عذابي الأزلي

البارت السابع والعشرون

البارت السابع والعشرون

بقلم الكاتبة الزهيرية الزهيرية

نتجاهل ليبقى الود مستمراً
وليس لأننا اغبياء

مينا / مرات يجي شخص عليك يسد نفسك اكثر ما هي مسدوده واني بعد غدر مصطفى وطلاگي منه ثقتي صارت مهزوزه بنفسي صرت ما اهتم بكل شي يعني عندي عادي ابقي وجهي بدون حفافه شهرين وثلاثه واحنه البنات مفهومنه غلط وهو انه إذا ما عدنه حبيب او زوج معناها ما نهتم بنفسنه وخاله فهيمه من طلبت مني اهتم بنفسي بصراحه دخلت نصيحتها من الأذن اليمنى وطلعتها من الأذن اليسرى

وجناها على النفس المسدوده من جابني ريان من بيتنه اكثر الطريق هو ساكت بس قبل ما نوصل لبيتهم سألني سؤال غريب بالنسبه الي لأن ريان كلش جاف بتعامله ويايه/ انتي مرتبطه

مينا / ما فهمت شنو مرتبطه يعني

ريان / كلامي واضح مرتبطه يعني مخطوبه او عندچ علاقة حب تربطچ بشخص

مينا / لا الحمدلله ما عندي هيچ سوالف مال حب وغيره اليريدني يندل الباب ويجي يخطب أما إذا مخطوبه ما چان اشتغلت أصلاً

وانتبهت عليه يباوع عليه بالمرايه الاماميه ومن جاوبته بهذا الكلام رفع حواجبه وگال / يعني افهم منچ انه انتي ابد ما سويتي علاقة حب ابداً

مينا / لا استاذ اني دائماً احذر من هاي الاشياء

ريان / گتيلي اريد امتحن سادس ليش ما خلصتي دراستچ وين چنتي توچ يله ذكرتي الدراسه وشلون راح توفقين بين الدراسه وشغلچ لان بحكم اغلب انه أنتي اكثر الوقت ويه بنتي

ميليا /  الدراسه ما آلها وقت والانسان يگدر بكل وقت يكمل دراسه اما بنت حضرتك لا تخاف إذا ما اگدر اكون ملتزمه ما اجي واشتغل

وهو عبالك ما مقتنع بكلامي لان بس يهز براسه وصلني لبيتهم ونزلت وهو هم نزل ودخلنه وچانت ميليا بحضن ام كمال سلمت عليها واخذت ميليا منها

ام كمال / تعالي بنتي خلي نتريگ اني وياچ الطفله نظيفه كملتها جنى وجابتها يمي حتى شبعانه خليها بالكريكوت وتعالي وجنى راحت لشغلها

مينا/ ريان سلم على امه وطلع لشغل وبقينا اني وام كمال جاوبتها / والله خاله تريگت  وبس اريد چاي هسه اسوي ريوگ
رحت ذبيت ميليا بالكريكوت ورجعت سويت ريوگ وگعدت اشرب چاي وام كمال تتريگ وسألتني

ام كمال/ انتي حبابه وشاطره ونظيفه ليش طلگچ زوجچ

مينا/ لا خاله مو هو طلگني اني رفعت عليه قضية وتطلگت لان چان يريد يزوج عليه وحلفتها انه ما تگول لاي أحد الكلام الراح اگوله وهي حلفت ما تگول كلمه من كلامي لاي بشر وحچيت الها شلون عشنه طفولتنه في بيت اهلي واختي تقى الماتت واحنه شلون أبويه باعنه