بسم الله
هز راسه بالنفي : لا والله جايين نطلب الصلح والقرب
لفو كلهم يبلعون ريقهم بصدمه وابتسم بدر يجلس بجانب سعود اللي طاير من الحماس
ذياب بعقدة حجاج : مين تبون؟ ولمن؟
ابتسم سليمان يسكت يترك بدر اللي يتكلم
واردف بدر بصوته الرجولي وبصوت جهور : جينا اليوم طالبين القرب منكم لولدي سعود
ولف يشوف الاستغراب بوجيههم وابتسم يكمل ويلف لرماح : لبنتك
لفو كلهم لرماح اللي اشار على نفسه : بنتي؟
هز راسه : وانت تدري يا رماح بسعود رجل اعمال وابد ماديته زينه وراتبه كذالك زين
هز راسه يبتسم : ادري ادري والنعم فيه وابد
لف لسعود يكمل ويعيد كلامه اللي قاله ذيك الليله اللي ساعد فيها ديم : مابلقى لبنتي مثل سعود
ابتسم سعود من تذكر هذا الكلام وهز راسه
واكمل رماح: انا موافق و...
لف لابوه وهز راسه ذياب يبتسم
اكمل رماح يلف عليهم : والقائد موافق بس الشور شورها
هزو روسهم يبتسمون وسعود ميت من الفرح وكل فراشاته تطير بوناسه وحماس
...............
سكتت تسمعهم
وسمعت شذى اللي اردفت : بنات عرفت اسمه سعود
لفت عليهم تعقد حجاجها
واردفت سديم : قصدك ذاك الحلو؟
هزو روسهم ورصت على اسنانها بقهر تسمع مديحهم لسعود
ميسم : بنات يجنن يوم دخل اول واحد
مسكت ريما كتفها تهزها : يارب اجعله من نصيبي
اغمضت عيونها بقهر ودفت الطاوله برجلها وانكسرت بيالات الشاهي حقتهم ولفو عليها وبلعت ريقها تشوفهم سكتو ويناظرونها
وهمست بكذب: بالغلط
هزو روسهم مستغربين ووقفت فاطمه تنظفه وهي تهمس لديم : عادي ياديم
هزت راسها وسكتت تناظر للارض وابتسمت بخفه من ماسمعت لهم صوت دليل سكوتهم
...............
اذان الظهر
ووقف سليمان : الله لايهينكم ويسعدكم يارب
وقف ذياب : كملوها وتعشو معنا وخلونا نصلي الجماعه مع بعض
هز راسه يبتسم : يالله نصلي سوا
همس سياف لـ فراس : افرش الفرشات برا بالعرض
هز راسه وركض وشافه خالد ومشى له بسرعه وجاب الفراشات فراش وابتسم خالد يتقدم يساعده وكل واحد مسك جهه وخلصو ينفضون يدهم وجو الرجاجيل يصطفون
سليمان : ذياب انت الامام يالله
ابتسم يهز راسه ووقف بالامام واصطف الكل في صف واحد وكبر ذياب يعلن بداية الصلاه
بعد ماسلمو
ذياب : اقعدو معنا وتعشو
هز راسه بالنفي يبتسم : لا والله به اشغال والحريم بالمزرعه لحالهم
هز راسه بتفهم ومشو يخرجون بصحبة العيال وخرجو يدخلون مزرعتهم وركض سعود لنجلاء يمسك كتوفها ويهزها بسرعه وقوه : خطبتها خطبتها خطبتها
ضحكت نجلاء من حماسه وتأوهت بالم : تكفى فكني عورتني
ضحك يفكها ويفك ازرار ثوبه : يالله لك الحمد
ضحكت نجلاء تصوره وهو يسجد شكر ووقف يرقص من شديد حماسه وارسلته ستريك كاتبه عليه
" لا بس خطب اللي يبيها "
...........
