#بقلم_هاندا
96
🎬
بايتة ننازع ديك الليلة راسي يوجع بالسطر نحس فيه دي ماس جي وتروح نشرب الماء ونعاود نزير عليه والو تقلقت وزدت تزيرت حابة توالات ومحبيتش ننوضها اصلا منبهة عليا بش منكثرش سوائل ف الليل غير من هاد الشيء بصح دك شربت قرعة كاملة ،،،حملت حملت وليت عيطت ناضت وجاتني قتلها داتني للتولات حاشاكم مستلي وجهي لقاتو سخووون -وقيل راكي مسخنة سير قاسك الهوا كي كنتي ف البالكو هي تهدر وانا منردش تفهمني ومتحبش تكثر عليا بزااف ،،بعد معدلت روحي طفات الضوء وجات توالي شعلت الفيوزة وتلاحت معايا قتلها -روحي ترقدي اني مليحة دك -ليديا -امممم-مبعد سكتت-وشي عمتي كملي وش كنتي راحة تهدري-لا والو أرقدي كي نشوفك غمضت عينبك نروح ،غمضت عينيا حسيت بيها كي راحت عاودت فتحتهم وش من رقاد ي عمتي تفكرت مصليتش المغرب والعشا كنت في حالة منيش مليحة وليت استغفرت بصباعي شحال من مرة .......
غدوة كانت الأمطار بقوة شغل إعصار لدرجة تخبط ف زجاج البالكو والتيق عجبني المنظر ونحب الشتا كي دير هاد الجو المرعب فتحت البالكو ريح قاااوي خرجت للبالكو تشمخت منها تضرب لوجهي حتى دقت طعمها مالحة حسيت بعمتي كي جرتني من الكرسي لداخل -انتي علاه خارجة هكذا عريانة وفي جو كما هذا ليديا عدتي كما لولاد صغار والله -علاه عمتي فسدتي عليا تهبل خليني نخرج افتحي -امشي قدامي شوفي حالتك كيفاش ولات راكي تقطري وجدة تقولها هاذي شيباتك قاتلها -ماااااا بدينا دورت وجهي لجدة قتلها -انتي ابقاي نبشي فيا وقولي منحشمش ونرد الهدرة والله وجيني حالتي تشوفي كيفاش نولي متلومينيش الا طيشتك من فوق قاتلي كي تنوضي برك من الكرسي ساع طيشيني بقيت مشوكية منها ومن هدرتها غاضتني حتى عمتي راحت ليها قاتلها -وش هاد الهدرة مااا راكي كبيرة عيب عليك تغرغرو عينيا رحت زادمة بسرعة للحيط نولي ماشاريار ونضرب للباب شحال من مرة مبعد دخلت لشمبرتي ملقيت وش نكسر اصلا كلشي فزدتو لي مشقوق لي مكسر لي مقطع عاودت خرجت رحت للكوزينة هزيت م و س نشوف معاه جات عمتي نحاتهولي من يدي قاتلي-بلاكي تعاوديها ليديا متخلينيش نولي نخبي عليك كلشي مديريش على هدرتها هي هكذا انا بنتها ومنسلكش من فمها رحت وخليتها تهدر دخلت عندها للصالو شفت شفت مبعد قتلها-ربي يهديك ولا يديك ودرت بالكرسي لقيت عمتي حاكمة الضحكة في فمها غمزتلها سمعتها تدعي ف الصالو قتلها -يا ريتك تدعي عليا دعوة صحيحة نتهنا منكم وتتهناو مني ومن الكرسي هذا ياخي حالة اصلا علاه جيتي هنا كن بقيتي لتحت عند ديك الغولة قاتلي عمتي -ليديا اسكتي خلاص -هي عمتي هي لي خربشت فيا مسمعتيهاش راهي تعاير وتستشفى -روحي لشمبرتك دك نجيبلك تتغداي ....#بقلم_هاندا
97
🎬
