Blue Diary ( Echo of My Blue )

10. To the Bone

၂၀၂၀ ခုနှစ်၊ ဩဂုတ်လ ၃၀ ရက်။

ည ၉ နာရီ။

သူ နိုးလာတော့ မရင်းနှီးသော မျက်နှာကျက်က မြင်လွှာတွင် အရင်ဆုံး ပေါ်လာသည်။ အရောင်ငြိမ်ငြိမ်နှင့် ခေတ်ဆန်သော အလှမီးလုံးသည် သူ မျက်လုံးတည့်တည့်ရှိ အမြင့်နေရာတွင် တွဲလောင်းကျနေပါသည်။

" နိုးလာပြီလား ဂယူဘင်း "

ဒေါက်တာ .. ဒေါက်တာ ကင်မ်ဂျီအွန်းပါလား။ အနှီလူသည် သူရှိနေသော နေရာမှ အတန်ဝေးသော ဆိုဖာခုံပေါ်တွင် လက်ပိုက်ကာ သည်ဘက်သို့ ငေးကြည့်နေလေ၏။

" မင်း ကိုယ့်ကို သိလား "

ဒေါက်တာက မျက်ခုံးများကို တွန့်ကုပ်ကာ ခပ်ဆတ်ဆတ်လှမ်းမေးလာသည်။

" အစ်ကို .. ကျွန်တော် ဒီကို ဘယ်လိုလုပ် ရောက်နေတာလဲ "

သူ အံ့ဩထိတ်လန့်စွာ ပြန်ဖြေလိုက်သည်ကို ကြားခါမှ ဒေါက်တာဟာ စိတ်အေးသွားဟန်ဖြင့် သူ့အိပ်နေသော ကုတင်ရှိရာဆီသို့ တိုးလာသည်။

" မင်း ကိုယ့်ဆီ ရောက်လာတာ .. အမ်း .. မင်းတော့ မဟုတ်ဘူး။ မင်းရဲ့ alter ကိုယ့်ဆီ ရောက်လာတာ "

အိပ်ရာမှနိုးလာခါစလို လေးပင်နေသော မျက်လုံးတွေကို ကြိုးစားဖွင့်ရင်း လှဲနေရာမှ ထထိုင်ဖို့ တွေးလိုက်သည်။ ကုတင်စောင်းကို အားပြုကာ ကိုယ့်ကိုယ်ကိုယ် ထူ,ဖို့ ပြင်ခါမှ ညာဘက်လက်ဖမိုးတွင် ဖျဉ်းခနဲ ခံစားလိုက်ရသော နာကျင်မှုဟာ ဦးနှောက်ကို အလုအယက် သတင်းပို့လိုက်သလို စူးနင့်စွာ။

" ဘာတွေ ဖြစ်သွားတာလဲ အစ်ကို။ Ken ရောက်လာခဲ့တာလား .. သူ အစ်ကို့ကို တစ်ခုခုများ လုပ်သွားသေးလား "

" Gin ရောက်လာတာ ဂယူဘင်း .. ကိုယ် ဘာမှ မဖြစ်ပါဘူး၊ ဒါပေမဲ့ "

သူ ကုတင်ပေါ်တွင် ကုန်းရုန်းထထိုင်လိုက်စဉ်တွင် မြင်လိုက်ရသော မြင်ကွင်းကြောင့် မှင်သက်သွားခဲ့သည်။ သတိထားကြည့်မိတော့ သူ အိပ်ပျော်နေခဲ့သော နေရာဟာ ကုတင်တစ်လုံးပေါ်တွင် မဟုတ်ခဲ့လေဘူးပဲ။ သူဟာ ဆန့်အိပ်နိုင်သော ကုလားထိုင်တစ်ခုပေါ်တွင် ရောက်နေခဲ့ခြင်းသာဖြစ်သည်။