Reservoir Dogs (MMTranslation)

1.1: Taste

(Unicode) အနည်းငယ် အသားမာတက်နေသောလက်က သူ၏လည်ပင်း အနောက်ဘက်ကို ဖွဖွကလေးသပ်လိုက်ပြီး လက်ချောင်းထိပ်များက ရောင်ကိုင်းနေသောနေရာကို တမင်တကာ ထိတွေ့နေသည်။

သေးငယ်၍ ကျုံ့နေခဲ့ပြီဖြစ်သော ဂလင်းများသည် ယခု အသစ်ထိုးသွင်းလိုက်သည့် ဟော်မုန်းများ၏လွှမ်းမိုးမှုအောက်တွင် ပြန်လည်ဖွံ့ဖြိုးပြီး ပြီးပြည့်စုံလာခဲ့သည်။ ၎င်းတို့သည် လောလောဆယ်မှာတော့ အနည်းငယ် ရောင်ကိုင်းနေပြီး မွေးကင်းစ ကလေးငယ်၏အရေပြားနှင့် ဆင်တူကာ မယုံနိုင်လောက်အောင် နူးညံ့၍ ထိခိုက်လွယ်သည်။

ထိတွေ့နေခြင်းကြောင့် ရှောင်ကျိုး၏ခြေထောက်များသည် အားနည်းသွားသည်ဟု ခံစားခဲ့ရသော်လည်း သူသည် မတ်မတ်ရပ်နေဆဲဖြစ်သည်။

သူ၏လက်မောင်းကြွက်သားများသည် သံမဏိပြားများကဲ့သို့ တောင့်တင်းနေပြီး သူ၏ဂလင်းကို ထိနေသောလက်အား ဖမ်းဆုပ်ပြီး လိမ်ချိုးပစ်ချင်နေသော ပြင်းပြသည့်စိတ်ဆန္ဒကို ထိန်းချုပ်ထားရသည်။

ကပ္ပတိန်ဝမ်သည် စားပွဲကို နံပါတ်တုတ်ဖြင့် ခေါက်လိုက်ပြီး သတိပေးသည့်အနေဖြင့် ချောင်းဟန့်သံပေးလိုက်သည်။

ထိုအမျိုးသားသည် စောင်းငဲ့၍ တစ်ချက်ကြည့်လိုက်ပြီး သူ၏လက်ကို ပြတ်ရုတ်လိုက်ကာ ရှောင်ကျိုးကို မေးလိုက်သည်။

"မင်းက အယ်ဖာ ဖြစ်ခဲ့ဖူးတာလား?"

ရှောင်ကျိုး ခေါင်းညိတ်လိုက်သည်။

"ဟုတ်တယ်"

"မင်းက ဒီလိုမျိုး ထွက်သွားချင်တာလား?"

ရှောင်ကျိုးက သူ၏နှုတ်ခမ်းများကို တွန့်လိုက်ပြီး

"ဟုတ်ကဲ့"

ထိုအမျိုးသားက ညင်သာစွာ ရယ်မောလိုက်သည်။

"နောင်တမရဘူးပေါ့?"

"နောင်တရစရာ မရှိပါဘူး"

ထိုအမျိုးသားသည် သူ၏အနောက်မှထွက်သွားကာ ဘေးတိုက်ရပ်နေခဲ့သည်။ ရှောင်ကျိုးသည် အရပ်ရှည်သော်လည်း ထိုအမျိုးသားသည် ဦးခေါင်းတစ်ဝက်ခန့် ပို၍အရပ်ပိုမြင့်ပြီး သူ့အပေါ်သို့ အရိပ်တစ်ခု ကျရောက်လာစေသည်။