تغديت صليت واستلقيت ندمت وش داني نقولها هكذا راهي كبيرة بصح هي لي دنات ليا افففففف اتهدني ليديا اتهدني متبدايش تفسدي ،رقدت بزاااف كي نضت سمعت صوت بابا ويهدر ف الهول بالعقل وعمتي تاني مفهمتش عيطت عليها طلت عليا شفت وجها تبان مقلقة -وشبيك عمتي -ااا والو اكي تعرفي جداك ساعات تقلقني -امممم حابة نشرب حليب -ايه دك نجيبلك راحت وانا توسوست قلت سير بلي راجلها جا وحب يرجعها مجرد فكرت تروح وتخليني رايحة نبكي حكمت وجهي دخلت لقاتني هاكدا حكمت عليها بديت نشرب قعدت توالي -عمتي عمو عمر حاب يرجعك -اااا وش جاب سيرتو هادا دك -برك كي شفتك مزعفة -ليديا بركاي متعمري في راسك بمشاكل خاطيينك كملي اشربي حليبك......بعد م راحت كانت رفدتني فدللكرسي تبعتها شفت جدة لابسة وخارجة قعدت نشوف معاها هزيت حاجبي تبان شي وين رايحة تبعتها حتى للباب شغل جاني احساس منعرف واش مهم حابة نفهم قلبي حسني بلي كاينة حاجة خارج الحيوط هاذو هي كملت هبطت وعمتي شافتني في فم الباب جات سكراتو قتلها -جدة وين رايحة -والو هنا عند عمك اسماعيل عرضوها -عرضوها وعلاه وش عندهم -منعرف خلينا منهم هيا فوتي لداخل ندوشك مقلتش لالا ، رحت دوشتني خرجت لافة سربيتة على راسي ستنيتها حتى جات نشفتلي شعري الحاجة الوحيدة لي بقات تشبه فيا هي شعري مزالو كما كان ضفراتو هي دخلت تدوش وانا خرجت للبالكو تاع الكوزبنة جاي مكشوف ونشوف منو خير من لخرين عاليين خرجت وقاعدة تم نعس ، لحظات قليلة وشفتو خارج من الدار حاط الحطة يا قلبي حبس بيا الزمان حكمت في الصور بزوج يديا على قد.منقدر كلو حطة واناقة وجمال كي عوايدو بلعت ريقي مقدرتش نسيطر على روحي منعرف تمنيت نقدر نعيطلو ولا نهدر معاه ي رييييت شفتو حل طمبيل وركب شوية هكذا خرجت يماه وعمي وجدة بابا كان واقف بعيييد يشوف ليهم ومقدمش هادو لوين رايحين زعما في هاد الوقت بقيت نثبت زاد خوه ومرتو ركبو طمبيل وحد خلاف وراحو حطيت راسي عل حيط تاع بالكو بقلة فهم قعدت تم حتى ضلامت منعرف وش كنت نستنى بلاك فيهم يرجعو ولا حبيت نزيد نشوفو خرجت عمتي عيطت عليا محبيتش ندخل شغل فهمت عليا ولا حست جات فوق راسي -انتي وش مقعدك هنا البرد -اا والو عجبني الحال والجو بقات تشوف وتركز في عينيا حطيت راسي لعبتها منيش فاهمة راحت وبقيت نعس فيهم حتى رجعو هبطو بالواحد وعيني تترقب فيه حتى هبط وشفتو ويماه حاكماتو من دراعو تبان فرحانة للخر شفت جدة طالعة رحت سبقتها للباب حتى دخلت ديراكت بديتها -وين كنتي -محبتش تردلي كانت تشوف مع عمتي عاودتلها السؤال-وين كنتو شفتكم رحتو وكي جيتو جبدتني عمتي من الكرسي نحيتلها يدها قاتلها -خلاص آخرتها تعرف علاه راكي تتمخزري فيا هاكدا عقدت حواجبي وشفتهم ليهم في زوج-وش كاين نطقت جدة قاتلي -رحنا خطابة نخطبو لعدلان حليت عينيا ولات عمتي تتهاوش معاها انا درت بالكرسي وعاودت رجعت منين كنت حسيت بجسمي بارد خرجت ورايا قتلها-عمتي عدلان خطب ا عمتي شفتو مقبيل وكنت نعس فيه هنا وجدة زادت اكدتلي آخر كلمة طاحت معاها دمعة سخونة وجاتني هاديك الرجفة لي تسبق البكية....#بقلم_هاندا
98
🎬
