لـم ننتـه بعـد [ تكـملة ]

زيـف الهــوى أم لعــنة القصــاص _ الفصل 42 _

بقى يحيى في الفيـلا ماعدا مـاكس الي راح للقصر تحت طلب فـاروق وفي نفس الوقت بعد الاحداث الي صرات يحاول يقدم خدماتو ويوقف جنبهم خصوصا في غياب ايـاس ...

بعدمـا حكى مع ريـلام قطع عليها و دخل للفيـلا وتوجه مباشرة للمطبخ وين كانت منـال توجد في فطور صحي ليهم الكل وللمريض خاصة تحت طلبو هو ..

توجد في الفطور و تبكي وهي تخمم في اخر محادثة بينها وبين جيـلان ، وفي العواقب الي تستنى فيها خصوصا اذا سمع زكريـا ..
مع دخل سمع شهقتها حمحم غير سمعت صوتو مسحت دموعها بسرعة ودارت ليه مهبطة راسها باستحياء تحاول تخبي وجها وحكات ..
منـال : احم اسمحلي ماحسيتش بيك وانت داخل..
قرب ليها يحيى : ماعليش ماشي مشكل .. الفطور واجد ؟؟
منـال : ربع ساعة ويكون واجـد..
هزلـها راسو بالايجاب : اوك صحيتي .. وقت يوجد وصليه للمريض علبالك لازمو فطور باش يشد روحو ..
هزتلو راسها : غير يوجد نخبرك..

دار خارج وهي دارت باش تكمل شغلها و بعد تردد شديد وقف رجع شاف فيها : كانك كنتي تبكي؟!؟

حطت يدها على فمها تحاول تشد بكيتها مش قادرة تضبط دموعها ، رجع قرب ليها يديه على خصرو وحكى : علاش راكي تبكي؟! [سكت ثواني ونطق ] خفتي!!؟
دارت ليه منـال وردت ببحة باكية : شوية ..
يحيى : ندمتي؟!؟ [هزت راسها بايه ببطىء] علاش ؟! يرضيك يبقاو عباد عايشين في غفلة ومخدوعين وانتي قادرة تفيقيهم؟؟
مـنال تحكي وتبكي : مايرضينيش بصح العشيرة هذي بالذات مايرحموش فيها ..انت ماتعرفهمش كيفي ، عشت مدة معاهم ونعرفهم ، نتخيل اذا سمع بيا زكريا راح يذ..بحني اكيد ، واذا سمع بيا الاغـا نفس الشي راح يقت..لني .. اهيء اهيء .. خايفة جيلان تخبرهم اكيد راح يقت.لوني اهيء اهيء

يحيـى : نهار جيتي هنا و حكيتي لاياس وعدك راح يحميك و ايـاس عند كلمتو .. راكي تحت حمايتنا ماعندكش واش تخاافي نهائيا هنا في الفيلا مستحيل يقربو ليك ولا يلحقوك .. ومالازمش تندمي على الخطوة الي درتيها اليوم لانها راح دير فرق كبير في حياة بزاااف عبـاد ..

مسحت دموعها وخزرتلو : صح عندك الحق ، ميرسي بزااف ريحتني بكلامك ..

تبسملها : نروح نطمن على المريض وانتي كي يكمل الفطور اذا ممكن وصليهلو ..

هزت راسها : حااضر ..

خرج متوجه لغرفتو وين كان متسطح المصاب وهي كملت توجد الفطور باش تديهلو ..

دخل للغرفـة لقـاه بدا يحـاول يفتح عينيه قرب لعندو وحط يدو على كتفو : بلعقل برك ماتفورصيش على روحك ..
ردلـو بصوت تاعب : المـااء !!
فرغ يحـيى كاس ماء وعاونو يشربو بعدها رجع تسطح في مكانو راخي جسمـو ..
رد يحيى الكاس لمكانو ورجع ليه : شوية ويلحق الفطور .. لازم تاكل باش تهز صحتك ..
دور راسو ببطىء وشاف فيه وحكى بصوت واهن : وين راني ؟؟
يحيى : عند ايـاس البورجي ..