رواية أقدار

بارت ٣

يحس بالضجر وهو ينتظر مسك الجوال واتصل واول ما انفتح الخط تكلم بنفاذ صبر: ما في أحد !!،
ام عمار بقلق : تأكد يمكن تنتظرك وانت ما شفتها !!
عزام وهو ماسك نفسه : يا عمتي صار لي قريب نص ساعه والمدرسه تقريبا فاضيه !!
ام عمار بخوف : وين طست هالبنت ؟!
عزام بغضب : انا فاضي لها ؟!
والا سواق عندها !
ام عمار تهديه : يا عزام طول بالك بعدها صغيره
ارجع دور مره ثانية الله يوفقك !
عزام بدون نفس : ان شاء الله
قفل الخط وهو يفكر وين طست !!
ناظر ساعته ما عنده وقت ما بقى وقت عن المحاضره وتبدأ !
وما استفاد من البريك لا اكل ولا شرب وهو يدور على صنوايت
زفر بضجر يبغى يفقع وين رح يلاقيها
/؟!!،
**
**
**
نزلت ساره وهي ماسكه يد عائشه : أخاف أمك تزعل !
عائشة هزت رأسها بالرفض : لا تخافين ما رح تقول شيء !
وبعدين انت ضيفه !
وختمت كلامها بابتسامة
مدت يدها تفتح الباب استغربت إنه مقفل
ساره عقدت حواجبها : أمك مو بالبيت ؟!
عائشه ضربت جبهتها : نسيت قالت لي الصبح إذا ما لقيتها اروح لبيت صبحيه وأشرت على بيت صبحيه
تعالي نروح !
ساره هزت رأسها بالرفض : لا ما أبغى ننتظرها هنا !!
عائشه بموافقة : خلاص تعالي نلعب طوف هنا !
تلعب مندمجه باللعب ومبسوطه على سوالف عائشه
قاطعهم مرور السياره ووقفت قريب منهم
عائشه بغضب : ما في غير ذي الطريق !،
قطع علينا اللعب !
نزل من السياره وهو مفول من العصبيه مثل ما توقع رايحه مع هالزفته
عائشة فتحت عيونها : شوفي من جاء ؟!
عزام أشر لساره بغضب : تعالي !
وقفت عائشه بالنص و هي تتخصر بطفوله : لا والله !
ساره ما رح تروح معك !
وناظرت ساره تشجعها : قولي له إني صرت أمك !
علشان يروح !،
عزام واصله معه العصبيه : انقلعي من وجهي اشوف !
وانت تعالي خلصيني !
ساره منحرجه من عائشه كيف تتركها تكلمت بهدوء مع عزام : بس عيشه عزمتني على الغداء !
ناظرها بسخريه وهو رافع حاجب : والله !!
صايره مهمه يا ام القمل ؟!
عائشه رفعت أصبعها بتهديد : لا تغلط عليها !
ساره ناظرت عائشه تدافع عن عزام : ما يدري إنه القمل راح
وناظرت عزام وابتسمت : رأسي ما فيه شوف !
قاطعها وهو يسحبها بقوه نحو السياره
فتح الباب الخلفي ورماها وقفل الباب بعصبيه ونفض يدينه بقرف
وقبل ما يركب وقفته يد صغيره : رجعها يا
قبل ما تكمل دفها بقوه على الارض
وركب السياره وحركها بسرعه
ناظرت من الشباك عائشه على الارض
لامت نفسها كله بسببها
حطت يدها على جنبها لما دفها بالسياره
تحس تبغى تبكي من الالم
تحاملت على نفسها وناظرته والدموع تلمع بعيونها وصوت مخنوق : اضربني بس لا تضرب
عيشه حرام
رميتها على الارض!
زمت شفايفها تمنع تساقط الدموع : اخاف انكسرت يدها !
امها مو بالبيت !،
حرام!
وبصوت مبحوح : اضربني بس لا تضربها
وقف السياره والتفت لها : لا تستعجلي على رزقك !،
نزلت نظرها وبصوت مخنوق : آسفه
نزل من السياره مطنشها وحاس بالندم لأنه دف عائشه خاف يكون صار لها شيء !