خرجو الحريم والكل يجتمعون بالخيمه
العنود : شبلاهم ؟
ابتسمو كلهم يناظرون لديم اللي تلونت ملامحها بالخجل ماتدري كيف تبعد الشكوك
وهمست : شصاير؟
ابتسم ذياب يلف للعنود : ابد طاح الحطب وتنازلو عن الثار وخطبو ديم
شهقو بسرعه ولفو لديم اللي جالسه بجانب البنات
واردف رماح يحضنها من جنب كتفها : عاد ماخطبها الا اللي ابيه لها
سكتو ينتظرون قوله وابتسمت تسمعه يقول : سعود ولد بدر
لفت بسرعه تشوف البنات اللي باين عليهم الصدمه وضحكت بخفوت ولفت لابوها تهز راسها وقبل راسها سعود : فكري انتي والراي رايك مابتدخل ولا بغصبك
هزت راسها توقف وتخرج من شديد خجلها على نظراتهم لها
همست شذى : بنات كثير عليها!
ضربتها سديم على كتفها بخفه : خير الله يبارك لهم وش اللي كثير عليها؟ بالعكس احس لايقين
ابتسمت ريما : ماتوقعت بس ديم وسعود؟ الله !
صرخت عهود بحماس : اوف اخيرآ مناسبه ابي اكشخ
صدت بخجل من شافت فرحتهم
ميسم بحماس : يلا متى نختار الفساتين ؟
شذى : هيه هيه انتظري باقي البنت ما وافقت
سديم بسرعه : تخيلي ترفضه؟ بموت بدالها
ضحكو عليها
عهود : اصبرو على البنت مو كذا بسرعه
هزو روسهم وابتسم رماح يرفع نظره للسقف يتحمد الله
............
سكرت الباب وهي مازالت تمثل الهدوء وقفلته وكتمت صرختها : ييسس
شهقت تمسك قلبها من شافت اللي جالس على السرير ينتظرها : سعود شتسوي هنا؟
ضحك بخفه يوقف : مستانسه؟
هزت راسها تبتسم
وتقدم يحضنها وهو مغمض عيونه
وعقدت حجاجها: شفيك
هز راسه بالنفي وهو يستنشق ريحة عطرها اللي تهلكه وهمس بهمس مليئ بالحنيه والحب : ماتدرين ايش كثر فراشاتي اللي طايره انصب علينا الفرج واخيرا بتصيرين حلالي بتصيرين حرمي حرم سعود بيصير اسمك مرتبط باسمي!
ابتسمت من شديد مشاعرها اللي اجتاحتها
واكمل يهمس : حاولت وحاولت وتعبت بس تعبت وحاولت على شي يستاهل ومره قويت وصبرت عشانك وش يصبرني الحين لين الزواج والملكه؟
ابتسمت بخفه تبعده وابتعد ومسكة ياقة ثوبه تعدلها وهي تهمس : صبرت شهور تقدر تصبر شهور زياده
ابتسم يهز راسه بالنفي: بتجننيني ياديم
ضحكت بخفه تحط كفوفها على صدره تبعده : يلا روح الين يجيكم الرد اصبر اصبر
ضحك بعلو وحطت كفوفها على ثغره تسكته : سعود قصر صوتك
ابتسم يقبل باطن كفها اللي على ثغره وجمدت ملامحها تشيل يدها وتناظر له
واردف : يعني اني مادري بالاجابه ؟ ادري بتوافقين
ضحكت بخفه : مره واثق ماتدري يمكن ارفض
وسع عيونه بصدمه: تعقبين !
ضحكت من شكله ورفعت اكتافها : ماتدري سعود يلا روح تشوفني وقت الرد ولازم اثقل عشان الشكوك
ضحك بخفه واردفت بتذكر وضربته على كتفه بقوتها ووسع عيونه : خير؟
كشرت تتكتف وتصد : ليه دخلت بسرعه؟
عقد حجاجه: كيف يعني ؟
ناظرته بقهر : شافوك البنات وجلسو يمدحون فيك
ابتسم بوسع ثغره: وغرتي؟
وسعت عيونها بصدمه وضربته على صدره بخفه : لاطبعآ
ضحك سعود بشده وكشرت تدري انها مفضوحه واردفت : حتى انت تغار يوم ضربت حمد!
