ဝလုံးလေး

အပိုင်း(၂၂)

**Media က သီချင်းလေး အရင်နားထောင်ကြည့်ပေးပါနော်***

"သူနဲ့နှစ်ယောက်ချိန်းတွေ့ရာ~~ ကန်တော်ကြီးစောင်းမှာ ~~ချုံပုတ်ကလေးကို အတင်းဖြဲ နေရာလေးကောင်းလိုက်တာ~~~"

မနက်အစောထ အမေ့ကိုထမင်းကူချက်ပေး၊ ရေနွေးကူတည်ပေး၊ စိုက်ခင်းတွေကိုရေလောင်းပြီးတာနဲ့ မနက်စာထမင်းကြော်ပူပူလေးစားကာ ရေမိုးချိုးထားတဲ့ ဝလုံးက ဒီနေ့ဆိုင်ပိတ်ကာ ဦးတည်နှင့်မြို့ပေါ်လိုက်သွားမည်ဖြစ်သည်...။

မဝတ်တာကြာပြီဖြစ်သော နှုတ်သီးထော်ထော်နဲ့ဘဲအရုပ်ကလေးပါတဲ့ တီရှပ်အ‌ဝါရောင်တောက် တောက် ကလေးနဲ့ အနက်ရောင်ဘောင်းဘီတိုလေးဝတ်ထားတဲ့ဝလုံးက သီချင်းလေးညည်းကာညည်းကာဖြင့် အပြင်သွားရမှာမို့ ရွှင်မြူးနေလေသည်...

အဝတ်ဗီရိုက မှန်မှာမြင်နေရတဲ့မျက်နှာဝိုင်းဝိုင်းလေးတွင် ပါးကွက်ကလေးနှစ်ကွက်လိမ်းထားသေးသည်..
သူပြင်ဆင်ပြီးတာနဲ့ ဦးတည်ဆီသွားမည်။ သူ့အတွက်အချိန်တွေပေးပြီး တကူးတကလာလာခေါ်တတ်တဲ့ အကျင့်ကို သိနေ၍ ဦးတည်အံ့ဩသွားအောင် သူကအရင်ဦးတည်အိမ်သွားမည်ဖြစ်သည်...

"သူကလက်ကလေးလှမ်းကိုင် ~~ ရင်တုန်သွားခိုက်မှာ ~~ သေနာကျတွေချောင်းကြည့် ~~ အမလေး ရှက်လိုက်တာ~~အဲ ဦးတည်"

ခေါင်းလျှော်ထားတာကြောင့် ရေကောင်းကောင်းမခြောက်သေးတဲ့ ဆံပင်ခွေခွေလေးတွေကို လက်ဖြင့်ဖွကာ အမေတို့ခေတ်ကခပ်ဆန်းဆန်းသီချင်းတစ်ပုဒ်ကိုညည်းရင်း အခန်းပြင်ထွက်လာတဲ့ဝလုံးက ရေနွေးကြမ်းပန်းကန်ကိုလက်ကကိုင်ရင်း သူထွက်လာတာကိုကြည့်‌နေတဲ့ဦးတည်ကို တွေ့လိုက်ရသည်...

သူလည်းလန့်သွားသလို ဦးတည်ကလည်း သူ့ကိုကြောင်ကြည့်နေသည်... လက်ထဲကရေနွေးခွက်ကို ခုံပေါ်အသာပြန်ချပြီး လှစ်ခနဲပြုံးလိုက်တဲ့ဦးတည်ကြောင့် ဝလုံးနားရွက်ဖျားတွေရဲသွားသည်...

သေလိုက်ပါတော့...အခုတလော အမေဖွင့်နေကျရေဒီယိုမှာလာနေကျ ဂန္တဝင်တေးသွားများအစီအစဉ်က ကြားလိုက်မိတဲ့သီချင်းနဲ့ အမေ့ကို 'စ' နေကျမို့ ပါးစပ်ထဲစွဲသွားတာ...