دخل المحل وهو يجول بنظره على شيء مناسب
**
**
**
بعد ما نزل من السياره شدت مكان الالم
ونزلت دموعها غصب عنها
خافت ييجي بأي لحظه ويشوفها تبكي ويظنها بزر بعدها تبكي
صارت تمسح دموعها
شافت علبة مويه اخذتها وغسلت وجهها
ونشفته بمريولها بسرعه
اخذت نفس وهي تحس بوخز مكان الضربه
شافته جاء ومعه كيس
ركب السياره وحرك بهدوء ورجع من نفس الطريق
وقف باب بيت عائشه وشافها جالسه باب بيتهم
ناظر ساره بحزم: اذا نزلتي اكسر رجلك فاهمه !
هزت راسها بطاعه بدون اي كلمه
أخذ الكيس ونزل من السياره
جالسه باب بيتهم وكأنها متسوله وتكلم نفسها وتتوعد وتهدد!!
لما شافت السياره وقفت بغضب وهي تناظر عزام : وين ساره يا حرامي !
تقدم منها وابتسم : أنا آسف ما كان قصدي ادفعك بس كنت معصب !،
عائشه بعصبية وهي تشبر بيدينها : بسببك ما اقدر اقوم واجلس
ابتسم وهو يشوفها واقفه : كيف وقفتي لما شفتيني يا الكذابه ؟!،
عائشه تغير الموضوع : وين ساره ؟!
عزام ابتسم لأنه السياره مظلله ما تشوفها : رجعتها للبيت
ومره ثانيه ما تتكرر هذي الحركه !،
أهلها قلقوا عليها وهم يدورون عليها !،
كنا رح نبلغ الشرطه !
بلعت عائشة ريقها بخوف
ابتسم على ملامحها الخايفه : أنا آسف وهذي
هديه اعتذار
أخذت الهديه وفتحتها بسرعه
وابتسمت بفرح لما شافت لعبه كبيره !
وبعدها تحولت ملامحها للكشره : ما ابغاها !
تركها بدون اي كلمه وتوجه للسيارة ..
**
**
**
تناظرهم من الشباك وهو يكلم عائشه
كانت خايفه يضرب عائشة مره ثانيه
بس ابتسمت بألم لما شافت اللعبه الي أعطاها لعائشه !
ليه ما جاب لها مثلها !!
حز بخاطرها !!
هزت رأسها بالرفض أهم شيء عندها عائشه
مبسوطه بالهديه وما رح تقاطعها عائشه علشان عزام !
عفست ملامحها بألم وهي تحس بالوجع رجع مره ثانيه !!!
ركب السياره وحرك بدون اي كلمه !
غمضت عيونها لثواني من الالم واخذت نفس
ورفعت رأسها وناظرته بعيون لامعه وصوت مبحوح : أنا آسفه
لا تزعل مني !
عزام ناظرها من المرايه بعصبيه: انكتمي ولا تكلميني !
ساره ابتسمت بحزن ونزلت رأسها : ان شاء الله
ولفت وجهها من جهة الشباك وهي ماسكه نفسها لتنفجر من البكاء
ما تحب احد يصرخ عليها او يزعل منها وفوق هذا
جنبها يوجعها !!
**
**
**
**
ام عمار بقلق عزام ما رد لها خبر وتخاف تتصل فيه ويثور بوجهها تعرفه لما يعصب !
وما تبغى السالفه توصل لخلف لأنها تعرفه
مجنون وما رح يرحمها
وبنظرها ساره بعدها طفله صغيره بريئة !!،
سمعت صوت السياره بالكراج
طلعت بسرعه
وشافت عزام نزل ساره و الظاهر إنه معصب !
عزام مسك ساره من اذنها وبصراخ : والله لو تعيدين هالحركه إلا أكسر رأسك !
الدنيا سايبه عندك !
تقدمت أم عمار بضيق : اتركها !
عزام شد اقوى وهو يناظر ساره : انا وش قلت ؟!
رفعت ساره رأسها وابتسمت بألم وعيون منكسره: ما رح اكررها !،
أم عمار سحبتها من عزام بقهر : قطعت إذنها ؟!
عزام بغضب : تستاهل هالحيوانه !
بسببها راحت علي المحاضره !
