من روض نجد والهوى معشوقها

7

بسم الله الرحمن الرحيم
لأ أستبيح القرآءة دون لايك

بعد أسبوع كامل مر على عائلة عقاب بهدوء بدون أي مشكله ومع رجوع عائلة صقر لديرتهم ..
ابوصقر: أنزلوا ونزلوا الأغراض لا تخلون شيء بالسيارة / هزوا راسهم بإيه وكملوا طريقهم لداخل بيت جدهم إللي استقبلهم بكل صدر رحب : يامرحبا تو مانور البيت مبطين عنا
صقر : مادريت إنك تشتاق عاد
خزه جده وبنبرة حاده: أشتقت لبنتي ماهوب لخشتك هذي يلا تلايط / لف أنظاره لثنيان إللي طالع : وين أنت بعد
ثنيان : عندي شغل مهم
الجد عقاب : وشهو .. لكن قاطعه وقاحة ثنيان وطلع بدون أي زيادة كلام وهذا إللي زاد النار إللي بداخله وصرخ بأسم كايد : بسم الله وشفيه
الجد عقاب : شف ولدك الداشر إللي ماهوب متربي
ابو نمر : اي واحد منهو
الجد عقاب : وهو فيه غير ثنيان الوغيد ؟
تنهد كايد وطلع من البيت ولا له نيّه يروح لثنيان أساسًا فقط تسكيت بأبوه وتوجّه لمكانه المجهول بعيد عن الديرة بكم مسافه : فتح الباب ولقى الترحيب إللي يحبه ، تقدم وباس خدها كنوع من السلام عنده : وش مسويه
لطيفة : ابد والله طفشانه لحالي ماعندي احد يسليني غير هالوغيد
لف أنظاره لعبدالعزيز ولده ( عمره ٦ شهور ) شاله ورجع أنسدح على الكنب يشكي للطيفه إللي صار بيومه ويرمي كل همومه عليها ولا كان منها إلا الموأساه إللي كانت تعجبه
تعريف بسيط /
لطيفة ( ٢٨ سنه ) توفت أمها بعمر ٢٦ وتركها أبوها ببيت لحالها جاهله وشهو مصيرها لكن ألتقت بكايد إللي كان طمعان بصغر سنه وقدر يجذبها له ويتزوجها ويجيب منها الولد ولطيفه المهرب الوحيد له من زوجته وعيالهم ومن مشاكلهم اللي ما تخلص
لطيفه بتردد : كايد
ابو نمر : سمي وش فيه
لطيفه : يعني ماودك نلعن هالزواج ؟
ابو نمر : وش جاب هالطاري
لطيفه بدت تتحلطم عنده وكونه شايب يحب هالعاده : يعني أنت تدري أنا طفشانه ماعندي غير عزيز اناظر له ويناظر لي لا هو اللي يسولف عشان اسولف معه ولا هو اللي يفهمني وماعندي حتى احد اروح له وش اسوي اقعد لحالي
ابو نمر : خلي هالمشاكل تخلص وثم لك اللي تبين
لطيفه بزعل : من تزوجتك وأنت تقول لي نفس الكلام
ابو نمر : تدرين ما يرضيني زعلك صح ؟ بس وش اروح اقولهم والله هذي زوجتي وهذا ولدي وأصدمهم
صدت عنه بزعل : خلاص مابي

ابو نمر : يبنت الحلال مالك إلا إللي يرضيك عطيني بس شهر أجهز لك بيت قريب وأبشري بإللي تبينه
هالحين أنا بمشي للشغل توصين على شيء ؟
لطيفه بأبتسامه: لا سلامتك
طلع من البيت بعد ما تأكد إن مافيه احد لكن تفاجئ بوجود ثنيان !
ثنيان : ايييه يبه حركات والله
ابو نمر : أنت وش اللي جايبك هنا
ثنيان : وشفيك خفت ترى مانيب معلم احد بس علمني حلال ولا حرام
ابو نمر : استح على وجهك يالوصخ مانيب زيك كل مواضيعي حرام
ثنيان : ياخي شفيك عصبت بس أسأل أمي تدري ؟
ابو نمر : لا ماتدري ولا بتدري أصلًا سامعني
ثنيان : ما أقدر أسمعك إلا بمقابل
ابو نمر : فلوس وأعطيك بس انقلع عن وجهي
ثنيان : فلوس ؟ مابي ولا قرش
ابو نمر : اجل وش اللي تبيه دامك ماتبي فلوس
ثنيان : يمكن بنت عمي تميم اخت سلطان
أنقلب وجه أبو نمر بصدمه وكيف عرف تميم وبنته : نعم وش إللي تقوله أنت
ثنيان : ما يهمني إن كنت تعرف ولا بس تراي رايح لديرتهم وبتصلح بينه وبين جدي ثمن اخذ بنته
ابو نمر : مالي شغل بهالموضوع
ثنيان : دام مالك شغل حتى أنا مالي شغل وبروح لامي وأقولها شفت ابوي طالع من بيت به حرمه
ابو نمر بتوتر : خلاص تعال تعال
ثنيان : أول شيء علمني سالفته من البدايه للنهاية
بدأ أبو نمر يروي سالفة أخوه تميم وأبوه لثنيان
قبل - ٢٧ سنـه -
تميم : يبه أنت تدري إني أبيها وهي تبيني ليش معيي وهي بنت عمي وش إللي بيمنعني
الجد عقاب : أنا بمنعك وماعندي أي سبب بس كذا
تميم : يعني مضاوي تاخذ أخو سهى عادي بس تميم لا !
الجد عقاب : أنت شكلك ما تفهم أقولك منت ماخذها وبتأخذ بنت خالتك غصب عنك
تميم : قسم بالله العظيم إن مريم تحرم علي ولأني بماخذ إلا سهى وإن ما خذيتها بتطيب بأخذها بغصب وعلم يوصلكم ويتعداكم ماهوب تميم إللي يوقفون بوجهه وأنت خابرني وخابر علومي ولا علي من احد ولو كان أبوي
الجد عقاب : يعني صامل ؟
تميم : إيه صامل
طلع الجد عقاب متوجه لأخوه سعود لجل يقوله يأكد ملكة سهى وأمام المسجد عبدالمحسن
سعود : دق عليه قل له يجي الحين وينتبه تميم لا يشوفه / كانوا جاهلين بإن سهى بالأساس ناويه على نيّه ثانيه مع تميم ..
دخل عبدالمحسن البيت ورحبوا به وجا وقت الكتاب .. لكل فجأهم صوت الرصاصه إللي توسطت عبدالمحسن من تميم
وقف عقاب بصدمه من فعل ولده : تميييم وش سوووويت!!!
تميم : قلت لكم محد بيأخذها إلا أنا .. والصدمه إللي صدمتهم أكثر سهى بعبايتها وشنطتها بدون لا تناظر بأي أحد فيهم ركبت سيارة تميم وأسرع قبل لحد يوصل له ..
وأعلنوا موت عبدالمحسن وتستروا على تميم وفعلته..

