Blue Diary ( Echo of My Blue )

7. Ghost

၂၀၁၈ ခုနှစ်၊ ဧပြီလကုန်။

အရေးကြီး လက်ချာချိန်ပြီးသည်နှင့် ပရော်ဖက်ဆာထက်အရင် စာသင်ခန်းထဲက ထွက်လာခဲ့သူက ဂယူဘင်းရယ်သာ။ ယနေ့တော့ သမိုင်းပေးတာဝန်လေးကို ထမ်းဆောင်ဖို့ နည်းနည်းပင် နောက်ကျနေခဲ့ပြီမို့ သူများထက် အလျင်စလို ပြုနေရသည်။

လက်ချာတန်းမှ ထွက်လာပြီး ကားရပ်ထားသော နေရာသို့ နောက်မှ ကျားလိုက်သလို ပြေးနေသည့်သူ့အား အနီးတစ်ဝိုက်မှ ကျောင်းသားတွေက ကွက်ကြည့်ကွက်ကြည့်ရယ်ပင်။ သို့သော် ဂယူကတော့ ဂရုမစိုက်အားခဲ့ပေ။ ယနေ့က ယူဂျင်း နေပြန်ကောင်းပြီး ကျောင်းပြန်တက်သောနေ့မို့ မျက်နှာလေး ဖြစ်ဖြစ် မြင်ရအောင် ကျောင်းဆင်းချိန်အမီ သွားကြိုစောင့်နေမှ ဖြစ်မည်လေ။

ယူဂျင်းတစ်ယောက် မိုးရေထဲတွင် တစ်ကိုယ်လုံး အေးစက်နေပြီး သူ့ရင်ခွင်၌ ပြိုလဲကျသွားခဲ့သော အဲသည်နေ့ညကို တစ်သက်လုံး မေ့လို့ရမည်မဟုတ်ချေ။ အကျိုးဆက်ကြောင့် ကောင်လေးဟာ သုံးရက်ခန့် ဆေးရုံတက်လိုက်ရပြီး တစ်ပတ်ဝန်းကျင် အိမ်တွင် အနားယူလိုက်ရသည်။ အန်ကယ်နှင့်အန်တီကလည်း ကလေးကျန်းမာရေးထက် ဘာကိုမှ စိတ်ထဲမထားတော့ဘဲ ယူဂျင်းအဆင်ပြေရာကို ဂရုစိုက်ဖို့သာ တွေးထားပုံရသည်။

ယခုတော့ ခပ်စိပ်စိပ် စီစဉ်ထားသော အချိန်ဇယားတွေကို အန်ကယ်က ဖြည်းဖြည်းစီ ပြန်လျှော့ထားခဲ့ပြီဟု သိရ၍ တော်ပါသေး၏။ ကောင်လေး ထိုမျှ စိတ်ပင်ပန်းခဲ့မှန်းသာ သိခဲ့မည်ဆို သူက တစ်ထောင့်တစ်နေရာကဖြစ်ဖြစ် အားပေးနှစ်သိမ့်ပေးခဲ့မိမှာသေချာသည်။ ပြန်တွေးတိုင်း တနုံ့နုံ့နှင့် ထိုမျှ အသုံးမကျခဲ့ရသလားဟု ကိုယ့်ကိုယ်ကိုယ် ဒေါသထွက်နေဆဲပင်။

ထိုနေ့အပြီးမှာ ယူဂျင်းက သူ့ စိတ်ထဲတွင် အရင်ကထက်ပိုလို့တောင် နေရာယူလာခဲ့သလို ခံစားရသည်။ မေမေ့မျက်စိအောက်မှာ အရာရာကို ချုပ်တည်းထားရပေမဲ့ အဲသည်လို ဟန်ဆောင်ပြီး တမင် လျစ်လျူရှုနေရသည်ကိုလည်း တဖြည်းဖြည်း စိတ်ကုန်လာသည်။

' ကျေးဇူးပြုပြီး ကျွန်တော့်ဘေးကနေ ပျောက်ကွယ်မသွားပါနဲ့လား '