اكمل يزيد ضحك وهمس : ودخلته العنايه بعد
ضحكت بخفه : يلا روح عشان مايشوفك احد
ابتسم بخفه من شكلها اللي يعجبه واخذ نفس تنعس عيونه وهو يتاملها فركت يدينها بتوتر وصدت
تهمس : سعود
اخذ نفس يهمس بنفس همسها : عيونه؟
ابتسمت بخجل وفهم هو يخرج
.............
فتحت عيونها تشوف فاطمه اللي تطق الباب وفزت تفتحه : سمي؟
عقدت حجاجها فاطمه : من امس وانتي هنا امشي
هزت راسها : جايه
سكرت الباب ودخلت تتروش وتخرج تترطب وتتعطر ووقفت تشوف شعرها بالمرايا وابتسمت بخفوت ولبست عبايتها وحطت طرحتها وخرجت تدخل الخيمه ومشت تجلس تشوفهم يفطرون
واردفت ميسم : ها ديم وافقتي ولالا؟
ضحكت بخفه من ضربتها سديم بخفه : اصبري توها انخطبت !
شذى بهمس : عاد ماتوقع بترفض ذا المزيون
صدو البنات بتعب منها
ورفعت اكتافها : والله حسافه راح علي
رصت على اسنانها بقهر وتكتفت تناظر ابوها واردفت بغضب : ابوي انا موافقه
لفو عليها كلهم ولانت ملامحها من شافت ذهولهم وابتسمت باحراج
ووقف رماح بحماس يهز راسه : الحين اعطيه الموافقه
ابتسمت بوسع ثغرها وجاها خوف وتوتر وهمست في نفسها : ديمي ياديمي عادي لاتتوترين
ومشت كانت بتخرج بس رجعها صوت ذياب اللي اردف : امشي افطري مافطرتي !
لفت تبتسم وتهز راسها وتجلس معهم وبدت تفطر دقايق ووقفت تنفض يدها من نظرات شذى توترت وكثير من نظراتها وخرجت تبلع ريقها وكانت بتدخل البيت واوقفها صوت شذى اللي اردفت : ادري انك وافقتي بذا السرعه عشاني قلت انه مزيون
لفت تعقد حجاجها: يعني؟
شذى رفعت اكتافها : مدري بس استغربت سرعتك وعصبيتك عشاني مدحته
هزت راسها وكانت بتمشي ولانت ملامحها تسمع شذى اللي اردفت : تحبينه؟
لفت تبتسم واردفت بكذب: انا وسعود؟ بيننا الايام تحببنا بعض
ومشت تترك شذى ودخلت تتنفس بسرعه من شديد توترها
...............
فتح عيونه وصرخ بغضب : نعم ؟ ترا مانمت زين اذلفو!
جمد وجه نجلاء تناظر ابوها اللي
اردف : انقلع الشره مو عليك على اللي جاي يعلمك بالموافقه!
فز سعود بسرعه : وشو؟ وافقت؟
ضحكو كلهم
واردفت حصه بضحكه: قم قم حدد موعد الملكه ياعريس
ضحك بعلو وهو يفرك عيونه : يعني خلاص بصير عريس؟
نجلاء بسخريه : لا العروسه اخلص قم
ضحك يضربها بخفه : ابلعي لسانك يابنت
ابتسم يناظر ابوه ويبي يجيب الشيخ اليوم من شديد حماسه بس اردف بعدم معرفه : مدري اشوف وارد لكم بكره
هزو روسهم وخرجو من غرفته ولفت نجلاء اللي كانت بتخرج اخر وحده وسمعت سعود اللي اردف بعدم تصديق : نجلاء يعني فتره و تصير حرمي؟
ضحكت نجلاء : ان شاءالله شرايك انت؟
ابتسم بوسع ثغره يفز من السرير يرقص بوناسه ونجلاء تطبل له على الطاوله وهو مستانس وضحكت بخفه تخرج ودخل يتروش ويلبس ثوبه وينزل لهم وريحة عطره تسبقه
ومشى يقبل راس امه وابوه : انا طالع بخلص اشغال وارجع
هز راسه بدر : انتبه على نفسك
هز راسه يخرج وركب سيارته يمسك خط لديره
..............
