رواية أقدار

بارت٢٣

تحس بالتوتر والاحراج وهي تتذكر كلام عائشه
يبغى يخطب بنت من الجامعه !
غمضت عيونها لثواني تفكر مين البنت إلي يبغى يخطبها !
سرعان ما نهرت نفسها وش تبغى فيه ؟!!
غزاها إحساس تكون هي !!
سرعان ما طردت هالإحساس !
وضعها مختلف عن كل البنات !
ابتسمت بنفسها لو يدرون البنات بالقاعه إنها راكبه مع الدكتور سعود !
خرابيط البنات كثير وكأنه الدكتور شيء عظيم !
الفضول يقتل لمعرفة أدق التفاصيل عن حياة الدكاتره !!
إلتفتت للشباك وهي تسمع احاديثهم بدقه !
ام محمد بضجر : المفروض هالطلعه تكون بالعطله حتى نجلس وقت أطول !
نسيت أسأل امك مين رح ييجي !
سعود بدون ما يناظرها وبهدوء : اتوقع خالاتي !
استغربت ساره الهدوء إلي يحيط فيه !
يتكلم ببرود وهدوء ما ينفعل ولا يتدخل مثل أبوه !
منشغل بنفسه فقط !
صحيح بالجامعه يتعامل بحزم لأنه ضروري يكون حازم مع الطلاب !
لكن حياته بالبيت هادئ لحد الملل !
نهرت نفسها« وش تبغين فيه»
تنهدت وهي تسمع حديث خالتها الظاهر مو عاجبها تواجد خالات سعود : أخوالك جايين بعد ؟!
سعود بنفس النبره : ما أدري !.
ام محمد بلقافه :و أزواج خالاتك ؟!
قاطعها بملل : ما أدري عن أحد !
مطت شفتها أم محمد بقهر من رده  : ما أدري ؟!
عن وش تدري !
وإلا صرت دكتور بالجامعه وتكبرت على عمتك الضعيفة !!
قطعت كلامها وهي ترد على الجوال : هلا بالقاطعه ......وعاقه انت وابنتك .....ما ادري وش تبغين من هالسفر ؟! ...... مها ولا تزورني أبد ولا أشوفها .... حتى لو .....المفروض على الأقل تتصل فيني أنا جدتها كذا قاطعيتني .....وش تبغى بساره ؟! تزورني في بيت ابو الوليد بدون هالحجج !! .........طالعين حنا وخالك وعمك والكل .... ايه معنا ....ايه معي بالسياره ......وش تبغين فيها ....خذي
إلتفتت للخلف ومدت الجوال : كلمي أميره أختك !!
طالعتها ساره لثواني وردت بهدوء : أكلمها لما نوصل !!
ام محمد بغضب : على وش شايفه نفسك يا زوجة المجنون!!
وكلمت اميره : ما تبغى تكلمك ....ما أدري رافعه خشومها للسماء وكأنها دكتوره وزوجها شخصيه مرموقه!! .....غصب عنها رح تتطلق ....كافي وين ما أروح يسألوني عنها صحيح وجه النحس متزوجه مجنون !! ......وش نسوي .....يصير خير .....مع السلامه !
قفلت الخط وناظرت سعود : جيل ينخاف منه !
سكتت لما شافت سعود ما هو معبرها !!
سوار بهمس لساره : ماما أبغى الحمام !!
طالعتها ساره بضيق وين تصرفها الحين
وبعدها طالعت سعود بحرج : لو سمحت !
طالعها من المرايه : وش فيه ؟!
ساره نزلت نظرها : نبغى أقرب محطه
قاطعها وهو فاهم قصدها وبهدوء: إن شاء الله
أم محمد باعتراض : مو فاضيين تنزلين تتسوقين !
لا ترد عليها يا سعود !
طالع عمته بنظره أجبرتها تبلع لسانها وتسكت !!
بعد وقت وقف السياره عند المحطه وانتظر إنها تنزل !
أخذت البنات وتوجهت للحمام !!