ابو نمر : عرفت السبب ؟ وليش أبوي ما يبيه وجايني أنت يا أبو ٢٤ سنه تبي تصلح بينهم
ثنيان : أقدر وعقاب يقدر
طلع عقاب من المكان إللي كان به : وين مكان تميم
ابو نمر : عقاب لا تسوي شيء بتندم عليه بعدين تميم مالنا دخل به
عقاب : ياعم علمني مكان تميم وماعليك بالباقي
ذكر له ديرة بنهاية نجد : وأنتبه تميم ماهوب سهل
عقاب : ولا أنا سهل وسرك ببير
أرتاح كايد من خوفه من جنون ثنيان الطايش ورجع للبيت بدون لايشيك على شغله نهائي
أما عقاب وثنيان فكروا بفكرة لجل يشغلون أهلهم عنهم فترة تعتبر طويلة .. بعد ما وصلوا للبيت توجه عقاب لجده وعمامه بالمجلس كعادتهم
عقاب : السلام عليكم
الكل : وعليكم السلام
عقاب : والله أنا ودي أكلمكم بموضوع مهم شوي
ابو كايد : عساه خير
عقاب : لا خير خير ان شاء الله ، جدي سمعت إن صار موقف بينك وبين ثنيان اليوم
الجد عقاب : قليل الحياء ما يستحي على وجهه
عقاب : عشان كذا أنا ودي أروح أنا وثنيان ونترزق الله بوحده من الديار القريبه
الجد عقاب : وش دخل هذا بهذا وتبي تترزق وشهو اللي مانعك من ديرتنا
عقاب : يا جدي أنت ما فهمت علي أنا ودي ابعد ثنيان لجل يحس بالنعمه وإنه بيضيع من دوننا ولازم يضبط حاله ويعتمد على حاله
ابو نمر : عزالله صادق يا يبه خلهم يروحون
الجد عقاب : وشوله ما تضبط ولدك أنت
ابو نمر : يا يبه ثنيان طايش ما يفهم له إلا اللي بجيله
ابو عقاب : ايه بالله خلهم ماهم مطولين
ابو كايد : وإن طولوا فهذا من مصلحتهم يشدون حيلهم ويعتمدون على نفسهم وعيالنا ونخبرهم
الجد عقاب : ثنيان ما ينأمن له
عقاب : والله ماهوب حاصل مكروه ما عليك ياجدي
الجد عقاب : متى تمشون ؟
عقاب : إن قاله الله ف بكرا ماشيين
الجد عقاب : وشهي الديره اللي بتروحون لها
كذب عليه عقاب بديره قريبه لهم ولا يتوقع واحد بالميه إنهم بيكونون بنفس الديرة اللي بها تميم
طلع عقاب من عندهم وتوجه لكايد : ولد
كايد : هلا وش بلاك
عقاب : آفا يابو عقاب الحين أنا وش بلاي
كايد : لا صدق وش بلاك
عقاب : بسافر
كايد : اسلمم وين
عقاب : عشان الدلخ ثنيان .. وعلمه السالفه لكن ماهيب بالضبط زي ما قالها لجده وكان هو بنفسه مستغرب ليش يكذب على كايد وهو أقرب الناس
وبحكم إن كايد يعرف عقاب صح عرف إنه كذاب بس ما أهتم الأهم إنه يبعد عن الهنوف وبس
هز راسه كايد بدون أي كلمه ودخل داخل البيت
أما بالطرف الثاني الهنوف إللي كانت تسمع كل شيء وحز بخاطرها إنه بيسافر مع إنها ماتدري ليش تضايقت وهو ما يعني لها شيء وتكرهه

« اللهم صل وسلم على نبينا وحبيبنا محمد »