Blue Diary ( Echo of My Blue )

4. Daylight

၂၀၁၅ ခုနှစ်၊ နွေဦး။

" သူ ပြန်ရောက်လာပြီဆိုတော့ ရှင်က ဘာဖြစ်ချင်နေတာလဲ။ ကျွန်မအဖေ ဆုံးတာတောင် တစ်နှစ် မပြည့်ချင်သေးဘူး .. ချက်ချင်းကိုပဲ ဇာတိက ပြလာပြီနော် "

" မင်းလေသံကို လျှော့လိုက် အီမီရာ၊ ဒီအိမ်မှာ ငါတို့ပဲ ရှိတာမဟုတ်ဘူး။ သားလည်း ရှိသေးတယ် "

" မလျှော့နိုင်ဘူး၊ ဘာကိစ္စနဲ့ လျှော့ရမှာလဲ။ ရှင့်အကြောင်းကို သူ သိလည်း သိသင့်တာပဲ။ အလကား .. အိမ်ထောင်ရေးဖောက်ပြန်ချင်နေတဲ့ယောက်ျား "

" မင်း ငါ့ကို ဘာလို့ အသားလွတ် စွပ်စွဲနေရတာလဲ။ ငါက မိတ်ဆွေတစ်ယောက်အနေနဲ့တောင် သူ့ကို လေဆိပ်သွားကြိုခွင့်မရှိတော့ဘူးလား။ မင်း ယုံတာ၊ မယုံတာတွေ ငါ ဂရုမစိုက်ဘူး။ ဒါပေမဲ့ ငါ အတပ် ပြောနိုင်တာက သူလည်းပဲ ကိုရီးယားကို သူ့မိသားစုကိစ္စနဲ့သူ ပြန်လာတာ .. ငါလည်းပဲ သူ နိုင်ငံခြားကို ထွက်သွားပြီးကတည်းက၊ နှစ်ဖက်မိဘရှေ့မှာ မင်းရဲ့ ယောက်ျားအဖြစ် တစ်သက်လုံး ပေါင်းသင်းနေထိုင်ပါမယ်လို့ ကတိပေးပြီးကတည်းက၊ ငါ့ဘဝထဲကို သား ရောက်လာပြီးကတည်းက မင်းအပေါ် သစ္စာမပျက်အောင် စောင့်ထိန်းခဲ့ပြီးသားပဲ။ ဒါကိုမှ မယုံကြည်နိုင်သေးရင်တော့ မင်းအပိုင်းဖြစ်နေပြီ။ ငါ့မှာ ဆက်ပြောစရာ ဘာမှမရှိတော့ဘူး။ မင်းက ဘာတွေကို အခုထိ မကျေနပ်နိုင်သေးတာလဲ အီမီရာ .. ငါ ဘာထပ်လုပ်ပေးရအုံးမှာလဲ "

MP3 ကို အသံအကျယ်ဆုံး ဖွင့်ထားကာ တွေ့ကရာ သီချင်းတစ်ပုဒ်ဖွင့်နားထောင်နေမိပါသော်လည်း ဆက်တိုက်ကြားနေရသေးသည့် အပြင်မှ ဆူညံသံများကြောင့် ဂယူ နားကြပ်ကို ကြမ်းတမ်းစွာ ဆွဲဖြုတ်လိုက်သည်။ တစ်ဆက်တည်းမှာပင် စာကို အာရုံစိုက်မရတော့သည့်အဆုံး၊ စာကြည့်စားပွဲမှ ထကာ စိတ်ရှုပ်စရာကောင်းလှသော သည်အိမ်ကြီးမှ ခဏတာ ရှောင်ထွက်ဖို့သာ တွေးမိတော့၏။

" အဲတာကိုပဲ မကျေနပ်တာ .. ကျွန်မအပေါ် သစ္စာမပျက်ရတဲ့ အကြောင်းအရင်းမှာ ကျွန်မဆိုတဲ့ 'အီမီရာ' ပါမနေတာကိုပဲ မကျေနပ်တာ။ ရှင့်အတွက် ကလေးတစ်ယောက်လုံး မွေးထုတ်ထားပေးတဲ့ ကျွန်မအပေါ်ကို လုံးဝ အကြင်နာတရားမရှိတဲ့ ရှင့်ကို မကျေနပ်တာ .. အများအမြင်မှာ ရှင့်ကိုယ်ဝန်ကို ဆောင်ပြီး ရှင်နဲ့ တရားဝင် လက်ထပ်ထားတဲ့ ဇနီးမယားဖြစ်တဲ့ ကျွန်မကို ရှင် ဘယ်တုန်းကမှ မေတ္တာမရှိခဲ့တာကြောင့် မကျေနပ်တာ။ အခု ကျွန်မပြောပြီလေ .. ရှင် သိသွားပြီမလား၊ နားလည်သွားပြီမလား။ ဒါဆို ဘာလုပ်ပေးမှာလဲ "