بعد ما طلعوا من الحمام أشرت حور على البقاله : مامانبغى نشتري !
هزت رأسها بالموافقه ودخلت البقاله !
ونسيت نفسها بالبقاله !
بعد وقت طلعت من البقاله وتذكرت سعود ينتظرها !!
توجهت للسياره ودخلت بهدوء بعد ما ردت السلام بهمس!
ام محمد بغضب : سنه حتى ترجعين ؟!
نزلتي للحمام مو للبقاله !!
إذا سعود محترمك وساكت تتمادين بحركتك !
ولا كأنه معنا رجال
داخله البقاله قبل نص ساعه ولا عبالك !
سعود ناظر عمته ببرود : قفلي على الموضوع !
استغربت من بروده بالرغم إنها تأخرت بس ما تكلم !!
مطت شفتها بملل من خالتها أي شيء تبغى تحشر انفها فيه !
متى ترتاح منها للأبد !
صدت لجهة الشباك وذكريات الماضي تلوح أمامها !!
سوار بفرح وهي تفتح علبة العصير : عمو تشرب عصير ؟!!
طالعها من المرايه وابتسم : شكرا يا حلوه !
سوار بلسان طلق وعيونها تخزه : تردني ؟!!
ضحك على ملامحها الطفوليه ومد يده للخلف يتناول منها
حور أعطته من البسكويت : وأنا ما تردني !
أخذ منهم وهو مبتسم !
سوار تمد لأم محمد بالحلاوه : خذي !
ام محمد طالعتها بشراسه : أنا تعطيني حلاوه «مصاص » شايفيتني بزر !
سوار عقدت حواجبها بطفوله : إلي عقله بزر يأخذ «مصاص»
وماما تقول عنك «عقلك بزر »
فتحت عيونها باستنكار ولفت بكل جسمها لساره : صدق إنك قليله حياء !
طالع بالمرايه للخلف استغرب وهو يشوفها تناظر من الشباك وما هي يمهم !
ام محمد بغضب : مو شاطره إلا بالسرحان أكيد تفكر بمجنونها !!
حور مدت لها بعلبة مويه : خذي ما نبغى هذي !
سوار باعتراض رجعت العلبه : لا هذي لماما !
وطالعت أم محمد : عندك فلوس اشتري !
ماما تقول إلي يغلط عليكم لا تعطونه شيء ولا تحترمونه !
حور بتأكيد : ما نبغى نعطي ندى دوم تقول لنا بنات المجنون !
سوار مدت بوزها : هي المجنونه !
ام محمد بغل : ما أحد مجنون إلا أبوك وأمك السرحانه !
سوار بدفاع طفولي: ماما مو مجنونه ولا بابا
سعود طالع عمته بلوم : ما يصير كذا !
تعملين عقده للبنات !
ام محمد مطت شفتها بقهر : قول هالكلام للأم تربي البنات على الحقد وعدم الاحترام !
سعود بحسافه : مشكلة مجتمعنا لما تكون الأم بحاجه الى تربيه !
عقدت حواجبها ساره من كلامه ..كأنه يقصدها ...مسكت نفسها لآخر لحظه وتجاهلت الموضوع ما لها خلق له ...
**
**
**
نزلت من السياره وهي تكح بقوه من الدخان !
نزل خلفها وهو يشوف حالتها تعبت من الدخان !
عنده علم إنها تتضايق من الدخان لكن شيء بداخله جبره يزيد العيار !
عائشه بتوعد : والله والله ما أرجع معك ولا أركب معك مرة ثانيه !
ورجعت تكح مره ثانيه !
اقترب منهم ابو ماجد باستغراب : عسى ما شر عائشه ؟!
عائشه ناظرت عمها : أنا ما اقدر استحمل ريحة الدخان !
ذبحني طول الطريق دخان
ورجعت تكح من جديد !
ابو ماجد بحده : متى تترك هالسم !
اذا ما هو هامك صحتك !
لا تذبح صحة غيرك !
