غسق:::
ممصدكة الي ديحجي يزن والطريقة الي ديحجي بيهاهم..اشوفه محترك كلبة ودينصحني ويشجعني ويكولي صيري..قويه..معقولة..هو فعلا يريد مصلحتي ويريدلي الخير..يعني ديحجي على اهلة ويكولي ماكلين حﻻلج ومخليج خدامة ..يعني هو هالكد حقاني وميقبل بالغلط حتى لو صدر من عائلتة احس كلبة عليه ويهمة اطلع من ضعفي واواجه غيري..فكتلة:
يزن صدوك تحجي صدوك بابا مخلي كولشي بأسمي ..صدوك ابوك ما اله حق بشي!
اي صدوك..ﻻن الضابط سلمه كل اﻻوراق الي لكوها..بالبيت..وابوج قبل 3 اشهر من مقتلة نقل ملكية محﻻته وبيتة وفلوسه البمصرف الج يعني انت تملكين كولشي ومحد اله عندج شي..
كلت قبل 3 اشهر..
ورأسا دموعي جرت وتذكرت المشاكل الي صارت بين.... بابا وماما قبل 3 اشهر من مقتلة خطية يمكن بابا جان حاس هيه راح..تغدر بيه..لهذا نقل كولشي بأسمي!
شبيج..تبجين غسق..كافي..كافي بجي..وضعف..كافي..مخلصة الوكت دموع بدموع ترة الدنيا مغالب..والفطير ميعيش بهالزمان..احجي..بعلو صوتج واطلبي كل حقوقج لتضلين جامدة والناس اطشر بفلوس ابوج..
هااا..يعني..يعني شأسوي؟
شنو شتسوين..من يجي ابويه اكعدي تحاسبي وياه..ع كولشي انصرف من فلوسج..واخذي منه مفاتيح المحﻻت..وعقودهن وعقد البيت هم واوراق المصرف
هاااا..اني..اني اتحاسب ويه عمي..و..و...ﻻ..ﻻ ما اكدر يزن..
ليش متكدرين انتي طالبة كلية وعمرج..فوك العشرين يعني مو جاهلة وﻻطفلة..وﻻقاصر..وتكدرين تاخذين كل امﻻكج وتتصرفين بيها بكيفج..
لا..ﻻ ما اكدر اواجه عمي..واخذ منه المفاتيح لو.... احاسبة انت..انت تعرف ابوك..يزن ابوك قاسي وعصبي واخاف يضربني واني موحمل ضرب ..لهسه جسمي مورم من الضرب..
لج شنو يضربج..انتي مصخنة ..اصﻻ بس تواجهي ويعرف انتي تدرين العقود باسمج..يكوم.يتلوكلج..ويصير ناعم مثل البريسم.
ﻻ..ﻻ..اني اخاف..
منين تخافين..اكو واحد يخاف ياخذ..حقة لج احجي واني بظهرج محد يكدر يمد ايده على شعرة منج..واذا حاول يضربج..والله اخذج للمركز..واقيم عليه دعوة..
يااااتشتكي ع ابوك..ع..مودي؟
مو ع مودج بس ع..مود الحق..اني ما اقبل بالباطل لو مهما يكون..بس الناقص..يقبل يشوف الباطل ويسكت عليه..
ﻻ..ﻻ..يزن اذا صرت ويايه ضد ابوك..راح تخسر اهلك..وانت سمعت امك..تكول غسق تلعب بعقلك..وتخليك..تخسر اهلك..
لج واذا خسرت اهلي شنو يطردوني من بيتهم.... خليهم يطردوني..اني رجال مينخاف عليه حتى اذا انام بالشارع..
ﻻ..ﻻ..اسم الله عليك..من نومة الشارع..
استغفر الله ..غسق انتي شكد عاطغية وكلبج رهيف ..غسق هاي الطيبة متفيدج وتخليج طول العمر مكفخة..للرايح والجاي..
ميخالف..بس ما اريدك..تخسر اهلك..
اهوووووهاي شلون سالفة..شوفي عندي طريقة ثانية باجر..الساعة 8 الصبح اجي للبيت اكول...الشرطة دزت عليج واخذج بالسيارة..ساعة ساعتين زمان ونرجع ومن نرجع..سوي نفسج جنتي يم الضابط..والضابط..حجالج كولشي وخﻻج تشوفين نسخ من العقود الموجودة بملف القضية..حتى من يعرفون انتي عرفتي الحقيقة من الضابط..يخافون وينطوج حﻻلج..
بس اني..اني ما اعرف امثل بسرعة يبين علية!
غسق لتخبليني..لج..صيري ذكية..صيري مثلهم و.. واخذي حقج..
