لـم ننتـه بعـد [ تكـملة ]

زيـف الهــوى أم لعــنة القصــاص _ الفصـل 45_

________________________ أمريــــكا 🇺🇸_

#بــــعد_مـــرور_ســـاعــــات ⬅️⬅️

واقف ساند بظهرو على الطوموبيل يستنى فيها ، وفي نفس الوقت يحكي في التيليفون مع رئيس المنظمة...
مـاثيو : ماشي مشكل انـا نتصرف ، راح نستقبلهم بنفسي ونشرف على توقيع الصفقة بنفسي انت خليك مرتاح..
ر . المنظمة : نعتمد عليك مـاثيو ، هذي صفقة كبيرة ومش حابين نخسروها وفي نفس الوقت مش حابين نخسرو صداقة الاثنين ، ينفعونا مع بعض..
مـاثيو : ولو أني للآن مستغرب علاش اصر البورجي على حظور فيـڨو ، مي كيما قلت احنا فايدتنا في الصفقة ..
ر. المنظمة : صحيت .. هذا هو الأهم الشيء الثاني مايهمناش ..

غير قطع المكالمـة سمع صوت طـالونها دور وجهو تقابـلو عينيه معاها نازلة وتتمايل بخصرها ، بفستانها الوردي القصير وبوشات صغيرة في يدها ، شعرها مفرود وماكياج خفيف جدا زايدها سر ..
تبسـم ابتسامة عريضة من مظهـرها وقرب ناحيتها وصلت لعندو تبسمتلو : طولت شوية !!.
شدلها يدها وباسها من بعد خزرلهـا : طولي كيما تحبي كل حاجة تستناك ..[ رجع ورا متبسم ] طلعتي بزااف شابة [ تبسمت ، قرب لوجها ] محظوظ بيك ..
تبسمت : ههه وترتني .. خلاص اسكت ..

ضحكت من بعد جمعت ضحكتها وتنهدت : هففف الصراحة مـاثـيو ماعلاباليش علاش مانيش مرتاحة بزاف لهذا العشـا ؟!
عوج راسو وجاوبها : نهـاااد ..!! قلتلك هذا عشـاء عمـل يحضرولو غير شركائنا يعني ماراحش يحضروا البراهش الي متعودة تلقايهم في الكازينو ..
نهــاد : هييه عارفة ومع ذلك متوترة ..
تبسـم : عـادي برك خاطش ماكيش موالفة ضورك توالفي .. هي كاين حل خلاف اذا يساعدك ؟!
نهــاد : واش هو !!؟
قرب لوجهـا يحكي بهمس : نشوف واحدة اخرى ترافقني في مكانك بصح مانظمنلكش ليلتي وين نكملها...
صغرت عينيها فيها وضرباتو لصدرو : حقييير .. [ ضحك ] حااب نق...تلك يااك !!

ضحك ومدلها ذراعو كبشت يدهـا فيه وتوجهوا للطومو مع بعض فتحلها الباب الي من جيهتها طلعت وطلع من جيهتو وتوجهـوا للفندق وين راح يقام عشاء العمـل ...

#بـــعـد_مـــــــــــدة ⬅️⬅️

وصلوا للفنـدق دخلـوا وتوجهوا مبـاشرة لجيهة مكاتب الاجتماعات الي راح يجتمعوا فيها ...
مـاثيو : راح نحكي مع ادارة الفندق .. [ شاف فيها ] كاين مكان خاص بالانتظار نروحو ليه استنايني فيه ثواني ونرجع ..
هزتلو نهـاد راسها : اووكي بصح ماتطولش مانحبش نبقى وحدي ..
تبسملها : لا مانطولش ...

في نفس المكـان كانوا في المكتب الي جنبها والي كانت جدرانو الداخلية مميزة بكونها من زجاج بحيث تتيحلك تشوف الي رايح وجاي في الخارج ...

صونا تيليفونها ، جبداتو من البـوشات ، شافت شكون المتصل وحكات ...
ريـفا: عن اذنكم ..

توجهت للبـاب خرجت ، غلقتها وراها وردت : ووي... جبتلي المعلومات !!!