عذابي الأزلي

البارت الثامن والعشرون

البارت الثامن والعشرون

بقلم الكاتبة الزهيرية الزهيرية

المغادرة الصامته هي الرد العظيم
لكل من استهان بطيبة قلوبنا

مينا/ يعني اني اعرف انه اليريد يدخل بموضوع لازم يسوي تمهيد لشخص المقابيله  ويسوي اجواء اما مثل ريان ما شفت ابد يعني احنه من صباحية الله واني چنت نايمه بحيث من امي گعدتني وگالت ابو الطفله يگول خلي تبدل وتجي واني ابو نجاح السايق گلي لا تروح عليها فهمت هاي عطله وهسه آجى عليه صرت مثل المخبله والله بين اغسل وبين البس ملابسي وبين ادور على جنطتي هذا كله واني النوم بعيوني وطلعت اركض وصعدت ويا لان اعرفه معناها راح يبدي يرزل بس بالبدايه حچى بحده والعرض العرضه عليه اغرب من الخيال

ومن عرض الزواج بالبدايه استغربت بعدين ويه نفسي گلت شنو اني بعدني نايمه وأحلم لهذا خلي اسكت لان احتمال گال غير شي وما سمعت واگول كلام اندم عليه واتخزى گدامه او يگول دى تغريني بقيت ساكته واباوع من الجامه مال السيآره على الشارع وهو وگف السياره ونزل واجى فتح باب السياره الخلفي وصعد يمي بس بينه مسافه وسد الباب بصراحه گلبي احسه يدگ احسه راح يطلع من صدري وحتى صرت ارجف وهو بده كلامه وهو يباوع بوجهي مثل وما اني اباوع بوجهه

ريان / شوفي مينا اني بيه طبيعه احچي حچي مباشر يعني ما ادور لوفات للحچي ومثل ما احب يكون المقابيلي صريح ويايه بدوري اني هم لازم اكون ويا حتى تكون الثقه متبادله

مينا / يعني شنو ما فهمت

ريان / شوفي يا بنت الناس هسه اني من عرضت عليچ الزواج خلي اكون صريح وياچ وصادگ اني مزوجچ حتى اسجل بنتي بسمچ وتعتنين بيها وبالمقابل شنو تردين اني حاضر بس دى احچي مادياً اما حقوق زوجيه ماكو بصراحه اني ما مستعد لهذا الشي حالياً يمكن مستقبلاً ممكن ان يكون ما اعرف بعد هذا الشي يعتمد على شطارتچ وبيد رب العالمين يعني نزوج كل واحد بينه ينام بعيد عن الثاني وانتي الچ حياتچ الخاصه واني الي حياتي الخاصه يعني في يوم گلتي ريان اني اريد اطلگ واشوف حياتي عادي طلگچ وتاخذين كل حقوقچ

مينا/ بصراحه تعجبت على كلامه يعني اني عبالي حلم طلع مو حلم هذا واقع جاوبته/ زين اني شنو ذنبي استاذ ريان هذا راح ينحسب عليه زواج يعني انت تريدني خدامه لا اكثر ولا اقل بس خدامه بقيود حتى ما اطلع من تحت سيطرتك

ريان/ مينا اني كلامي وياچ واضح تحبين اكذب عليچ وامثل عليچ الحب وبعدين ازوجچ واگلچ هذا الكلام من نزوج  واخليچ گدام الامر الواقع واگلچ هذا العندي يعني من يوگع الفأس بالراس لو من هسه اگوله الچ حتى يكون الچ حق الموافقه او الرفض اني ما اريد اكذب عليچ مينا  حتى الاوله شرط اخره نور

مينا / بصراحه ما اعرف شنو اجاوب استاذ ريان أنت فاجئتني كلامك مال واحد يگول لوحده انتي راح صيرين مزهريه في بيتي لا اكثر ولا اقل