أزر

شلونكم قلبوشاتي اليوم راح نبلش بسرد روايتنا الجديدة واحب انوه انو هاي الرواية جريئة نوعا ما ف الي مايعجبها هيج نوع من الروايات لاتدخل وتقرأ ... خلي ندون تاريخ بداية سرد الرواية هو الاحد المصادف 2024/6/23. نتوكل علئ الله ونبلش
*********
أزر ....
البارت (1)
..................................................
طفولة مسلوبة سعادة منعدمة ولاتوجد في قاموس حياتي....  أمان حتئ مااعرف شلون صاير طفولة وحياة مضطهدة حرمان من اعز ماتملك الي هي امك ... عذاب زوجة الأب تفرقة الأب بين اولاده عذاب جسدي ونفسي ورغما عنك لازم ترضئ وتكمل حياتك أب مايعرف الرحمة حرمني من احضان أمـي وحنانها حتئ يكسرها بية رغم انو هي تحملت من أبوية الي مايستحق حتئ لقب الاب .. اتحملت انواع العذاب حتئ بس تكون بجانبي .. دائما أسئل نفسي واني طفل أبن الستة أعوام ليش أبوية هيج يسوي بأمـي دائما نفس السؤال الي ماالكة الـه اجابة دائما .. حتئ وصلت بي جاب علئ امي ضـرة بس امي ضلت متحملة كل العذاب وبدا العذاب عذابين لأمي الي اشوفها گدامي تتأذة وتنهان حتئ بليل اسمع بجيها بدون مااحسسها انو دااسمعها ... شنو بيدي واني طفل لاحول ولاقوة وضلت زوجة ابوية تاذي امي بگل الطرق جنت اتهجم عليها لان مااقبل على امي هيج يصير وياها بس دائما نهاية المطاف يجي الي مايتسمئ الي على اساس ابوية يعذبني انواع العذاب بعد ماتحرضة ست الحسن يصفئ بية نهاية اليوم المليان عذاب وضرب وقهر بين احضان تلك الملاك الصابر وهي تمسد علئ جروحي ومكانات الضرب وعيونها كلهن دموع وقهر ... سمية ... ياماما ليش هيج اسوي وتدري كلش زين يرجعون عليك ويأذوك ويكسرون گلبي بيك ...أدم .. أمـي لاتبجين فدوة والله اني مااتحمل اشوفج هيج .. أمي خلي نمشي منا ونروح لمكان بعيد عنهم ونعيش وحدنا واني اشتغل واعيشج .. سمية .... وهي تمسح بدموعها وتبتسم من كلام ادم ... اني ليش متحملة ياروح امك غير حتئ اشد حيلك وتصير رجال سبع وتتفوق بدراستك حتئ اكول عندي رجال وانسند علية من ضيم الدنيا .. اهم شي اصير شاطر بدروسك حتئ ارفع راسي بيك وتواجه الدنيا كلها ونطلع منا اني وياك .. أدم .. اوعدج ياامـي راح احتم بدراستي واكملها واصير رجال تشدين ضهرج بية وكلهم القنهم درس واندمهم علئ كل دمعة نزلت من عيونج ... مرت الاشهر وانوار زوجة ابوية جابت ولد سمتة ضافر .. كلش فرحت لان صار عندي أخ رغم انو زوجة ابوية ابد موزينة لاوياي ولا وياامي....  كل عمر أدم  كان ستة سنوات بس تحسة زلمة لان سمية مربيتة تربية حلوة مهذب بالكلام جميل المضهر .... بعد ولادة ضافر انوار تفرعنت اكثر واكثر وبدت تسبب مشاكل لأ أدم وأمـة وتخلي مسعود يأذيهم ثنينهم ..
بعد مرور سنتين ...
انوار جابت مرة ثانية وهل المرة جابت بنت اسمها مسك ... هنا ادم صار عمرة 8 سنوات صف ثالث ابتدائي ... امة معتنية بي وبدراستة رغم انو انوار ذابة گلشي براسها مسويتها خدامة بحجة هية عدها جهال ثنين وماتلحك عليهم ... الئ ان اجة ذاك اليوم المشؤم .. انوار سوت مشكلة لأمي جبيرة بحيث ابوية جنزها اجنز هو اصلا يتلذلذ بضربها مااعرف ليش .. بحيث من الضرب صار وجها مايبين من الدم ... ركضت شمرت روحي فوكاها اريد احمي امي بذاك العمر الصغير والجسم الهزيل بحيث ضربة بية وضربة بيها لأحد ماتعب جاب عباتها وشمرها عليها وسحلها سحل واني اركض وراهم ماحسيت غير انسحبت من ايدي .. انوار الشيطانة سحبتني من ايدي واني اصرخ أريد امي شمرتني بالغرفة وقفلت الباب علية ادك بالباب واصيح محد يرد علية صوتي اجرح من الصياح ولااحد يجاوبني وكأنو تتلذلذ انوار بعذابي وصريخي ... مسعود ... هاي اختك ربيها اصلا بعد ماتصيرلي مرة .. حارث ... غير نفتهم شنو الصار وليش هيج مسوي بيها ...
مسعود ... والله خلي هي تحجيلك ...وخلا ومشئ ... حارث .. خوية سمية شنو الصاير غير افتهم .. سمية ... بشهكات والله ياخوية ماادري اني مامسوية شي اني مثل الخدامة عايشة هناك المصبرني هو ابني أدم متحملة ضيم مسعود ومرتة وساكتة شتتوقع اسوي ...حارث ... هيج لحالة والله راح اتخبل ...سمية .. مادري ياخوية اني انضلمت كافي تعبت لهنا حدي اريد ابني وكلشي ماريد منة ..حارث ... لاتبجين خوية اني باجر رايح وجايب ابنج ورجعة لبيت مسعود بعد ماكو ...