جالسه على سريرها بتعب ومسحت على وجهها بضيق ودخل رماح يشوفها وابتسم بخفه يتقدم يحضنها وبكت تشد عليه
وهمست : بيصير لديم اخو ولا اخت؟
هز راسه بضحكه : يالله لك الحمد! قدك بالشهر الثالث يا فاطمه مو مستوعبه
ابتعدت عن حضنه وهمست وهي تفرك يدينها ببعض بخوف : علمت احد؟
هز راسه بالنفي وهو يبتسم : الود ودي اعلم الكل بس انتي طلبتي اخبي ذا الفتره
هزت راسها: نعلمهم؟
ابتسم يقبل راسها : نعلمهم هيا
وقفت معه وخرجو يشوفون ديم اللي تاكل ايسكريم وخارجه من الغرفه
وضحك رماح بخفه : تعالي انتي اول وحده لازم تدرين
عقدت حجاجها تتقدم تشوف رماح اللي حاضن فاطمه من كتوفها : شفيكم؟
هز راسه بالنفي يلف لفاطمه اللي نزلت راسها وضحك بخفوت : بعد ٦ شهور بيجيك اخو ولا اخت
شهقت تغطي ثغرها وتلف على فاطمه الخجلانه وضحكت تحضن فاطمه بسرعه : مبروك يمه مبروك !
ضحك رماح يبعد ديم عن فاطمه : شوي شوي على امك
تخصرت ديم : لحظه لحظه تقول لي ٦ شهور؟ يعني مخبين عني ٣ شهور؟
هزو روسهم
وعرفت ان امها طلبت لانها ماتبي احد يدري الحين
واردفت بحماس : انا ابي اسميه
ضحك رماح يحضنها : اكيد
ناظرته فاطمه توسع عيونها وضربته على كتفه بخفه : هيه انت وياها تراه من بطني انا!
ضحكو من اردف رماح : ومن دمي انا بعد!
صدت فاطمه بخجل وضحكت ديم بشده
وهزت فاطمه راسها بوعيد : هين ياديم هين الدنيا دواره
اكملت تضحك ومشت معهم للخيمه ودخلو يجلسون معدا رماح الواقف وهو مبتسم وتنحنح يجلب انظارهم وناظروه يستمعون له وهو مبتسم
واردف رماح بحماس : انتظرو علينا ٦ شهور ويجيكم حفيد ولا حفيده
سكتو يرمشون عدة مرات يحاولون يستوعبون سرعان ماسكن المكان الصراخ بالحماس والفرحه وضحك ذياب يوقف ووقفت فاطمه تشوفه مقبل عليها
وقبل راسها بحنيه : مبروك يافاطمه مبروك
ابتسمت بخفه : الله ييارك فيك
ومد لها من جيبه فلوس
وشهقت بخفه : لالا ياعمي...
قاطعها باصرار : الا والله ان تاخذينها هذي هديه مقدمآ
هزت راسها بخجل وتقدمت العنود خلفه
تمسك كفوف فاطمه بحنيه : يالله لك الحمد صدق مبروك يا فطيم!
ضحكت بخفه تقبل راس العنود : الله يبارك فيك ياعمه
وابتعدت العنود وتقدمو جمان وسلوى يحضنونها ويباركون لها وخرجو الاعمام والعيال احترامآ لرماح وبكت فاطمه تشد عليهم
وهمست جمان : مو وقته تبكين يا فاطمه
ضحكت سلوى بخفه وهمست : شفيك انتي خليها تفرح جاها فرج بعد ٢٣ سنه !
ضحكت جمان تقبل راس فاطمه :ماقلت شي بس لاتبكي قدامهم
وتقدمو البنات لديم يجلسون معها ويباركون لها وهي؟ كانت تبتسم وترد عليهم
خرج رماح على صراخ عبدالعزيز اللي
اردف : بهذي المناسبه اليوم العشاء علي!
