كﻻمها..انه صبا بنت عمي جانت تكول لكل زميﻻتي..وزمﻻئي..انه غسق امها..جانت راقصة بملهى..وانه ابوها تعرف عليها..بحفلة خاصة مال..ركص وشرب..وفساد..وﻻن امها جانت حلوة كدرت تضجك عليه وتخليه يعشكها..ويحبها ويتزوجها..ولهذا ابوه واخو..وكل اخواته تبروا منه حتى ميصيبهم العار..بالبداية مصدكت..كلت هيه تكرهني وتلفق على ماما..بس من واجهت بابا وماما بحجيها بابا صار عصبي..وكلي :
وهسه شيردون مني دازين بتهم تشهر بيج بالكلية همه مو تبروا مني اخذ..راقصة اخذ كيولية شعليهم بيه..بابا..معليج بأحد..مهما جان ماضي امج هي هسه زوجتي..وامج..ومنكدر نغير هالواقع واني احبها وعفت الدنيا ع مودها..
طبعا ماما تسمع الحجي مال بابا..وتغلط ع بيت جدي..وعلى بيت عمي كدام بابا بس بابا مأيدها وميحجي..ولهذا..تأكدت انه كﻻم صبا..بنت..عمي جان كوله صحيح..وماما..فعﻻ جانت راقصة..وبنت مﻻهي.... واصﻻ معدها اهل..وﻻ احد يعرفلها ..ﻻ ام وﻻاب وﻻ اخوه حالها حال الكيوليات الي يتربن من هنه زغار..ببيوت الدعارة..والرذيلة..جانت معرفتي لهذه الحقيقة اكبر صدمة بحياتي..وجنت اتمنى معندي ام عارها يبقى..وصمة..بحياتي طول العمر..بس مبيدي اي شي..يغير هذا الواقع قررت اتأقلم ويا..وقررت انجح وبحياتي..والتزم دينيا واخلاقيا واثبت للناس انه اني..بنت بابا..مو بنت ماما..الكيولية..الي بقت كيولية بعيون الناس رغم كل هالسنين الي مرت..والي جانت متزوجة بيها من بابا الي غير حياتها وستر عليها وعييشها معززة مكرمة ابيت مثل القصر متحلم اي زوجة تعيش بيه..خلاها مثل الملكة سفرات وطلعات..وصرف..ذهب ومﻻبس..وكولشي..ممكن يجيبلها السعادةﻻن حبها من صدوك..بابا ..حسب كﻻمة حياته تختلف عن بيت جدي..اهل بابا..همه عايشين حياة بسيطة بس بابا من طلع للدنيا جان شاطر وابن سوك..وكدر يصير تاجر مال البسه وعنده 3 محﻻت ضخمة بالسوك..يسافر بين فترة وفترة يجيب.... بضاعة من تركيا ومن سوريا..ويربح خير من الله وعنده سيارتين حديثات..غير الفلوس الي..ضامهن بالقاصة ..بالبييت..وياهن الذهب مالتي اني..و ماما...تقريبا كيلو.ذهب عدنا..وعايشين احسن عيشه..بس باﻻشهر اﻻخيرة بابا وماما عﻻقتهم توترت..ومثل مكلت احس..بينهم فد مشكلة جبيرة ميحجون بيها كدامي..واني هم ما اكدر اسألهم عن مشاكلهم الزوجية...وقبل موعد سفرنا..ب3ايام..زادت المشاكل بين بابا وماما..لدرجة صوت عياطهم وصل لغرفتي بالطابق الفوك..ومن نزلت كالو ماكو شي..مشكلة بيناتنا..ورة يومين جنت نايمة بغرفتي كعد الصبح باوعت..الساعة بالعشرة..شعجب ماما مكعدتني..نزلت من الدرج:
ماما...ماما..ليش مكعدتيني اروح لبيت غادة مو كتلج كعديني..
بس ماكو جواب البيت صنطة..نزلت..اشو دا امشي بالصالة شفت دم باﻻرضية خفت..كلت لنفسي منين..... هذا الدم..وبقيت امشي ورة اللطخات مال الدم الى ان وصلت يم باب الغرفة وشفت بابا..بالكاع عيونه مغمضات..والدم داير مدايرة ..رحت يمه فقدت:
بابا...بابا..شبيك..بابا..منو ضاربك..بابا حاجيني..بس بابا ميتحرك..ركضت:
ماما..ماما...وينج..تعالي ماما بابا مضروب..مدري منو ضاربة ومدا يحاجيني..فتحت الباب لكيت ماما ماكو والكنتور مفتوح والقاصة مفتوحة وفارغة..
كلت هذا حرامي ضرب بابا وباك..فلوسنا..والذهب رجعت ادور ع ماما..اصرخ بكل صوتي:
ماما...ماما...لج ماما وينج بس محد جاوبني..ركضت لبابا احاول اكعدة ميكعد..بس شفت الدم يابس ع صدرة..وحتى الدم الي بالكاع هم مو لين...قسم لين وقسم يابس. خليت ايدي جوه راسه بس بابا ميتحرك..ما اعرف شلون اتصرف..عفته وركضت للشارع..بيتنا جبير وداير مدايرة حديقة يعني حتى اذا صيحت محد يسمعني من الجوارين..ورغم هذا جنت اصيح بعلو صوتي ودموعي تجري..اركض..اركض..