وش ذنب هالمسكينه تختنق ؟!
ماجد بقهر أشر عليها : هذي سكينه !
تراها
قاطعه ابو ماجد بحزم : اذا سمعت إنك دخنت بالسياره أو بالجناح رح يكون لي معك كلام ثاني !
فاهم !
انقهر وهو يشوف ابوه يكلمه كذا غمض عيونه وبداخله يتحلف إلا يطلع هالحركات من عيونها وبهدوء ظاهري : ان شاء الله يبه !
تركهم ابو ماجد
اقترب منها وثواني كانت تفرك يدها مكان القرصه بألم !
ماجد بتوعد : وقسم بالله إلا تندمين !!
شاطره ما تطلعين من البيت إلا بإذني !
وش تسمينه أنام وانا مو راضي عليك ؟!!
والا تطبقين إلي تبغينه ؟!!!
يصير خير !
عائشه باستفزاز قهرها طول الطريق : يصير خيرين !!
وتركته وتوجهت لقسم الحريم بسرعه !
**•
**
**
**
ام وليد وهي تعرف أخواتها على عائشه : هذي اختي ام بهاء وهذي ام وسيم وهذي ام حمد !
اكيد ما تعرفينهم ما حضروا العرس !
بعد التعارف والسؤال عن الحال والأحوال !
ام راكان باستغراب : غريبه ام محمد تأخرت !
نسرين وهي تلعب بخصله من شعرها : يمكن بعدها على الطريق !
ام حمد ابتسمت : ما شاء الله يا ام عزام ابنتك عروس !!
استحت نسرين وتندمت إنها تكلمت !
ام عزام بابتسامه : تسلمي
ام حمد : لو ولدي كبير كان زوجتها إياه !
اسيل بضحكه قصيره : طار منك العريس يا نسرين !
صار وجه نسرين طماطم وتركت المكان على دخول ساره !
سلمت على ساره وطلعت بسرعه
استغربت ساره من وجهها الاحمر !
هزت كتوفها بلامبالاه وتقدمت وهي تشوف ملامح جديده عليها !
اسيل بابتسامه : هلا بخالتي الحلوه !
طالعتها ساره بنظره «انكتمي »
واقتربت وسلمت على الموجودين بهدوء !
ام حمد بتساؤل: مين هذي ؟!
ام عزام بابتسامة : هذي أختي أم سوار !
ام حمد وهي تناظر ساره جلست جنب أسيل وباين عليها الضجر : ما شاء الله متزوجه ؟!!
أم عزام ما حبت يدخلون بتفاصيل ردت : ايه !
اسيل بهمس لساره : وش فيك؟!
ساره باستياء : جدتك ما تنطاق !
اسيل بضحكه : وش جبتي شيء جديد ؟!!
مطت ساره شفتها بقرف وما علقت !
اسيل تتلفت : العسولات وين ؟!
ساره بملل : برا
ورفعت نظرها لأم محمد إلي دخلت تردح : شوفي ابنتك تلعب بخرطوم المويه الحين تخرب الدنيا !
ساره بطريقه تنرفزها : حلالها !
خلي تعمل إلي تبغى!
ام محمد سلمت على الحريم وجلست وهي تنافخ : اقولك قومي شوفيها !
طاح وجهها من الفشيله وهي تشوف ساره تقلب الجوال مع أسيل ولا كأنه أحد يكلمها !
ام بهاء ونظرها على ساره : مع مين متزوجه ؟!
ام محمد بشماته همست لها : واحد مجنون داير من إشاره لإشاره !
ابتسمت ام بهاء على كلامها واعتبرتها مزحه من أم محمد وما صدقت كلامها !
وقفت ساره تشوف التوأم وتتفقدهم
ما تحب تجلس بمكان والكل يناظرها !
حتى عائشه تطالعها !
وش فيهم الكل يطالعها؟!
بعد ما تفقدت البنات حست بحركه خلفها
التفتت واستغربت ام عمار !
من اول ما دخلت وهي تحس بعيونها كلام !