ضحك سياف بخفه : اعاونك لاتتورط؟
هز راسه بضحكه : مابقول لا
ضحكو من تقدم رماح يحضنهم ويرد عليهم
فراس : مبروك ياعم
ابتعد رماح يهز راسه: الله يبارك فيك
لف من نطق خالد : مبروك جعله يشرف بالدنيا بخير
هز راسه يبتسم : الله يبارك فيك
لف عبدالعزيز لخالد : رح انت وولد عمك جيبو لنا وحدةً زينه
تافف فراس يصد : اكره ذا الفقره
سياف : عشانك تأفافت قم ورح اعزم المزرعه اللي مقابلنا
غطى وجهه بكفوفه : ابوي تكفى مالي خلق
ضحك خالد يمسك ذراعه : امش امش بس
خرجو ولف عبدالعزيز لسياف ورفع كفه على راسه يشير بالجنون : مجانين العيال ذولا !
ضحك سياف
وخرجو على وصول سعود ونزل من سيارته يشوف العيال وابتسم يرد السلام
فراس بابتسامه: كيف الحال؟
هز راسه يصافحه : بخير وانتو؟
هزو روسهم
واردف فراس : ابوي عازمكم عالعشاء اليوم عشان عمي رماح مرته حامل
ابتسم بوسع ثغره يهز راسه: ابشرو اشوف الاهل وارد لكم خبر
مشو يهزون روسهم
وضحك بخفه يصد : اجل ديم الحين طايره من الوناسه
ودخل يسلم عليهم ويجلس يشوف اعمامه وحمد والبنات ولف لجده : جدي ال ذياب عازمينا اليوم على العشاء عشان رماح مرته حامل
ابتسم يهز راسه: وماراح نرد العزيمه تجهزو وجيبو معكم شي تعطونهم لاتروحون خالين اليد
هزو روسهم يوقفون
وابتسمت رغد : اخيرا بتعرف على بنات جديدات
بلعت ريقها تشوف نظراتهم
وابتسمت باحراج : امزح
.................
الليله بعد اذان المغرب
دخلو ال سليمان لاسوار مزرعة ال ذياب
وكل الطرفين راضين على بعضهم ومشو يدخلون الحريم لخيمة الحريم والرجال يمشون لخيمتهم ودخلو البنات وديم كانت تلف تدور نجلاء بعيونها وكانت ديم لابسه جلابيه فاخره باللون الاحمر ولابسه ذهبها من ابوها وفاكه شعرها الستريت وماسكه الدله وتسلم عليهم وتدور نجلاء وشهقت من حضنتها وحده من الخلف ولفت تضحك بخفه : نجلاء
ضحكت نجلاء ونزلت ديم الدله تحضن نجلاء بشوق : يالله اشتقت لك
ضحكت بخفه : اكثر والله
وابتعدت تاخذ الدله ومشت نجلاء تجلس بجانب حصه اللي تسولف مع فاطمه وبدت ديم تصب القهوه وريحة الهيل والبخور ماليه المكان والبنات جالسين ووقفت عهود عند ديم : اساعدك؟
ابتسمت ديم : تكفين انا مجهزه القدوع بس مامداني اجيبه كله جيبيه
هزت راسها عهود وتنادي ميسم تساعدها وركضو يجيبون القدوع
وابتسمت ديم تكمل تصب القهوه ومن مرت عند حصه وشافت نجلاء بجانبها بلعت ريقها تدري انها ام سعود وصبت لها القهوه بابتسامه
وابتسمت حصه تاخذ القهوه : ذوق والله!
ابتسمت بخجل وتقدمت تصب القهوه ولفت لنجلاء تصب لها ومشت تكمل باقي الحريم
وابتسمت نجلاء تلف لامها : امي هذي هي اللي خطبها سعود
ابتسمت حصه باعجاب : والله البنت تهبل ماشاءالله
هزت راسها بابتسامه ولفت لديم اللي خرجت تشوف ابوها اللي ناداها
وهمست : سم
ابتسم باعجاب من الذهب الي جابه لها والجلابيه الحمرا : الله الله عسى ماجيتيني معك عقول النسوان اللي داخل؟
..................
النجمه🦋🦋🦋
أنت تقرأ
لقيت فيك الاماني ياخلي
General Fictionروح مهزومه ، وقلب شاكي ، شكى بدون وعيه لسعادته ، وماكان منه الا مقابلتها بحجة الفضول ، و رغم مُعاناة حالهم ، اعطاها كامل الامان ! « لقيت فيك الاماني ياخلي » - النقل والاقتباس يعرضك للمسائله القانونيه ! -
