الحلقه الحادية عشر
غصون في مهب الريح
بقلمي: عبير سليم
.................. ...
آيات الذكر الحكيم تصدح في المكان جو يملؤه الحزن قلوب منفطره على من فارقت الدنيا في غفوه من الزمن
يجلس و هو تائه بين الوجوه لا يدري اين هو و لا من حوله الجميع يقبل عليه و يواسونه بينما هو في عالم آخر غير مدرك كل ما يدور حوله
شد حيلك يا باشمهندس ربنا يجعلها آخر الأحزان
زين : راحت يا محمود مراتي راحت مني فغمضة عين كانت معايا قبلها بساعات قليله كنت بوعدها اني ححاول اعوضها عن سنين تعبها و اني مش حسيبها تقوم هي تسيبني ببساطه كده طب ازاي
محمود : و لا تدري نفس ماذا تكسب غدا ولا تدري نفس باي أرض تموت
استعين بالصبر يا بشمهندس و ادعيلها ربنا يرحمها
زين : ياااه عالدنيا كنت لسه من قريب أوي بدعيلها ربنا يشفيها و يا دوب ربنا استجاب و شفاها يقوم ياخدها عنده و ادعيلها بالرحمه ده احنا ملحقناش نفرح بخير شفاها يعني المرض اللي عاشت بيه سنين مموتهاش و تروح مني فغمضة عين كده
محمود : أمانته و استردها يا بشمهندس و احنا مؤمنين بالله و حنرضى بقضاؤه و قدره و نتقبله
زين : مش قادر يا محمود غصب عني مش قادر اتقبل فكرة ان صفا راحت خلاص و مش حشوفها تاني
محمود : كلنا حنروح يا بشمهندس ده قطر كلنا راكبين فيه و اللي بتيجي محطته بينزل و يا عالم الدور على مين المره الجايه
حضرتك لازم تقدر عشان خاطر فريده اللي محتاجالك دلوقتي أوي
زين : فريده اه يا بنتي اه يا وجع قلبى عليها مش عارف ازاي حتتخطي اللي حصل ده دي البنت من وقت ما مامتها رجعت و هي مبتسبش حضنها لحظه
كانت فرحانه أوي ان مامتها خفت خلاص و مش حتسيبها و تسافر تاني كل مره كانت بتسافر و بنبقى عارفين انها راجعه لكن المره دي التذكره سفر بس مفيش راجعه يا محمود
محمود : ربنا يصبر قلبها و قلبك يارب
زين : تفتكر حنقدر يا محمود
محمود : من رحمة ربنا بينا ان كل حاجه فحياتنا بتبدأ صغيره و تكبر الا الحزن هو الحاجه الوحيده اللي بتبدأ كبيره و بتصغر مع الوقت و ان شاء الله حتقدروا تساعدوا بعض و تقووا بعض
زين : يا رب يا محمود
تعبتكم معانا يا محمود من امبارح و انتوا معانا
محمود : يا خبر يابشمهندس حضرتك بتقول ايه بس ده احنا اكتر من الأهل
زين :و غصون مسابتش فريده لحظه
محمود : مش اختها و لازم تكون جمبها ربنا يقويها و يصبر قلبها يا رب
😢 لا أنا مش حقدر اصبر على فراقها مش حقدر يا غصون مش حقدر
غصون و هي بتحاول تهديها : اهدي يا فريده اهدي يا حبيبتي عشان خاطري ادعيلها يا فريده ماما محتاجه دعواتك دلوقتي يا حبيبتي
فريده : اهدى ازاي اهدى ازاي و أنا السبب أنا السبب في اللي حصل أنا اللي صممت إننا نخرج و انا اللي قلتلها تسوق هي عشان نكون براحتنا و انا اللي طلبت منها تطلع عالصحراوي عشان نروح المكان اللي عجبني لو مكنتش طلبت منها ده مكنش حصل اللي حصل مكنتش العربيه دخلت فينا مكنتش امي راحت راحت مني و مش حترجع تاني
غصون : طب عشان خاطري اهدي متتحركيش يا حبيبتي الحركه غلط عشانك
فريده : يا ريتني كنت انا اللي رحت مش هيا انا ملحقتش اشبع منها يا غصون ملحقتش ده انا كنت لسه بقول الحمد لله اخيرا مامي حتفضل معايا علطول و مش حتسافر تاني تقوم تسيبني بردو و تسافر بس المره دي غير كل مره المره دي مش حترجع تاني مش حشوفها تاني خلاص انا عاوزه مامي عاوزه مامي
انهيارها و بكاها على فراق امها كان فوق الوصف و غصون بتحاول تهديها لكن من غير فايده
