عشك الملا غربال

البارت ١

#عشك الملا غربال

___

في صباح يوم ممطر ورائحة المطر وهي
تسقي الارض لتزهر الازهار ثماراً جديده ...

لابسه جاكيتي وگاعده اباوع
للمطر وماده ايدي وقطرات المطر
تبللها وتدخل من بلوزتي تقشعر
جسمي بيها ، اكثر شي احبه المطر
يحسسني بشعور هادئ ولطيف
ومنعش ، رغم البعض يحس بملل
وكأآبة بسبب ظلمة الجو ..

اجا صوت امي :-

- يمصكوعه سدي الشباك واني اكول
هاي ليش البيت مجرش من البرد

- ماما والله باعي الجو يخبل

- لجج يووم سدي مابيه حيل اشغل
الصوبه وتعال اترسها نفط عاد خليها
لليل نستفاد منها

سديته. وبقيت البرده مفتوحه لان
الكهرباء طافيه والبيت اظلم,

اجه صوت اختي وهي تركض على
الدرج

- ماماااا مشتهيه لبلبي فدوه سويلنا
ووياه رارنج

- مسويه ماما لا تركضين ليش
تشلعين كلبي مو زين عليج

رحتلها وكرصتها صرخت :- اووووي
اسرارررر شبيج وجعتيني

- لا تركضين والله اكول الابويه عليج
حيوانة

غمضت عيونها وعبست

- مو جعت هفف ماما صبيلي

- كومي صبيلها سراوي وحطي
الجاي على النار هسه ابوج يرجع من
الدوام وبردان على الاقل يدفي كلبه
بهالبرد

- تمام ماما بس هااا بشرط تقنعي
ياخذنا للمدينه

- ولج يوم يا مدينه بهالبرد

- ماما فدوه الكلبج الجو يخبل ومال
واحد يطلع سفرات خلينا نتونس
قبل منسافر

- اهووووو دحمي موتيني يجي
ابوج واشوف شيكول لا تلحين
وتنگين فوك راسي ترا والله
ما احجيله

ركضتلها صاحت بيه :- ولللج
لستكااااين

وماشوف بنفسي غير فتت بالصينيه

- خرررب غيرتج سررريوه كسرتيهن
اليوم انعل والديج كلشي ولا
ماعيني طايحة الحظ ياثوله بت
الثوله

وضلت تسطرهن عليه هيج منج
وهيج من اهلج. سبتني وسبت
تربيتي علمود المواعين نقطة
ضعفها كلشي ولا تجيسهن

- ولج لحكي على نفسج هههه

- يايمممه

- شصااااار ولجن ظلمه لا تجفصن
ببطنا

- هههههههههه تعالي سالللي
لحكييينيييي

رحت ركضت وره اختي نور الجبيرة
معلمه,

-ولجججن كزاز لا يفوت برجليجن

- نور امي لو اجت الكهرباء تلعن
جدي بكبره وتحركه حرك لان شفت
الاستكانه صارت تمن