الحلقة الثانية عشر
غصون في مهب الريح
عبير سليم
...................
تاخديها معاكي فين يا شاهي عاوزه بنتي الوحيده اللي مطلعتش من الدنيا غير بيها الحاجه الوحيده اللي باقيالي تسيبني و تسافر معاكي أنا آسف مش حقدر على بعادها
شاهي : زين أنا بطلب ده عشان خاطرها هيا عشان تبقى كويسه فريده لازم تبعد عشان تنسى و ده مش كلامي ده كلام الدكتور مش قال قدامك آخر،مرة ان الافضل ليها انها تبعد زين انا حاخدها معايا و انت تقدر تجيلنا فأي وقت
زين أنا عارفه انت متعلق بفريده ازاي و أنا والله ما عمري كان ييجي فبالي اني افكر فحاجه زي دي أبدا لكن الظروف اللي احنا فيها دلوقتي هي اللي بتحكم فريده نفسيتها وحشه جدا و حالتها مبتتحسنش ونا لازم اسافر و انت حترجع شغلك و هي عندها دراسه لا حتعرف تذاكر و لا تركز لكن لو اخدتها معايا كلنا حنكون جمبها و ان شاء الله حالتها تتحسن و انت تقدر تجيلنا باستمرار وان شاء أول ما حالتها تستقر ترجع هي مش حتفضل معانا علطول ده شئ مؤقت عشان خاطر فريده وافق يا زين
زين : و دراستها انتي ناسيه ان عندها ثانويه عامه
شاهي : ححولها ورقها و تكمل الدراسه عندنا و اول ما حالتها تتحسن ترجع ان شاء الله
اضطر زين أدام الحاح شاهي عليه انه يوافق و ودعت غصون فريده و هي مش قادره تصدق انها حتبعد عنها و تسافر و سافرت فريده مع خالتها و كانت بتتكلم مع غصون فيديو كل يوم و يطمنوا على بعض
و فيوم غصون خرجت من الدرس و راحت لباباها الشركه و استأذنت منه تدخل تسلم على زين و اول ما دخلت عنده و شافها فرح جدا و قام من مكانه و قعد معاها عالانتربه يطمن عليها و على أخبارها
عامله ايه يا غصون و اخبار مذاكرتك ايه يا جميل
غصون و الدموع بتجري فعيونها : انا فريده وحشتني اوي يا اونكل حياتي من غيرها وحشه أوي حسه ان كل حاجه ناقصاني يومي مش عاوز يكمل و هي مش موجوده فيه
يقرب منها زين و يمسحلها دموع عيونها : طب عالاقل انتي معاكي بابا و ماما ربنا يخليهم لك لكن انا اعمل ايه انا مبقاش فحياتي حاجه يا غصون انا برجع البيت بحسه قبر ببقى مش طايق اقعد فيه لحظه
و بعدين هو مش انتم بتكلموا بعض على طول
غصون :الكلام في التليفون مش زي ما كنا مع بعض احنا كنا كل يوم مع بعض يا اونكل
زين : ان شاء الله تيجي قريب يا حبيبتي
المهم طمنيني عليكي عامله ايه يا حبيبتي في المذاكره
غصون : مش كويسه
زين : ليه بس
غصون : حضرتك عارف اني طول عمري متعوده اذاكر مع فريده مش عارفه اركز في حاجه
زين : لا يا غصون مينفعش الكلام ده فريده هناك بتذاكر و خالتها معاها و مازن ابنها بيساعدها و انتي كمان لازم تذاكري عشان تنجحي و تجيبي مجموع كبير تدخلي بيه الكليه اللي نفسك فيها
غصون : ان شاء الله يا اونكل بس في حاجات صعبه أوي مش فاهماها
زين : انا يا ستي معاكي
غصون : بجد يا اونكل
زين : أيوة طبعا يا غصون هو انا يعني ورايا ايه تعالي هنا و يا ستي بعد ما اخلص شغل اقعد معاكي و باباكي يستنانا و تروحي معاه
و كمان لو حابه اخللي بابا يجيبك النادي انا بروح النادي اوقات كتير و بكون لوحدي نقعد مع بعض و اذاكرلك الجو بيكون حلو اوي
غصون : ربنا يخليك يا اونكل يا رب انا موافقه طبعا بس خايفه بابا هو اللي ميوافقش
زين : و بابا ميوافقش ليه
غصون : حيقوللي اني حعطلك
زين : حتعطليني لا مش حتعطليني و لا حاجه و ملكيش دعوه ببابا انا حكلمه
غصون : يا حبيبي يا اونكل ربنا يخليك لية يارب انا بحبك اوي يا اونكل
زين : و انا كمان بحبك اوي يا غصون
يمر اليوم و يرجع زين البيت و يتصل على فريده يطمن عليها : وحشتيني اوي يا فيري
فريده : وحضرتك اكتر يا بابي
يسمع صوت بكاها
زين : ليه بس الدموع دي يا فيري
فريده : بابي حضرتك مسامحني بابي حضرتك مش زعلان مني
زين : انا ازعل منك يا فريده ده انا مليش في الدنيا دي غيرك يا حبيبتي
فريده : بس انا مش قادره انسى اني كنت السبب فاللي حصل مش قادره اسامح نفسي مش قادره يا بابي مش قادره
زين : لا يا فريده مش هو ده اللي اتفقنا عليه يا قلب بابي انتي مكنتيش السبب فحاجه ده قدر ربنا و مشيئته و انا اللي خلاني أوافق على انك تبعدي عني هو عشان تكوني كويسه مش عشان تبقى بالشكل ده فريده انتي وعدتيني انك تحققي حلم مامي و لازم تكوني اد وعدك لية
فريده : حاضر يا بابي بس حضرتك وحشتني أوي مش حتيجي بقي
زين : ان شاء الله يا قلبي اول الشهر بأمر الله حجيلكم حظري مين كان عندي في المكتب النهارده
فريده : مين يا بابي
زين : حبيبتك
فريده : غصون
زين : وحشتيها أوي و قعدت تعيط
فريده : يا حبيبتي يا غصون هي كمان وحشتني أوي عارف يا بابي برغم اننا بنتكلم مع بعض كتير لكن بردو مش زي ما كنا بنقعد مع بعض و نسهر مع بعض و نذاكر مع بعض احساس تاني خالص
زين : طب ياللا بقى ارجعيلنا يا فريده
فريده : حاضر يا بابي