ام عمار عفست ملامحها : اعوذ بالله القسوه عندكم وراثه!!
ومسكت يد ساره بحنيه : تعالي معي !!
دخلوا البيت ام عمار ناظرتها : وين كنت ؟!
ساره وهي تحس بالغصه : عزمتني عائشة صديقتي ورحت معها !
ام عمار بتفهم : هذي جارتكم ؟!
ساره هزت رأسها بدون كلام
ام عمار : ما يصير تروحين بدون ما تعطينا خبر !!
ساره بصوت مخنوق : آسفه ما رح اكررها !!
وابتسمت والدموع تلمع بعيونها !
ناظرتها أم عمار وقلبها تقطع عليها وهي تشوف إذنها حمراء : روحي بدلي ملابسك علشان الغداء !!
حمدت ربها ام عمار انه عيالها مو هنا لو عرفوا كان خبروا أبوهم
وهي تعرف خلف وعصبيته !!
**
**
**
**
دخل البيت معصب ومقهور من ساره وبدون نفس رد السلام
ام عزام باستغراب لما شافته: وعليكم السلام .... غريبه راجع الحين !
عزام بنرفزه :يعني ارجع ؟!!
ام عزام ابتسمت :-لا مو قصدي بس انت عندك محاضره
قاطعها وهو يجلس وبغضب: بفضل ساره الزفته
راحت علي المحاضرة !
ابو عزام : وش دخل ساره ؟!
عزام بقهر : ابنة عمك المصون رايحه لبيت جيرانهم قال عازميتها جارتهم !!
ابتسمت ام عزام :يا حليلها صاحبة واجب
عزام بغضب : مبسوطة على حركتها ؟!!
ابو عزام : لازم إخوانها يشدون عليها وما يتركونها كذا ؟!
عزام بطفش : هالإخوان كل واحد بجهة هاج !
والشاطر يرميها على الثاني،!
ابو عزام : اذا مو قادرين على تربيتها أنا مستعد اربيها ونأخذ أجر هاليتيمه !!
قاطعه عزام: هذا الناقص تعيش عندنا!
ارجوك يبه خلي افكارك لوحدك انا اخواني قرفانهم !!
ابو عزام هز رأسه : الله يعيني عليك
!!
**
**
**
**
ماسكه اللعبه وتلعب فيها بعد ما خبرت أمها بالسالفه
بس ما جابت سيره ساره !!
اسماء لمست اللعبه صرخت عائشه وخبتها خلف ظهرها : انقلعي !!
اسماء بقهر : خايفه نأكلها ؟!!
نهى قلبها تقطع وهي تشوف اللعبه تجنن تبغى تحملها : من حلاتها هاللعبه ؟!
تقرف!!
وناظرت اسماء : اتركيها بابا رح يشتري لنا احلى منها !
عائشة بسخريه :بالمشمش يجيب لكم !
وبشماته : نسيت ذيك المره لما كنا بالسوق واشتريت انا لعبه وكنت تبغين وحده مثلها
وش قال لك بابا ؟!
وحركت حواجبها تقهرها !.
زمت نهى شفايفها بقهر وهي تتذكر كيف مسح فيها الارض إنها كبيره وتبغى لعبه !
اسماء بغيره: يا رب تخرب ! ،
**
**
**
**
كملت غداء وهي مبسوطه على الاكل أشكال وأنواع !!
ام عمار بأمر : يلا يا جودي نظفي الطاوله انت وليان !
وتركت المكان وتوجهت للمطبخ
لحقتها ساره بابتسامة : خالتي !
ام عمار ناظرتها : نعم !
ساره بابتسامة طفوليه : ممكن أساعدك ؟!
ام عمار ابتسمت : يا عمري !
تبغين تساعديني،!
هزت رأسها بحماس: كنت عند جدتي كل يوم أجلي وانظف المطبخ !
ام عمار ما حبت تكسر بخاطرها وهزت رأسها بموافقة
**
**
**
**
في اليوم الثاني كملت فطور بسرعه خايفه تتأخر عليه
وقبل ما تطلع من الباب لحقتها ام عمار بتنبيه: لا تروحين اي مكان فاهمه !
