بقلمي أنا الكاتبة هاندا ريفالدا
⚜️⚜️⚜️⚜️⚜️⚜️⚜️
في هاذ الدنيا خلقنا ربي بش نجتازو عدة إمتحانات أكثر منها عبارة عن إبتلاءات يا نجحنا فيها يا خسرنا ،الإنسان يولد حر من كرش يماه عزيز النفس دو عقيدة ربانية تسري في أعماقو يولد كي الورقة البيضاء والحياة تكتب فوقها حتى يوصل لسن معين وهو سن البلوغ لي يولي هو لي يكتب على هاد الورقة وايضا يتحاسب على كلشي ...لكن بين هذا وهذا كاين حاجة وهي تربية الوالدين ليك وبطبيعة الحال كل طفل يتربا على يد والديه وش يعلموه يترسخ فيه ويكبر معاه .......
🎬 أحداث القصة حقيقية
🔱 قبل 28 سنة ....🔱
زدت و جيت لهاد الدنيا وسط عايلة كما يقولو هما عايلة مثالية من كل النواحي ولا نقصد من ناحية المادية لأن اهلي هكذا يفكرو زدت وترعرعت من أم مسيحية( المانية) وأب مسلم( قبايلي) فترة طفولتي عشتها وسطهم كاي بنت مع والديها بالرغم من الفروقات الدينية والعادات بين ماما وبابا ......
⚜️⚜️⚜️⚜️⚜️⚜️⚜️⚜️⚜️⚜️
أالآن .....
أنا ليديا عمري 28 سنة البنت الوحيدة من الأم الألمانية عندي خاوتي من مرت بابا جزايرية ومسلمة خاوتي زوج كبار ذكورة عادل وسليم ،عادل عمرو 34سنة مش متزوج عايش لراسو وسليم قرا في فرنسا وكي كمل قعد تم يخدم عمرو 30 سنة ،حنا عايلة كبيرة عندي عمومي وعندهم ولادهم وعندي عمتي وحدة برك اسمها نورة عمرها 46سنة ...... البيت العائلي تاعنا كبير يتكون من 3 ديار زوج مقابلين وحدة وفي نص كاين جاردان كبيرة وواسعة دار جدي هي نفسها دارنا لي عايشة فيها انا وعمتي وماما اسمها الحقيقي "لونا'' بصح مين جات هنا سماوها "ليندة "وجدة اما خاوتي عايشين مع يماههم ف الايطاج لي تحتنا وباقي الديار تاع عمومي كاين زوج عمي الكبير اسماعيل طبيب جراح العيون عندو زوج ولاد ف الخارج عدلان ولطفي ومبعد يجي بابا اسمو محمود يخدم كومارس ومبعد عمي أرسلان استاذ ف الجامعة هذا متزوج ومطلق عندو طفلة اسمها ريان من مرتو لولى قدي ف اللاج وزوج ولاد صغار أيمن ويانيس مع مرتو دوزيام ......
حنا عايلة عايشين كل واحد لروحو يحبو السوارد يموتو عليهم كلشي غير الماديات من جدي لجدة لبابا لعمومي اكل نفس العقلية يحبو المادة بزاااف والرابط الديني ضعيف عندنا مهمش من النوع لي حاكم ف الدين كنت نشوف غير عمي اسماعيل وعمتي نورة هو لي يصليو والباقي عمري شفتهم يسجدو لربي وحتى بابا عايشين للدنيا برك تالمو ماما مسيحية وخارجة من ملة محمد مامبا مقدروش يدخلوها في الدين تاعنا وهي تان عايشة لروحها الهدرة تعرف تهدر العربية مكسرة بصح لهجتنا حنا قبايل متعرفش كانت تتفاهم شوي برك مع عمتي نورة مشي حاجة والباقي لا مرت بابا ونسا عمومي النار بيناتهم كل يوم صراعات حتى ماما مهيش قليلة توجور تعايرهم بولاد الجبل وهما يزيدو يشعلو فيها ....
عشت في وسط عايلة كما هاذي نوكل ونشرب نلبس وش هوالي الحجاب عندنا مش مفروض لي حبت تتحجب ولي محبتش ربي يساهل عليها واحد ميجبرها عليه كاين خويا عادل برك خارج شوي مزير مالقري ميصليش بصح ميحبش كي يشوفني نلبس دايما قاتلني بالطرايح حتى تتقابض معاه ماما يوليو يكراشيو في بعضاهم وتقوم القيامة نولي نهرب عند.عمتي نورة ونسكر على روحي ، صراعات كل يوم بين نسا عمومي مرت بابا وماما وجدة دايما نفس النقاشات بيناتهم واحد ميهدي للصلاح كلهم انانيين .....كنت نقرأ انا وبنت عمي ريان في نفس المدرسة حتى للثانوية مالقري منتفاهموش بزاااف تغير مني بصح متضرنيش ساعات نضربها ساعات تضربني كي نجيب خير منها غير لحقنا للجامعة زادت عداوتنا كبرت انا وياها بسبب الحب المشترك ايه انا وهي نحبو نفس الشخص ولي هو من دمنا وفينا بصح ولا وحدة تهنات بيه بالعكس هي مامبا ملحقتش ليه وانا الأكثر ضرر حبي ليه عطاني ضريبة حياتي لي خلاتني وليت فتاة مقعدة ومعقدة وفقدت الشغف ف الحياة وماتت الرغبة فيا وليت جثة نوكل ونشرب نشوف بعيني وفقططططط بصح هاد الشي كااامل عندو اسباب ومراحل فت عليهم وحكاية طوييييلة صرات قبل 6 سنوات قبل متوصل بيا نقعد فوق هاد الكرسي ........
