ကျောက်စိမ်းပင်လယ်နားသို့နီးလာလေ လေထုကပိုမိုနွေးထွေးပြီးဆားနံ့သင်းပျံ့လာလေလေပင်။
မြူ ကားပြတင်းမှခေါင်းထုတ်လိုက်တော့ လတ်ဆတ်သောလေနုအေးကမြူ့ဆံနွယ်များကိုဆွဲဖွကျီစယ်ပြီး
မျက်နှာနုနုကိုညင်သာစွာထိတွေ့သွား၏။
"ကျောက်စိမ်းပင်လယ်..........ရို့ရို့......ကျောက်စိမ်းပင်လယ်....."
ဝီရက ကျောက်စိမ်းပင်လယ်ကိုသီချင်းလုပ်ဆိုနေသည်။
ကားပေါ်မှာဝီရ၏သီချင်းသံကျယ်ကျယ်မှတစ်ပါး တိတ်ဆိတ်နေ၏။ခါတိုင်းသုံးယောက်သားခရီးထွက်ကြလျှင် ဘယ်တော့မှငြိမ်သက်နေရိုးထုံးစံမရှိ။နှစ်သက်ရာ
သီချင်းတွေကိုတစ်ယောက်တစ်ပေါက်အော်ဆိုကြမည်။
လမ်းတွင်တွေ့သမျှကိုအတူစူးစမ်းထင်မြင်ချက်ထုတ်ကြသည်။ပါလာသည့်မုန့်တွေကိုလုစားကြသည်။ဝီရက
ကားပေါ်မှာ ဆယ်လ်ဖီတဖျပ်ဖျပ်ဆွဲမည်။သူရာက
ခရီးအစီအစဉ်တွေကို အသေးစိတ်သေချာရှင်းလင်းပြနေမည်။
ခုတော့ ကားပေါ်မှာကျောက်ရုပ်လေးသုံးရုပ်ချထားသည့်အလား။ဤကား အမောင်ဝီရ၏ပယောပပါပင်။မြူက
ရေသူထီးအကြောင်းကိုပြောမပြခဲ့၍ ကိုယ်တော်ချောက
စိတ်ဆိုးတော်မူလေသည်။သူငယ်ချင်းတွေကို ဒီလောက်ကိစ္စအကြီးကြီးလျှို့ဝှက်ထားသည်ဟုဆိုကာ မခေါ်မပြောလုပ်သည်။ဝီရမှာစိတ်သာဆိုးရသော်လည်း
မြူကသူစိတ်ဆိုးတာကိုဂရုမပြုမှာ ပြန်အချော့မခံရမှာကလည်းကြောက်သေးသည်။ထို့ကြောင့် သူရာ့ကိုပါ
မင်းလည်းသူ့ကိုစကားမပြောနဲ့ဟု စစ်ကူခေါ်ထား၍
သူရာ့မှာကားစထွက်ကတည်းက မြူ့ကိုစကားတစ်လုံးပြောဖို့မဆိုနှင့် တစ်ချက်လေးတောင်မကြည့်ရရှာပေ။
မုဒ္ဒ မြူ့ကိုပေးခဲ့သောခရုခွံလေးက မြူနှင့်မုဒ္ဒအကြား
ဆက်သွယ်ရေးကိရိယာလေးဖြစ်ခဲ့သည်။မြူ မုဒ္ဒကို
လွမ်းတိုင်း ခရုခွံလေးကိုဖွင့်ကြည့်မိသည်။ထိုအခါမျိုးတွင် စိမ်းလဲ့လဲ့ပင်လယ်ရောင်အလင်းသည် ပတ်ဝန်းကျင်သို့ပျံ့နှံ့သွားလျက် ထိုအလင်းရောင်ထဲတွင် မြူ့ကိုကိုကို ရေသူထီးတစ်ဉီးအသွင်ဖြင့် မြင်ရတတ်သည်။
ကိုကို၏ဆံနွယ်နက်များက ရေထဲတွင်ဝဲဖြာနေတတ်ကာ
ဗလာကျင်းသောကိုယ်အပေါ်ပိုင်းသည် ကျောက်သလင်းလိုကြည်လင်သောအသားအရေနှင့်
ကျယ်ပြန့်သောရင်အုပ် တောင့်တင်းသောကြွက်သားများကြောင့် မြူအခါခါငေးကြည့်မိရသည်အထိ။အလင်းလဲ့လဲ့ထက်တွင်မြင်ရသောကိုကိုသည် ငွေရောင်မျက်လုံးများနှင့်မြူ့ကိုအကြည့်မလွှဲစတမ်းကြည့်ကာ
မြူပြောသမျှကို ငြိမ်သက်နားထောင်နေတတ်သည်။
တစ်ခါတစ်ရံတွင် ရေသူများအကြောင်းမေးမိသောအခါ
ကိုကို့အသံသည် ဂန္တဝင်ကဗျာတစ်ပုဒ်ကိုရွတ်သလို
ဆွတ်ပျံ့လှိုက်မောဖွယ်ကောင်းနေတတ်၏။
YOU ARE READING
ကျောက်စိမ်းပင်လယ်မှမြူခိုးပုံပြင်
Fantasyမြူခိုးတွေမှိုင်းဝေနေတဲ့နေ့မှာမွေးဖွားလာတဲ့ ရေသူတိုင်းပြည်ရဲ့မင်းသားလေး မြူခိုးမှိုင်း ကျောက်စိမ်းပင်လယ်ရဲ့မြူခိုးလေးလို့တောင် တင်စားကြတဲ့မင်းသားလေးဟာ ရေသူတွေ ကျောက်စိမ်းပင်လယ်ကြီးကိုအုပ်စိုးနိုင်အောင် လုပ်ပေးခဲ့တဲ့သူလည်းဖြစ်တယ် ကျောက်စိမ်းပင်လယ်တစ်...
