ساعدينا بيها..اني دا احجي وياج بشكل ودي..ﻻن مقدر حالتج بس بعد شويه راح ناخذج للمركز والتحقيق يكون بطريقة ثانية..
وبجيت وكتلة:
ما اعرف شي..نزلت من غرفتي لكيت بابا غركان بدمة وماما ماكو هذا كل الي اعرفة....هو ضاج من كﻻمي وطلع كل للشرطي:
جيبوها للمركز..هناك.نحقق وياها..
واخذوني للمركز وساعتين الضباط.يسألوني نفس اﻻسئلة..واني اجاوب نفس اﻻجوبة ﻻن ما اعرف غيرها واحد منهم صار عصبي كام يغلط ويفشر عليه وكام راد يضربني..بس الضابط الي جان وياية بالمستشفى مخﻻه..وره شويه..اجه رجال...اباوعله يشبه بابا بس شعره كوله شيب وياه 2 شباب دخلو بس همه يتخازرون ويايه كعدوني بالممر والشرطي يمي..وره شويه..طلعو من الغرفة هذا الي يشبه..بابا كلي:
ها..بت الكيولية..عبالها امج تنهزم وتخلص وين تروح.....
اجيبها..لو تروح..الصين رادو يضربوني بس..الشرطة مخلوهم..
هو يتهدد..عليه..
لج نغلة بت الكيولية..وين راحت امج العار ليش متعترفين للشرطة..
وطلعوهم برة..
رجعو دخلوني ع الضابط
اختي..انت مجاي..تساعدينا واهل ابوج.هم ميعرفون شي..راح نخليج بالحجز
اني ممسويه شي. كولشي ما اعرف..
جان واحد منهم يحجي:
.رائد..كامل خطية وين تحجزها خلي عمها يستلمها ويوقع تعهد..يجيبها..للتحقيق من نريدها..
عمي منو ما اعرفه؟؟
ههههه متعرفين عمج..لج انتي شنو تلعبين علينا؟؟
منو عمي والله ما اعرفه ومشايفته..
اكو وحدة..بعمرج مشايفة عمها؟؟
اي والله مشايفته..
هذا الجان يفشر عليج هسه..هو راح يستلمج..لان ماكو غيره ..نسلمج اله..
ﻻ..ﻻ..رجعوني لبيتنا..ماماهسه تجي وتاخذني..
امج..وين امج انهزمت....
لعد خلوني عدكم الى ان تجي..ماما..
لج..دايحة بطلي هالسوالف مال ماما..وماما..لتخلنيني افوتج.لهاي الغرفة واعلمج على ماما وين تصير..
جان يضحكون..بس الضابط الي حقق ويايه بالمستشفى جان احسن منهم كلي:
عمج راح يستلمج..مراح نحجزج..الى ان...نعرف مكان امج..
واجه هذا الرجال الجان يفشر عليه وقع اوراق وطلعني من المركز..يسحول بيه والطريق كوله يفشر عليه وولده يمشون وراه..ويكولوله:
يابة لتصيح هسه احنا ناقصين فضيحة فوك فضيحتنا..مو لميت العالم علينا!!!
يتبع...