عمتي راحو خطبولو حسيت بوحد الإنهيار أكثر من نهار سمعت بلي منمشيش والله اليوم حسيت بلي خلاص انا كنت حكاية فارغة بالنسبة ليه وشهوة كما قال نمسح دموعي بش نشوف ويعاودو يهبطو هبطت عندي حكمتلي يديا -ليديا خلاص مديريش هكذا والله ميستاهل خلاص عمري بزاااف عليك نتي هاد القلب لي عندك وش يحمل ااااا اكي ضريتي روحك بزاااف هو رخيس على روحو ملي جا مامبا مقالش نطل عليها ا سيدي راكي بنت عمو مقلناش يعاملك بلي مرتو هو مخسرش خمس دقايق وجا طل عليك وانتي تبكي عليه انا محبيتش نخليك تعرفي غير بش منشوفكش ف هاد الحالة -علاه لوقتاش تبقاو تخبيو عليا بعدتها ودخلت في حالة يأس وخدلان قد منقول نقسى ونبرد قلبي مقدرتش يبقى قلبي الطحان يضعف راني حبيتو أكثر من روحي أكثر من بابا من ماما حتى من شرفي هى هى هى هى شهقاتي كانت من القلب تقطع زادت عليا جدة لي قاتلي -علاش راكي دمعي هكذا هو خير حياتو وجاب لي تستاهلو مرا طول وقد تقول شمس طلي ولا نطل علاش راكي تبكي كي كان في يدك علاه ضيعتيه اااا ودك وش حبيتي يرجعلك ونتي هكذا هو يحتاج مرا كاملة غلقت وذنيا من كلامها المسموم منعرف وش جاها عليا هاد ليام حكمتها عمتي مخلاتش فيها -يا لي قبلك قاسي كيفاش تهدريلهت هكذا ياك هي حفيدك كما هو ولا وزيد كيفاش عطاك قلبك تروحي وتخطبي معاهم نورمالمو راكي ف العدة محشمتي مقلتي عيب بابا مزال مكملش عليه شهر ربي يهديك لي قدك يروحو يحجو وانتي هنا نهار كامل تتعايطي مع نسا ولادك ناضت فيها مخلاتش حسيتها كانت معمرة هي تان ولقات سبة خليتهم ودخلت سكرت على روحي نزغد ب الكرسي نروح ونولي مشاريار حتى دخت حكمتني غصة ونفس الوقت حقدت حقدت عليه عاودت فتحت الباب لقيت عمتي ف الهول وتبكي كي شافتني ناضت درتلها بيدي اقعدي وين كنتي الشنابر كامل دخلت ليهم شغل نحوس على حاجة بصح منيش عارفة واش مزالني لداخل نغلي حابة ندير حاجة ونفش خلقي رايحة وجاية ونهدر - هبلوني زاد كملو عليا خسروني في شرفي وزاد رجليا وعقلي ودك رابحة ندير حاجة ف روحي نسفق بيدي وحدة مقدمت عندي خلاوني على راحتي حتى شفت بابا دخل من الباب بقا يشوف لينا عمتي سابطة في لرض وجدة واقفة ف الباب وأنا ندور بالكرسي وحالتي باينة قال - وش كاين مشيت قدمت ليه اول مرة نهدر معاه حكمتلو يديه بقا يشوف معايا وانا يديا يرجفو قتلو -الا كنت عندي معزة عندك من قبل غلبوني دموعي وكملت -قل لولد خوك يجي يطلقني ويعطيني كلمتي قالي-معليش يرحمها ربي طبعتو ونعيط بالصوت -مسممممممعتش قتلك قلو يطلقني ولا ندير حاجة في روحي ناضت عمتي زادت قاتلو -عندها الحق عيطلو يجي يعطيها كلمتها متبقاش معلقة هكذا حرام عليه هو شايف حياتو وهي تبقى تسمع ف الكلام لي يسم لبدن حتى من يماك مرحمتهاش قالي -يطلع النهار ونجيبو انا من لي جا مسلمتش عليه ومهدرتش معاه دك نعيط لاسماعيل يجيبو هنا -ربي يساهل عليكم جيت رايحة عاودت رجعت -بلاك وبلاك تخليه يشوفني وانا هكذا عاجزة سمعت قالي -هيه خلاص كما تحبي ودرت ليهم مفهوم بلاكم دخلوه لعندي يكفيه يقولهالي من توال الباب ،راح بابا خرج حسيتو حتى هو تحسس من هاد الجاست منو طول عمرو يعتبرو كما بنو وخير بصح تستاهل لوكان درت القيمة لبنتك لوكان قيمك الله لا يشوف واحد فيكم نهار مليح ....#بقلم_هاندا
99
🎬