ام عماربهدوء : ممكن دقيقه أجلس معك ؟!
ساره بملل : ما لي مزاج أعور رأسي بالماضي !
ام عمار سحبت يدها وتوجهت للخارج مره ثانيه : دقيقه بس !
سحبتها للحديقه وجلست في ظل الشجره وأشرت لساره تجلس جنبها !
جلست ساره بالغصب !
ام عمار تناظر المكان : ما شاء الله خالي عنده شاليه حلوه كثير !
تريح النفس !
طالعت ساره حولها ما تنكر جمال المكان
لكن قلبها ميت وما همها هذي الأمور وبضجر : ساحبيتني علشان كذا ؟!
ام عمار أخذت نفس وطالعتها : خلف خبرني إنك أعطتيه الأوراق وكنت تخبرينه بكل شيء يصير في بيت أهلي
يعني بين قوسين «جاسوسه»
أنا أبغى ضميري يرتاح وما أكون ظلمتك !
أبغى أسمع منك !
طالعتها ساره بسخريه : بعد هالسنوات تبغين تسمعين مني ؟!
لو سمعتي مني تقدرين تصلحين الماضي ؟!!
وترجعين كل شيء مثل ما كان ؟!!
أكيد لاااااا
وبنبره رقيقه موجوعه : ليه نقلب بالماضي ؟!
خلاص كل شيء انتهى !!!
كل شيء مقدر ومكتوب انسي الماضي !!
ام عمار مسكت يدها لما حست فيها همت بالمغادره : اجلسي
أنا للحين ما تكلمت !
تنهدت ساره وجلست تنتظر منها الكلام !
ام عمار طالعتها بحذر : للحين قلبك معه ؟!!
طالعتها ساره بملامح ما قدرت ام عمارتفسرها !
تابعت ام عمار كلامها : ساره اذا للحين تبغين عبدالله
أنا مستعده أرجعكم لبعض
مثل ما فرفتكم أقدر أرجعكم !!
تكلمي !
طالعتها ساره بسخريه : ما أقدر أنام الليل وأنا أفكر فيه !!
وبجديه : ريحي بالك تراه أبغض مخلوق على وجه الارض بالنسبة لي !
ام عمار بعدم تصديق : تقولين كذا لأنه جرحك
قاطعتها ساره بكل صراحه :بعد هالسنوات اكتشفت إني  عمري ما حبيته ...ما أنكر كنت لما خطبني أميل له واعزه واحترمه واستلطفه
لكن بعد ذاك الموقف كل شيء جميل كنت احمله له
تحول لكره !
والحين ما يهمني لا من قريب ولا من بعيد !
كل واحد له طريق وحياه مختلفه عن الثاني!
ويا ليت تقفلين على الموضوع !
خلاص انتهينا !!!
تنهدت ام عمار وشعور الندم يتخللها
ممكن كانت السبب بتدمير حياة ساره !!
استغفرت بنفسها وبعدها طالعت ساره : ساره !
ناظرتها ساره ما لها قلب تسمع شيء : وش باقي ؟!
ام عمار ناظرتها بتردد: ذيك المره قلتي إنه ما أحد خبرك أي شيء عن أهل أمك!
أنا ما أبغى أعطيك أمل تعرفين شيء عنهم !
لكن يمكن تلقين مبتغاك !
أنا ما أعرف أمك ولا أحد فينا قابلها
الكل سمع انه عمي تزوج
لكن مين ؟!
ما ندري ؟!
إلي يعرف أمك  وأهلها.. خالي أبو الوليد وخالي صالح الله يرحمه !
تقدرين تسألين خالي ابو الوليد !
عفست ساره ملامحها من تعقد الامور ..ابو الوليد ما يطيقها لا من باب ولا من طاق !!
كيف يعطيها معلومات عن أهل أمها وعن مكانهم ؟!!
مستحيل
حتى لو يعرف ما رح يخبرها !!
الافضل تقفل الموضوع وتنسى السالفه
عاشت هالسنين بدونهم تقدر تكمل!
