောက်လာခဲ့ပြန်ပါပြီ။ ကျောင်းနားရက်တွေမှာ ဆေးခန်းကို ခပ်စိပ်စိပ်လာထားပြီး ကုသမှု ခံယူဖြစ်သည်။ ကုသမှုဆိုသည်မှာ ဆန်းဆန်းပြားပြားတော့မဟုတ်လှ။ ဤဖြစ်စဉ်တစ်ခုလုံးနှင့် ပတ်သက်ပြီး အသေးစိတ် ဆွေးနွေးဖြစ်ကြခြင်းပါပင်။

ဒေါက်တာက သူ ဘာကြောင့် ယခုလို ကိုယ်ခွဲတွေ ပေါ်လာရသလဲ ဆိုသည့် အဦးအစကို ရှာဖွေနေသည်။ သို့မှသာ ဘယ်လို ကိုင်တွယ်ဖြေရှင်းရမလဲကို သေချာ သိနိုင်မည်တဲ့လေ။

ဂယူကတော့ ဒေါက်တာ့စကားကို နားထောင်ပြီး ပေးသမျှဆေးတွေ မှန်မှန်သောက်သည်။ မေးသမျှ ဖြေပေးသည်။ မှတ်မိသမျှ ပြောပြသည်။ ဒါဟာ လူနာတစ်ယောက်နေရာက ဆောင်ရွက်ရသော သူ့တာဝန်တွေ ဖြစ်သည်။ တစ်နေ့ထက်တစ်နေ့ မည်သူ ဖြစ်သွားမည်မှန်း မသဲကွဲသော အခြေအနေကြီးကနေ တစ်ရက်ထက် စော၍ဖြစ်ဖြစ် လွတ်မြောက်ခွင့်ရချင်ပါပြီလေ။

" Dissociative Identity Disorder အခြေအနေက case တစ်ခုနဲ့တစ်ခုအပေါ် မူတည်ပြီး ပုံစံမတူကြဘူး။ လက္ခဏာပြပုံတွေ၊ ကိုယ်ခွဲတွေနဲ့ ထိတွေ့ခံစားရပုံတွေက တစ်သမတ်တည်းရယ်လို့ မရှိတတ်ဘူး။ Patient တစ်ယောက်မှာ system တစ်ခုလုံး ကွဲပြားနိုင်တယ်။ အများစု ဖြစ်ရတဲ့အကြောင်းအရင်းကလည်း စိတ်ထိခိုက်စရာအကြောင်းအရာတစ်ခု သို့မဟုတ် အများအပြားကို ငယ်ငယ်က ကြုံခဲ့တဲ့အတွက်ကြောင့်ပါ။

ကျွန်တော် အခုထိ တွေ့ရှိထားသမျှက ဂယူဘင်းဆီမှာ Alters ( split personalities ) နှစ်ခုတည်းပါပဲ။ တစ်ယောက်က Gin .. တစ်ယောက်က Ken "

ဒေါက်တာ ကင်မ်ဂျီအွန်း၏ သီးသန့်လူနာအဖြစ် တိတ်တဆိတ် ကုသမှု ခံယူနေရသည်မှာ တစ်နှစ်ကျော်ခဲ့လေပြီ။ ဒေါက်တာက အတော်လေး စိတ်ရှည်သူ ဖြစ်သည်။ အသက်ငယ်ပေမဲ့ ဤနယ်ပယ်တွင် အတွေ့အကြုံမနည်းလှပေ။ နာမည်တစ်ခုရှိနှင့်ပြီးသား ပါမောက္ခတစ်ဦးလည်း ဖြစ်လေသည်ကိုး။