لعنـة آل دارو

بدايـة مريبة

_ مين القمر دي؟
_دي متجبـره لا دي الجبـروت نفسه يا أخي..
~ هي مين دي أصلا؟!
_ داليـا النجـار، صاحبـة العز اللي أنت شايفه دا كـله..
~ دي!!! دي متكملش 30 سنـه!! هي دي اللي هعمل معـاها المقابـلة؟
_ لا مش هي، أنت هتعمل مع كريم الأسيوطي و دا تـاني أكبر راس هنا في الشركة، خزنة الأسرار بتـاعت داليا وتقريبا مبتثقش في حد غيـره هنا، هيموت ويتجوزها بس هي مش موافقه..
~ بس ازاي دي في السن دا قدرت تكبر شركة بالحجم دا!!؟
_ علشـان دي تربيـة أدهم النجار اللي مات من أربـع سنيـن، أدهم كان أقوي بس هي بردو جبروت زي ما قولتلك، أدهم من غير اي حاجه كان الكل بيعمله الف حساب انما هي أول ما بدأت الكـل استهزأ بيها علشان كدا قست قلبهـا علي الكل و الغلطه كان ليها ألف حساب و خرجت كل الناس برا دايرة ثقتهـا، ما عدا كريم علشان دا كان صاحب أخوهـا و بيعتبروه اخ تالت ليهم..

نادت موظفة الإستقبـال:
" الأستـاذ رسـلان!! أنا بقول الأسم صح مش كدا!؟ "

ابتسم وقال بهدوء:
"أيوا يا فندم"..

" طب اتفضل حضرتك الأستاذ كريم مستنيـك "..

تحـرك رسلان للداخـل بكـل ثقـة و زادت ثقتـه عندما وجد شخص ودود وقف لمصافحتـه وأخبره بالجـلوس فجـلس رسلان أمامه ممسكا بالملف الخاص بـه..

قـال كريم بهدوء:
" أنت تخصص تجـارة انجليزي و متخرج بتقديـر جيد جدا، كويس يا رسـلان.. بس قبل اي حاجه يعني اي رسلان؟! "..

ضحك رسلان وقـال بهدوء:
" معناه الأسـد، الحكـاية إن والدتـي كاتبـة وهي كانت بتشوف اسماء كتير في الروايات وكان صعب عليها تسمي اسم عادي كـدا ف سمتني رسـلان "..

ابتسم كريـم:
" ربنا يخـليهـالك، نرجع بقي للشـغل.....

انتهـت مقابلتـه علي خيـر وشعر بالرضـا و تمني بداخـله أن يعمل بتلك الشركـة ذات الصيت الواسـع وبالفـعل بعد عشرة ايام تم تعيـينه في الشركـة وهو كان شخصا جـادا في عمله يؤديـه علي أكمـل وجه و ينتظم بحضوره و ذهـابه وبيوم تأخر عن موعد رحيـله وبقي جـالسا بالمكتب بمفـرده منهمكـا في بعض الأوراق أمامه و رحل معظم زملائه من حـوله..

خـرج كريم و بجـواره تسيـر داليـا وهي تتـابع بعض الأوراق و انتبهت علي صوت كريم:
_ رسـلان أنت لسه ممشيتش؟!..

قال رسـلان وهو ينـظر له ونهض عن كرسيـه:
" اه يا فندم قدامي بس عشـر دقايق هكمـل شـوية الشغل دول "..

سألته داليا:
" شغال علي اي؟! "

"براجع حسابات الإسبوع اللي فات يا فندم، أنا راجعتها مره و قولت أبص عليها كمان مرة قبل ما أسلمها لمدير الحسابات"..

" طيب و فيها اي مشكلـة؟! "

هز رأسه نفيـا:
"لا يا فندم مظبـوطه"..