اوجعها الحنين وشعور داخلها متحمس لرؤية لو صوره لأمها !
أمنيتنا تشوف صورة لملامح أمها
معقول صوره يستثقلون عليها ؟!!
كتمت الحنين والشوق إلي بقلبها وبنبره بارده تخفي كل المشاعر المشتعله : انسي هالسالفه !!!
ما أبغى أحد ولا أبغى أشوف أحد !!
أم عمار بقلة حيله : بكيفك !
هزت رأسها ساره وبعدها وقفت وهي تهمس: اكيد بكيفي !!
تركتها وهي تمشي وبداخلها وجع
مستحيل تذل نفسها لأبو الوليد !
طالعت السماء لثواني وهمست بوجع «يا رب رحمتك »
**
***
**
يغلي غلي بعد كلام أخته إنها ساره رفضت تركب مع سعود..نطق بقهر : ما تطلع مع رجال غريب
وسياره الأجره ..وش يكون أخوها وإلا عمها ؟!!
ابو ماجد بهدوء: هدي حالك يا خال !
ابو الوليد بانفعال : ما أدري عنكم  عاجبكم تصرفاتها ؟!
انت يا أبو راكان عمها لمتى تسكت عن تصرفاتها !!
لا تقول عمار تراه مو قادر لها
لو تسمعها لما تتكلم معه وكأنه بزر !!
مايصير هالكلام أبدا !
عزام رفع حاجب : وليه ما أحد خبرني كان جبتها معي !
ابو الوليد أعطاه نظره : وجابها سعود وش صار بالدنيا ؟!!
وإلا ما تثق بسعود ؟!
ابو راكان بهدوء : سعود ثقه وعلى العين والرأس !
بس انت تعرف البنات بهذا العمر يحبون المعانده والمرادده !
ابو الوليد ما عجبه ترقيعه : وش هالكلام يا ابو راكان ؟!
تراها مو صغيره شوي وعيالها طولها !!
عبدالله بحاجب مرفوع وهو يغلي غليان كيف جاءت طول الطريق مع سعود : وهي صادقه ترى سعود مو محرم لها !
ابو راكان أعطى عبدالله نظره قويه حتى ما يتدخل !
ابو عزام ينهي هالسالفه حتى ما تتوسع الأمور  : حصل خير يا جماعه !
**
**
**
دخلت الغرفه ما تدري مين رح يشاركها بالغرفه !
واتصلت بمحمد إلي اتصل فيها أكثر من مره !
أخذت نفس وهي تردد بنفسها «الله يستر »
_ السلام عليكم
بنبره هاديه تبعث الاطمئنان : وعليكم السلام ..كيفك ساره ؟!
ردت بهدوء : الحمد لله أخبارك وأخبار أم خالد
قاطعها : الكل بخير !
وينك الحين ؟!
ساره رفعت حاجب : بالشاليه
قاطعها : حلو ...اسمعي لما ترجعين تعطين عمار الاوراق المطلوبه
يرفع قضيه طلاق او خلع
ولما حس إنها تبغى تعترض تكلم بحزم : مثل ما قلت يتنفذ بالحرف !
ردت بقهر : يعني زوج أميره يتحكم فينا ؟!!
محمد بتبرير: مو كذا !
الطلاق لازم صار من سنين !
اسمعي الكلام ونفذيه !
ساره بنفس النبره: ليه زوجها يتحكم فيك
قاطعها : يا ساره افهمي دوبي اخذت منه قرض كبير
وين عيني منه أقول له مالك دخل فينا !
سكتت ساره وهي تحس ينغز على سالفة الشيك !
محمد بهدوء : الله يرضى عليك خلينا ننهي هالسالفه !
تكلمت ساره بوجع : محمد أبغى أقول لك شيء !
لكن قبل تقسم لي ما يطلع هالكلام لأحد حتى عمار !
عقد حواجبه : أقسم بالله ما أجيب سيره لأحد !!
