Blue Diary ( Echo of My Blue )

8. Hold Me Back

၂၀၁၉ ခုနှစ်၊ ဇွန်လ ၁၉ရက်။

" ညနေတော့ မိုးရွာတော့မယ်နဲ့တူတယ်။ မိုးအေးအေးမှာ ငိုက်မနေကြနဲ့အုံးနော် ကလေးတွေ .. "

ဗိသုကာမေဂျာ ကျောင်းသားတစ်ယောက်၏ဘဝက ထင်သလောက်မလွယ်လှပေ။ ၂၄ နာရီပါဝင်သော တစ်နေ့တာ၌ အိပ်ချိန်မကျန်သည့် နေ့စဉ်အချိန်ဇယားတွင် အဖျက်သမားတစ်ယောက်က ရုတ်တရက်ဝင်လာတတ်ပြီး ညဘက် ဘားထိုင်၊ ကလပ်တက် လုပ်နေလေတော့ ဂယူ့မှာ အပိုအလိုမရှိ ကွက်တိဖြစ်နေသော စာလုပ်ချိန်တွေကို မနည်းညီမျှအောင် ပြန်ညှိနေရသော အဖြစ်သို့ရောက်နေ၏။

" ဂယူဘင်း Assignment deadline မီလား "

" အင်း .. မီအောင် လုပ်ရတာပေါ့။ တော်သေးတယ် .. deadline တစ်နာရီလားပဲ လိုတော့တာ "

" ဆရာကြီးပဲကွာ .. ဟိုးနေ့ကအထိ စီနီယာတစ်ယောက်ပို့စ်မှာ ကလပ်ထဲရောက်နေတဲ့ မင်းကို မြင်တော့တောင် ငါတို့ အံ့ဩနေတာ။ နှစ်ညအတွင်း ဘယ်လိုများ လုပ်လိုက်တာလဲ။ ဘယ်လိုချီးကျူးရမှန်းကို မသိဘူး။ လေးရက်လောက် ကုန်းရုန်းလုပ်နေတဲ့ ငါတို့တောင် deadline နာရီဝက်အလိုမှ ပြေးတင်ရတယ် "

ဂယူဘင်းက သိသိသာသာ ညိုမဲနေသော မျက်တွင်းချိုင့်များနှင့် ဟင်းခနဲ ပြုံးပြလိုက်သောအခါ ထိုသူငယ်ချင်းသည် လန့်သွားရာမှ ထရယ်သည်။ ပရောဂျက်အတူလုပ်နေကျ အဖွဲ့ထဲမှ ကျောင်းသားတွေက ဂယူ့ကို ကျောင်းစာ လိုက်နိုင်ပြီး စိတ်လွတ်လက်လွတ် ပျော်နိုင်သူ အဖြစ်မြင်ကြသည်။ ထို့ကြောင့်လည်း အားကျနေကြ၏။

လက်တွေ့မှာတော့ သူ ရင်ဆိုင်နေရသော ဒုက္ခတွေကို မည်သူမှ မမြင်နိုင်ခဲ့ပေ။ ဤတစ်ပတ်လုံးမှာ အိပ်စက်ရသော အချိန်က ၁၀ နာရီပင် ပြည့်သလား မသေချာခဲ့ပါ။ ထို့အပြင် ဘယ်အချိန်မှာ ဘယ်လို ပြောင်းလဲသွားမလဲမသိသော ကိုယ့်စိတ်ကိုယ် မစိုးမရတတ်၍ သူများထက်ပို စာကြိုလုပ်ထားရသည်။

ထို့နည်းတူစွာပင် တစ်ညတာလုံး၏ မှတ်ဉာဏ်တွေ ပျောက်သွားပြီး နိုးလာတတ်သော နောက်နေ့မနက်ခင်းများတွင်လည်း တစ်ကိုယ်လုံး နာကျင်ကိုက်ခဲတတ်သော ဝေဒနာ၊ ခေါင်းကိုက်ဝေဒနာ၊ ဘဏ်ထဲမှ ပိုက်ဆံတွေ ညတွင်းချင်း ဝုန်းခနဲ ပျောက်သွားရသော ပြဿနာများနှင့် အသီးသီး ရင်ဆိုင်ရသေး၏။