ابتسمت وهي تهز رأسها: إن شاء الله
وركضت باتجاه البوابة تنتظر عزام
متحمسه للمدرسه
توجهت لسياره عزام بابتسامة جميله فتحت الباب
ودخلت السياره بابتسامة: السلام عليكم
ناظرها بالمرايه وهو مكشر وحرك بدون اي كلمه!
سكتت وهي تشوف ملامحه من المرايه
نزلت رأسها بحزن ليه يعاملها كذا ؟!
أكيد زعلان منها !
بس هي ما كان قصدها تزعله !
بعد وقت وقف وبجلافه : انزلي بسرعه !
رفعت رأسها وابتسمت له : ان شاء الله
نزلت بهدوء وقفلت باب السياره وركضت باتجاه بوابة المدرسه .....
**
**
**
**
ليان كملت فطور وبرجاء: يا ماما خليني اعطل !
جودي تخصرت : اذا ليان بتغيب انا كمان ما رح اداوم !
عمار يثبت وجوده وكلمته تمشي : أقول كل وحده تنقلع قدامي أحسن ما اقوم بالعقال!
جودي رفعت اصبعها :انت ما لك دخل !
انا اتكلم مع ماما !
ام عمار جالسه تطقطق بالجوال تكلمت : رح اعد للثلاثه واذا شفت رقعة واحد فيكم يا ويلكم
عمار بقهر كان ناوي يطلع اخواته ويعطل : وبعدين مع هالدوام الي ما يخلص !!
جودي سحبته من ثوبه باتجاه الباب : امشي لو تجلس فوق رأسها ألف سنه ما اقتنعت !
ليان بقهر : افففففف من الحياه!
وطلعت خلف إخوانها
سلمان واقف ينتظر عمار : ليه تأخرت ؟!
جودي تكلمت قبله : فكر يقنع ماما ونعطل !
سلمان عفس ملامحه بقهر : أمك مثل عزام ممنوع العطل !
يتحكمون بحياتنا !!
عمار بتوعد : إذا ما عطلت باكر ما اكون عمار!
ابتسم سلمان بسخريه : امشي امشي !
وناظر جودي وابتسم : أخوك بس حكي !
هزت رأسها : حكي ويفرض عضلاته علينا !!
**
**
**
**
توجهت لسياره عزام بعد ما انتهى الدوام فتحت الباب بابتسامة : السلام عليكم
حرك السياره بدون ما يرد تضايقت ما تحب
أحد يزعل منها
تذكرت عائشه ناظرته : عائشة تقول لك شكرا على اللعبه
عزام ابتسم وناظرها بالمرايه :عجبتها ؟!
ساره ابتسمت وعيونها تشكي الحرمان : عجبتها حيل !
جابتها اليوم على المدرسه والمعلمه هددتها اذا جابتها رح تأخذها منها !
وابتسمت بألم تكمل : بالفسحه قلت لها ألعب فيها بس
قاطعها : لا تقولين لعبتي فيها؟!
اكيد وسختيها بيدينك ؟!
رفعت يدينها الصغيره والغصه بحلقها : شوف يدي نظيفه !
وكملت وهي تتظاهر بالابتسامه وطلعت اللعبه من حقيبة المدرسه : أعطتني لعبتها القديمة !
وقالت أخذها لي !!
عزام وهو يناظرها حامله لعبة قديمه بحضنها :يعني ما لعبتي باللعبه الجديده ؟!
ردت بغصه : لا
وابتسمت بألم : حلوه هذي اللعبه ؟!
عزام بسخريه : تشبهك !!!
ساره ناظرته باستغراب : كيف تشبهني ولون عيونها ازرق ؟!
ضحك بصوت عالي بعد ما  وقف السياره: فعلا إنك خبله !!!
أقول انقلعي للداخل بسرعه !
طالعته وهي تمشي للداخل لوحت بيدها بابتسامتها المعتاده : مع السلامة
مط شفته بسخرية من تصرفاتها يحس عقلها ناقص !!
**
**
**
**
اجتمعو على الغداء عمار باعتراض : وش هالأكل؟!
جودي تكتفت : ما رح نتغدى من هذا الاكل !!
