الغرفة السرية (سر الفراعنة القدماء)

أنوبيس وجنوده!!

"بتقول ايه يعينيا؟؟؟"  اندفعت لين ناحية ديداموس تصيح به وكادت ان تمسك به ولكن سبقتها ايلينا تمسكها هي تحاول منعها من الامساك به

بينما ظلت لين تصيح به قائلة " يعني يوم ما اقرر اجي معاهم في اي نيلة تقتلونا!!!... دا ايه العنصريه والقرف دا... واد انت بقولك ايه.. اقسم بالله العلي العظيم لو لمست شعرايه مننا مش هتعرف انا ممكن اعمل فيك ايه... وربنا اولع فيك... اتظبط كدا واتكلم كويس بدل ما اديك بالشبشب علي وشك "

كانت تتحرك وتحاول التقدم منه بينما تمسك حذائها في يدها لتضربه به ولكن ايلينا كانت تجذبها للخلف حتي تبعدها عنه

والاخرون يجلسون مندهشين ومصدومين من ردة فعل تلك الفتاة وما الذي تهذي به !!  او حتي هل فهم ديداموس  ما قالته!!! 

بينما ديداموس بالفعل لم يفهم معظم حديثها ولكن ما فهمه من ردة فعلها واندفاعها وصراخها به انه نوع ما من التهديدات وانه لم يعجبها ما قاله لذا قال
" لن افعل شيئا لكم ان وافقتم علي مساعدتي "

اشار إلياس الي لين بالهدوء والجلوس ثم حول انظاره ناحية ديداموس قائلا " دلوقتي اللي فهمته انك انت اللي جيبتنا هنا عشان نساعدك عشان الملك ميناس دا دلوقتي رهينة تحت حكم الساحره الشريرة دي وان حال البلد متدهور بسبب سحرها والناس بتموت وحاجات زي كدا ف المفروض ان الكهنة القدام قالوا اننا احنا اللي هننقذكم من شرها صح كدا؟؟؟ "

هز ديداموس رأسه موافقا اياه

" طب مقالوش هننقذكم ازاي؟؟ "

صمت ديداموس لوهلة من الوقت ثم هز راسه نافيا " للاسف لم يتم ذكر اي شيئ عن كيفية فعلها او شيئ كهذا "

هز إلياس رأسه بهدوء لينظر الي اصدقائه ثم الي ديداموس ليقول " طب ممكن شويه وقت بس نفكر فيه ونشاور بعض وبعدين هنرد عليك بإذن الله "

تنهد ديداموس يقف من مكانه قائلا " كما تريد... ساترككم وحدكم قليلا حتي احضر بعض الاشياء من الخارج.... حتي ذلك الوقت تحدثوا فيما بينكم "

هز إلياس رأسه موافقا " تمام"

ليتركهم ديداموس بمنزله ثم خرج بينما يضع الوشاح علي وجهه يخفيه متجها الي السوق مره اخري

تنهد إلياس يمسد المنطقه بين حاجبيه يحاول التفكير بما يحدث الان ليقاطعه صوت لين العالي وهي تصيح مجددا بينما تقول " انتو ساكتين ليه.؟ "

"يستي استهدي بالله واخرسي شويه عايز افكر"  صاح بها إلياس منزعجا

ناظرته لين بتهكم لتضم يديها الي صدرها وتجلس بجانب الفتيات بصمت تسبه بداخلها

"هنعمل ايه؟"  قال بحر

" مش عارف... الموضوع غريب " قال إلياس