وضعت أخر متعلقاتها الشخصية فى حقيبة السفر الكبيرة ، تنهدت وهى تنظر جانبها لتلك الدمية الموضوعة على الكومود لتقترب وتلتقطها ، اخذت تنظر لها بحنين والدموع تتلألأ فى عينيها قالت وهى تمسح على رأسها
" عمرى ما هنساكى يا حلا انا بس محتاجه اكون احسن يا حبيبتى ، هتفضلى طول عمرك جوا قلبى "
ثم عانقت الدمية بشدة ووضعتها مكانها مرة اخرى
طرقت نرجس على الباب برفق ثم دخلت وهى تقول بحماس
" ها جهزتى ولا لسه "
مسحت كارما الدمعه التى فرت من عينها وقالت
" اه خلاص ، نرجس انتى متأكده انك هتسيبى شغلك هنا وهتيجى معايا "
قالت بسعادة
" يعنى هى المطاعم خلصت انا شيف قد الدنيا والف مطعم يتمناني، وبعدين انا كنت جاية اكلمك فى الموضوع ده "
ردت كارما باستغراب
" موضوع ايه "
" بصى يا ستى انا كلمت وائل ابن خالتى هو عايش فى الغردقة وبيشتغل هناك وجابلى شغل فى مطعم كبير هناك وكمان ظبطلنا شقه ايجارها كويس نعيش فيها "
ابتسمت كارما قائلة بامتنان
" انا مش عارفة اشكرك ازاى على اللى بتعمليه
معايا ده "
قالت نرجس بمزاح
" لا نبقى نشوف حكاية الشكر دى بعدين يلا عشان منتاخرش على الباص "...
***
انطلقت تلك الحافلة الكبيرة لوجهتها (الغردقة)
جلست كاما تنظر من النافذة نحو الطريق ، فهى لم تكن تخرج من منزلها منذ فترة طويلة الا لبعض الزيارات للطبيب النفسي ، شعرت لوهلة انها نسيت شكل الشارع والاشجار والسماء وايضا الناس !
استندت برأسها للخلف واغلقت عينيها فمازال الطريق طويل امامهم، وبعد مرور بضع ساعات توقفت الحافلة فى كمين ليتم انزال جميع الركاب لحين الانتهاء من تفتيش الحافلة قالت كارما بتساؤل
" هو فى ايه "
ردت نرجس توضح لها
" ياربى بقى هيفتشوا الباص يلا يا بنتى ننزل "
وقفت كارما برفقة نرجس وباقى الركاب منتظرين انتهاء الضباط من التفتيش ،لفت نظر كارما صوت طفله صغيرة تتحدث مع والدتها بحماس وسعادة وهى تقول
" ماما احنا رايحين البحر "
لترد والدتها بأبتسامة
" اه يا حبيبتى "
لتقفز الطفلة مكانها بسعاده وهى تتناول قطعة الشيكولاته التى تمسكها فى يديها .
ابتسمت كارما بحزن وعادت ذكرياتها مرة اخرى ..