بايتة هاذيك الليلة لا انا لا عمتي ملاح في زوج نتباكاو وهي تحلفي قاتلي لوكان منبردش قلبي منيش رايحة نرتاح رقدت في حضنها حتى للصباح غير فطرت قاتلي تروحي معايا توال ماسي مكنتش حابة نروح وخايفة نخرج نتلاقا بيه قتلها -لا منروحش -ليديا بركاي لوقتاش تبقاي مخبية ولا هواء تاع ربي تان تمنعي روحك عليه بسبابو خممت في كلامها قتلها روحي طلي قبل الا كانت طمبيلو هنا منهبطش تأففت وراحت طلت جات قاتلي -مكنش هنا-سير-والله هيا ، لبستلي وعيطت لبابا هبطني لتحت وقلبي مخطوف عيني دور من ومن ليه ليه ركبوني ف الطمبيل رحنا عند ماسي ملي دخلت عندو و انا منيش معاه حتى هو حس بلي منيش مليحة عيا معايا والو سمعتو قالها -كش مصرا قاتلو والو مشاكل تع الدار قالي -ليديا تاخدي برايي اخرجي شوي من جو الدار هو لي يزيد عليك حاولي تخرجي لبرا شمي هوا شوفي الناس حالتك ونفسيتك عندهم حق عليك هكذا مكيش رايحة تتقدمي ف العلاج شفت معاه انا وين وهو وين عقلي وش يخمم وعقلو هو وش يخمم قال لعمتي وش رايكم نوصلكم لوحد البلاصة علابالي تعجبك ليديا شفت فيها تاع مكان لاه ترضخيلو طابس عندي وقالي -ليديا اعتبريني خوك مش طبيب ا سيدي هيا تقبلي دعوتي اليوم قاتلو عمتي -ماسي معليش مرة خلاف تنهد وقالي معليش بصح الدعوة مزالت قايمة مشي اليوم بصح تقبليها مني يوم آخر وزيد مع القيتارة وضحك تبسمتلو برك بش يحبس الثرثرة تاعو ، كنا خارجين لحقنا قالها -انا نوصلكم دك يجي صاحبي يرومبلاسيني دك هذا لسقة وخيرلي النهار هذا بالضبط لي منيش في حالي هاندا ريفالدا للقصص ،،،طول الطريق وهو و عمتي مسكتوش حتى وصلني قلتلو ادخل للحوش داخل وقاري، دخلنا راح يهبط الكرسي شفت طمبيل عدلان هنا نغزتها -عمتييي -ااا- شوفي الا عدلان ف طمبيل تعيشي اهبطي ، هبطت راحت من جيهتو وجات -اهبطي مكانش عاونوني في زوج حطوني ف الكرسي قتلها ازربي دخليني يالله ، غير جرت بيا الكرسي شفتو خارج هو معاه وحدة بقيت حابسة ونسيت على روحي قريب شافني بصح انا عيني على ديك لي معاه كيفاش حاكمة فيه تقول مرتو لابسة نوار كما قلبي لداخل قاتلي شفتي وش كنت نقولك البارح متبكيش عليه وانتي لاتية وتندبي هزيت فيها عيني وطاحت دمعتي لالا مشي كيف كيف فرق بين تشوفي هاد المشهد وانتي واقفة وفرق بين تشوفيه وانتي عاجزة فرق كبير طاحت دمعتها وجرت بيا الكرسي قاتلي نعيط لباباك .....بعد ماطلعت بقات تهدي فيا وتواسي وانا سكت ضربة وحدة شي لي شفتو سكتني مدة معينة مبعد ولا دموع مبعد ولات رجفة ديك لي تحكم من القنطة يدي ترجف ترجف ولخرى حاكمة بيها وجهي ونبكي ب الساكت متكية ع الكرسي هاندا ريفالدا للقصص حتى هبطلي الدم من نيفي .......
للمغرب كنت ف الشمبرة قاعدة ف الكرسي وحالة التاقة دخل بابا طل عليا قالي-ليديا درت ليه قالي وش هدرنا البارح دك يطلع وانتي تحبي تخرجي ليه تسمعي كلمتو ولا تبقاي هنا ،حطيت راسي قتلو مدخلوش عندي منيش حابة نشوفو حركلي راسو وراح مسحت دموعي وعدلت قعدتي نحاول نهدىء ف روحي طلت عمتي سكرت الباب عليا مبعد فتحت منو شوي ، وأخيرا سمعتو طلع وجدة تهدر معاه تزايدو صواتهم بابا منعرف وش كان يقولو حتى تحلت الباب درت بالكرسي مفجوعة ......
