قدري و نصيبي

part2👁️

رانا نعاودو نولو لدار فوزية قاعدين فوق الطابلة يستقهواو فوزية ريم و ٱيلا بو لسان طويل مع وحدة زيادة وهذيك خت أيلا الوسطانية وهذيك لسانها كثر من ختها مالغري صغيرة بصح محاينها كبار انا نقوللكم

ايلا :فصعونة كاش مخصك قريب الدخلة تاع ليكول وعندك باك هذا العام حطي راسك

^ اللولة دانا مشي فصعونة .... الدوزيام و ايه حابة نشري حوايج غاع صحاباتي راح يدخلو بلبسة جديدة ^

ايلا : خلاص هاذو اليامات نخرج معاك نشري لختي

دانا : صحيتي ختيتو ومعليش ماني راني خارجة مع هند

فيروزة : شحال من خطرة قلتلك لالا مكاش خرجات ياك قريب القرايا تتلاقاو

ريم : يما خلي الطفلة تعيش راهي خارجة مع طفلة مشي طفل حبيتي تحبسيها الفاكونس طول قاعدة في الدار روحي دانا متسمعيش لفيروزة تعرفيها

دانا : صحيتي خالتو راني رايحة نحبك ماني

راحت دانا باست مانها في راسها وخرجت

فيروزة : ٱيلا ضك كيفاه تشريلها حوايج لختك ياك عمبالك ياربي اذا خلصنا التريسيتي و الغاز

ٱيلا : متخميش بقاولي دراهم لابورس مصرفتهمش

ريم : انا راني نخمم نبدل وين راني نخدم مراهمش يخلصو مليح

ٱيلا : اممم وانا راني نحوس على خدمة هذا العام دانا تسحق دير ليكور مرانيش باغية تخصها كاش عفسة

فيروزة :ربي يجيب الخير يالبنات خلونا نفرزو الحالة حفيظة راهي جاية

ايلا قلبت وجها

ٱيلا :ثاني هذيك المرا شحال منحملهاش مروماركيتوهاش جي تعمر القرع وتروح

احممم هذي صايرة كيما انا

ريما : المرا كبيرة واش دارتلك ... نتي كامل متحبيهومش زعما حنا كيفاه تحبينا معمباليش

ٱيلا : شكون قال نحبكم راني نستنا برك mon mari يبان يجي يلمني عليكم طول

فيروزة : احشمي هذي هدرة تقوليها

ٱيلا : معليش العجوز خلاص غير زعافك لي منحملوش ضك راني خارجة مع
صابرين

ريم : طوالو رجليك ... وين بيها البارح برك كنتي تدوري برا

ٱيلا : ياودي ماشي كيف كيف البارح خرجت نحي على خاطري اليوم راني خارجة بيسك صابرين وقيل لقاتلي خدمة

فيروزة : خلاص امالا روحي نشالله تصدق هذي الخطرة وتتقبلي

ايلا خلاتهم دخلت شومبرتها بدلت حوايجها زعما لبست جيب جين طويلة فيها شلقة متفوتش الركبة مع قمجة فولار بيضة زادت عليها جيلي مع باسكات بيضة بدات تسقم في هذوك الشعرات خرجت تهبل بقات الطفلة غايسة في المراية تشوف في روحها ومنكذبش مام انا غست معاها مراحش نزيد عليها نقوللكم زين تاع الخارج مام زين تاع بلادي يهبل كانت سامبل عينين كبار يلمعو نوازات بشرتها كاين لي يقول بيضة ولي يقول حنطية اما شعرها حكاية رطب حرير كون نقعد نهدر على زينها متسكتونيش لغدوا صبح ملامحها زعما كالم يخلوك متعيايش منهم و يخي حالة انا مزالني نشوف في المرايا معاها حتى وين راحت وخلاتني وين راه الاحترام و التربية رحت نجري موراها نشوف وين رايحة بلا بيا دات طريق لوحد restaurant قعدت تستنى حتى شفتها ناضت عند وحدة تعنق فيها وعاودو قعدو وتأمنو بربي والله غير كاين منها المقولة ميكونو صحابات حتى تكون وحدة محجبة ولوخرة سيفيليزي ووحدة طويلة وصحبتها قصيرة هههه

ٱيلا : كيراكي ياطفلة توحشناك

صابرين : عمبالك الخدمة

ٱيلا : اممم نقولو امنتك ... كاش خبار نتي وميسيو رائد

صابرين : اوف ... واش نقلك .. تسيبارينا في سمانة

ٱيلا : ياعمري قولي والله ... احمم قصدي ياحفيظ غير الخير ضاربتو كيما موالف
... باينة يامات راح تعاودو تولو

صابرين : no no ... خلاص ديسيديت .. هنا la fin تاعي معاه واذا سييت نعاود نوليلو اضربيني بكف

ٱيلا : راني هنا منضربكش غير كف اذا حبيتي عشرة ديجا مكانش يعجبني كامل كنت باغية نقولك خفت تزعفي ... ونتوما بصح عليمن تضاربتو

صابرين : كنا نهدرو نورمال امبعد جبدتلو ...  على سيرة الخطبة السيد تبدل وبدا يعرش وقالي راكي ديريلي la prision

ياعمري بدات تبكي غاضتني حبيت نكرفصو هذا السيد راحت ٱيلا عنقتها في بلاصتي تسكتها

ٱيلا : خلاص شششش ميستاهلش تلقاي خير منو مراحش تخلاص الدنيا عندو راني معاك انا بلقيس ثاني مشي على جال راجل كيما هذاك تبكي وهو ضك وقيل مزالو راقد هاني في راسو

مسحت دموعها

صابرين : عمبالي ... اه راني نبكي بيسك عام راح من حياتي .. خدعني قالي نخطبك نتزوجو ... امبعد 

عاودت المسكينة تبكي

ٱيلا : خلاص متبكيش ... الرخيس يخلصها غالية وتشوفي

صابرين : ربي يشوفني فيه نهار ... يحكمو الجرب ان شاء الله

ضحكت أيلا

أيلا : يعطيك غمة هههه ... امسحي دموعك ضك حبيتي يضحك عليك كون يشوفك

شافت فيها صابرين هدرت بالعقل

صابرين : اممم ... Mode strong woman

ٱيلا : هذي هيا لي نعرفها ... ارواحي امشي نحي على خاطرك

راحو وانا موراهم صابرين سكتت مسكينة ربي يكتبلها وليد الحلال لي تستاهلو ادعولها وانا نخدم خدمتي ههه ... كملو نهارهم بالضحك وٱيلا راح تولي تخدم في bibliothèque مليحة خير من والو وولات الاميرة للدار .....