Blue Diary ( Echo of My Blue )

5. Like A Dream

၂၀၁၇ ခုနှစ်၊ ဆောင်းဦး။

တစ်နှစ်ဆိုသော အချိန်ဟာ ပြောစမှတ်တွင်ရလောက်အောင် ကြာညောင်းသော အချိန်တော့ မဟုတ်ခဲ့။ ပထမဆုံး နှင်းကျချိန် ဖြစ်သည့် ဆောင်းဦးကို ရောက်လာခိုက်မှာ လွန်ခဲ့သော၂၀၁၆ ခုနှစ်က ဆောင်းညတစ်ညကို ယူဂျင်းဟာ ရုတ်တရက် သတိရလိုက်သည်။

တစ်နှစ်ဟာ တိုတောင်းသလို ထင်ရသော်လည်း ပြောင်းလဲမှုတွေကိုတော့ သယ်ဆောင်နိုင်စွမ်းရှိခဲ့သည်။ လူသားတို့သည် တစ်နှစ်ထက်တစ်နှစ် အဘက်ဘက်မှ ပြောင်းလဲနေမြဲ ဖြစ်ပါသည်။ ငယ်တုန်းကတော့ အမှတ်တမဲ့ဖြစ်ခဲ့ပေမဲ့ အရွယ်ရောက်လာသည်နှင့်အမျှ ကိုယ် သတိမထားမိခဲ့သော အရာအားလုံးကလည်း အမှတ်တရ ဖြစ်လာတတ်သည်ဟု ဆိုရမလိုပေါ့။

အမှတ်တရတွေထဲမှ အခိုင်မာဆုံး အမှတ်တရဟာ ကိုကို နှင့် သူ အတူတူ ကြီးပြင်းလာခဲ့သော အချိန်တွေကိုပါပင်။

သူသည်လည်း ၁၁ နှစ် အရွယ် မူလတန်း ကျောင်းသား အဖြစ်မှသည် ၁၇ နှစ်အရွယ် အထက်တန်း ဒုတိယနှစ် ကျောင်းသား ဟန်ယူဂျင်း အဖြစ်သို့ ကြီးပြင်းလာသကဲ့သို့ တစ်ချိန်တစ်ခါက ၁၄ နှစ်ပြည့်ခါစ အလယ်တန်းကျောင်းသားလေး ကင်မ်ဂယူဘင်း ဖြစ်ခဲ့သော ကိုကိုသည် ယခုတော့ အသက် ၂၀ အရွယ် တက္ကသိုလ် ပထမနှစ် ဘွဲ့ကြိုကျောင်းသားတစ်ယောက်အဖြစ်သို့ ပြောင်းလဲလာခဲ့ချေပြီ။

မူလတန်းကျောင်းသားနှင့် အလယ်တန်းကျောင်းသားတို့၏ ဘဝနှစ်ခုဟာ ထိုမျှ ကွာခြားချက် မရှိခဲ့ချေ။ အလယ်တန်းကျောင်းသားနှင့် အထက်တန်းကျောင်းသားနှစ်ယောက် ကြားမှာလည်း ခြားနားချက် ကြီးကြီးမားမားရှိသည်ဟု မခံစားခဲ့ရပေ။ သို့သော် အထက်တန်းကျောင်းသား နှင့် တက္ကသိုလ်ကျောင်းသားတို့၏ ကြားတွင်တော့ မမြင်ရသော ကွဲပြားချက်တွေ ရှိလာခဲ့သလိုပင်။

ကိုကိုဟာ သူ့မျက်လုံးထဲမှာတော့ အမြဲတမ်း ရင့်ကျက်ပြီး ထက်မြတ်သူတစ်ယောက် ဖြစ်ခဲ့ပါသည်။ ယခုအထိလည်း ကိုကိုဟာ ဉာဏ်ကောင်းပြီး လူကြီးဆန်သောလူတစ်ယောက် ဖြစ်နေမြဲပါလေ။ ဒါဖြင့် ယူဂျင်းအတွက် ထူးခြားနေတာက ဘာများ ဖြစ်လိမ့်မလဲ။ တက္ကသိုလ် ဆိုသော ပတ်ဝန်းကျင်ဟာ ကိုကို့အပေါ်မှာ ဘယ်လိုနေရာတွေကနေ သက်ရောက်မှု ရှိခဲ့လေသလဲ။