ساره بتردد : ما له داعي الطلاق لأنه زوجي ميت
قاطعها باستنكار : وش تقولين ؟!
وليه ما قلتي من البدايه ؟!!
ساره والدموع تلمع بعيونها : ما هو ناقصني نغزات تراه الثالث يموت !
حلفتك بالله  لا تجيب طاري لأحد !
وما قدرت تمسك نفسها لتنغمر بموجه بكاء
ناتجه عن أوجاع وأحزان دفينه
تنهد محمد بضيق على حالها : خلاص أنا الحين أخبر عمار إنه صديقي محامي وكلته بالقضيه من فتره
وطلقك من زوجك !
وقدام الجميع إنك مطلقه الحين !
وننتهي من هالسالفه !
تنهدت بوجع : إن شاء الله !
محمد ضاق صدره عليها وقرر ينهي المكالمه : الحين اتصل بعمار ..تبغين شيء!
ردت بهمس : سلامتك !
قفلت الخط ورمت الجوال على السرير !
وضاق صدرها لأوجاع الماضي !
ما تبغى أحد يعرف إنها أرملة
وخاصه« خالتها »
**
**
**
**
سرعان ما انتشر خبر طلاقها !
شروق قلب وجهها أسود وطالعت أمها والدموع بدأت تعلن النزول !!
ام الوليد تنهدت : يا شروق وش عليك منها ؟!
تطلقت تزوجت !
ام بهاء بتفهم ناظرتها: تكون طليقة زوجك!!
الله يكون بعونك تراها منافسه قويه !
طالعتها ام ماجد بغضب : يا خالتي بدل ما تكونين عون صرت فرعون !
ام بهاء هزت كتوفها : أنا وش قلت ؟!
تبغين أكون مثلكم أقول لها ولا تهتمي ما رح يناظر غيرك وتتفاجئ بالواقع !!
لا خليها تنتبه على زوجها وتزيد عيار الاهتمام
قاطعتها ام محمد باستخفاف : عبدالله يترك هالجوهره وأشرت على شروق ويرجع للناقه !!
ما في مقارنه !
لو تعرفين هالناقه من قبل ما قلت كذا !!
ام بهاء اعطتها نظره استخفاف : أقول حطي نظاره لعيونك !
البنت كل هالجمال وتقولين عنها ناقه ؟!
إلا اذا الغيره للحين معميه بصرك لأنها ابنة زوجك !!
لو ما عندها عيال كان خطبتها لواحد من عيالي !
نوره بقهر وهي تناظر شروق تبكي : يا خالتي وبعدين مع هالكلام !
ام بهاء :لا تلوموني إذا هي ما عندها ثقه بنفسها !
ام حمد تقفل الموضوع : خلاص يا أم بهاء !
ام راكان تناظر بصمت ما هي قادره تتكلم
ما تبغى عبدالله يرجعها خلاص كل واحد سلك طريق وانتهت حياته مع الثاني
إلا اذا القدر كتب يلتقون تحت سقف واحد مره ثانيه !!
اسيل تضايقت منهم : يقال الحين ميته على عمي عبدالله !
تراه هالحركات عيب وما هي حلوه !
نوره بحده : انت لا تتدخلين !
اسيل بتوعد : أنا أراويك كيف ما أتدخل !
اذا ما خبرت عزام بخرابيطك هذي ما أكون أسيل
ام راكان طالعتها بوعيد : وقسم بالله يا أسيل لو تكلمت بحرف لعزام لساني ما يناطق لسانك !
فكونا من المشاكل !
وقفت شروق وغادرت المكان !
ام وسيم طالعت ام الوليد : اشوف شروق زودتها حبتين !
ما له داعي هالفيلم !
مريم وام عمار كل وحده تناظر بصمت وما تكلمت!
ام محمد بتحريص : خلي شروق تنتبه منها تراها مثل أمها
قاطعتها ام راكان : استغفر الله !
فكونا من هالسوالف !
ترى طلعنا تغيير جو مو للنكد !