ناظرت ساره الأكل وبدأت تأكل بهدوء بدون اعتراض
أم عمار : شوفوا ساره تأكل عادي أشطر منكم !
ليان مطت شفتها بجعرفه : تسخين ؟!
ليه ما طبختي اليوم !!
أم عمار بلامبالاه وهي تتغدى: هذا الأكل موجود الي مو عاجبه يبلط البحر !!
هذا الموجود !
ساره ناظرتهم باستغراب ليه مو عاجبهم كانت تتمنى هالأكل عند جدتها !
بعد وقت رجع عمار وأخواته للأكل لما شافوا ما في فائده من اعتراضهم
جودي بقهر تهمس لإخوانها : مو فاضيه تطبخ 24 ساعة على الجوال !
رفعت حاجب ام عمار وهي تخزها : وش قلتي يا جودي ؟!
عمار بقهر : انا الي اقول من الصبح قرف المدرسه
ولما نرجع ما نلاقي أكل مثل العالم والناس ؟!
ساره ناظرته : لازم تقول الحمد لله
قطعت كلامها وصرخت من قوة الضربه على رأسها
وبصراخ وقف عمار  وهو ينطق بعصبية : انكتمي !
لا تتدخلين فاهمه !
نزلت على الارض وهي ضاغطه على جبهتها من الألم
ام عمار جلست على مستواها بخوف : أشوف مكان الضربه !
ساره وهي كاتمه الألم والدمعه بعيونها رفعت يدها وهي تناظر الارض
ام عمار شافت مكان الملعقه حست فيه انتفاخ بسيط وجرح صغير : يوجعك ؟!
ساره هزت رأسها بالرفض
رفعت رأسها بمكابره وابتسمت رغم الوجع وصوت مخنوق : لا
ام عمار وقفت بعصبيه تدور على عمار بس ما شافته
هرب وبصوت عالي متوعد : والله إلا تتعاقب وتشوف !
جودي بفتنه : ماما قولي لبابا عنه علشان يضربه !
ليان : تبغين بابا يضربه علشان هذي ؟!
جودي : لا علشان نقهره لما يضربه بابا ونتمسخر
عليه !
ام عمار بنظره قويه : بسرعه رتبوا مكان الأكل
وبعصبيه
بسرعه !
ورجعت لساره ناظرتها : تعالي احط لك عليها ثلج
هزت رأسها بالرفض بس ام عمار ما خلت لها فرصه
أخذتها للمطبخ !!
**
**
**
**
ام سعود بضجر : خلاص يا عائشة اعطيني الجوال !!
عائشة وهي تناظر امها : يا ماما هذي اخر سالفه ا أقولها لبابا
ام سعود وهي تصك على اسنانها : اخر سالفه !
هزت رأسها وابتسمت : ما قلت لك يا بابا ؟!
أبو سعود بملل لها ساعه ماسكيته من سالفه لسالفه : لا ما قلتي ؟!
عائشة بفرح : ماما قالت تبغى تزوجني !!
ابو سعود بملل : والله ؟!
عائشه بفرح طفولي : ايه
علشان كذا اتصلت فيك علشان أعزمك للعرس
يا بابا !
ابو سعود : والله فيك خير عزمتيني !
عائشة ابتسمت: لازم تيجي علشان تسلم على العريس !
حرام يكون لحاله واقف !
ابو سعود : ان شاء الله بس متى العرس ؟!
عائشة سكتت لثواني تفكر : امممم
ما ادري !
خلاص يوم العرس اقول لك !
ومن الحين ابغى تشتري لي فستان أبيض كبير لي ولساره !
أبو سعود بضجر : خلاص اعطيني أمك !
صدعتي رأسي !
عائشة بقهر : انا ادري ما رح تشتري لي فستان !
والبنات يتمسخرون علي !
خلاص ما ابغى اتزوج !
ام سعود وصلت حدها منها سحبت الجوال بقوه: عمرك ما تزوجتي انقلعي من وجهي !
عائشة وهي تتخصر : والله لأتزوج غصب عنك وعن زوجك !
ضحك ابو سعود وهو يسمع كلامها !
ام سعود : ايه اضحك بدال ما تكسر رأسها على هالكلام !
ابو سعود : بعدها صغيره !!