لـم ننتـه بعـد [ تكـملة ]

زيـف الهــوى أم لعــنة القصــاص _الفصـل 48_

بعدما قطعت على يحيى ، وخبراتو بموافقتها هي و خوها ظـافر على الخطبة ، دخلت للدريسينغ تغير ثيابها وتوجد نفسها للخطبة ، عارفة اذا مانزلتش راح يكثر القيل والقال خصوصا انو امها مش موجودة ، فالأحسن تشد مكانها ، وغير هذا مش حابة تبـان أمامو وكأنها مهتمة لخطبتو أو مستاءة...

أما بخصوص يحيى ، فصحيح مازال ماخبرتش ظافر بموافقتها ، وماعلابالهاش اساسا اذا راح يوافقو عيلتها عليه ، لكن هي متأكدة مدام قالها راح نحكي معاهم ونجرب نقنعهم فراح يقنعهم بما انها هي موافقة ، وهكذا تتزوج يحيى احسن الف مرة من انها تروح ضرة لواحد ، حتى ولو كانت تحبو ...

✨ في نفس المكـان الي دايما يكون المهرب نتاعو والمتنفس ليه في مسطحتو الجبلية ، قاعد على الأرض ، طاوي رجليه وحاط يديه عليهم ، قارورة مشروبو أمامو ، من وقت للثاني يحتسي منها ويردها لمكانها ..

يشوف للبعـيد وعقلو فيها وموضوع خطبتها ، مش قادر يفكر كمجرد احتمال انو ممكن يخسرها ، بالرغم كلشي قام بيه للآن ومازال يقوم بيه ، بارادتو وماهوش نادم عليه لأنو أساسا علجالها هي ، ومع ذلك خوف كبيـر في قلبو اول مرة يحس بيه انو تكون هذي الخطوة بداية للندم...

رجع صونا تيليفونو ، جبدو شاف شكون المتصل عدا يدو على شعرو ورد بصوت تاعب نوعا ما : ووي ظـافر

ظـافر : من نيتك زااكي؟! الدنيا مقلبة هنا عليك وانت ماكش ؟! ماتفاهمناش ماتتأخرش وعلى ساعة تكون هنا !
زكريـا :  ربع ساعة نكون عندك
ظـافر : ربع ساعة قلتلي؟! اووكي عندك خمس دقـايق في يدك نلقاك هنا ،  الامـام هنا يستنى من ساعة وكلشي واجد والعريس ماكش ..
استدار براسو للجيهة الثانية منزعج ورد : اووك ولد العم هاني جاي ..

قطع عليه وخباه ، شد قارورتو كمل احتسى الي فيها في مرة  ووقف ، رماها لنقطة بعيدة ورجع ادراجو ، ركب طوموبيلتو وتوجه للقصر مباشرة ...

في القصــــر _  بعـــد لحـــــــــــــــــظات ⬅️⬅️ _

في الحديقة ، في جليسة موجدينها ومجهزينها خصيصا لهذا المناسبة ، كراسي مستفين بشكل بيضوي وقاعدين فيها كبار رجال العشـيرتين ....
قرب ليهم ظـافر بعدما قطع مع زكريـا ، وتفقد الامور ورجع شاف في الامام : شوية ويكون هنا ..

هزلو الامـام راسو مجاوبو : ان شاء الله خير ولدي..

قرب ليه أحمد وهمسلو : حكيت معاه ؟!

دور ظـافر وجهو مكره وشاف فيه يحكي بهمس هو ايضا : اقسسم بالله راك اكثر من المصـاغر اصبر شبيك ؟! نكملو موضوع زكريا ومن بعد نحكي معاه ..

أحمـد : وعلاش مانفروهاش ضربة واحدة مدام الامام هنا ؟!
لوا ظـافر شفايفو بانزعاج وجاوبو : لازم نحكي مع زكريـا قبل ،  ماجياش تتزوج بيماه وهو مش عارف