عشك الملا غربال

بارت ٤

#عشك الملا غربال

___

دار بيه الزمن, والذكريات رجعتني
الذاك اليوم , خلتني اصفن واني
اربط الاحداث .. اي فعلاً شلون
عاش ابن خالي؟

من يمرض منو يحن عليه ويسهر
الليالي وياه؟

بكل مره من جنت امرض امي
متغمض عينها وتبقى سهرانه
ويايه, وابويه ينطيني العلاج بـ
ايده ويهون عليه يقيس حرارتي
ويشجعني بكلماته الي تزيد من
قوتي حتى لا اضعف !

وخواتي حواليني
يضحكوني .. وبسرعه اتعافى

مايمر يوم اذا مو ضحكه اهلي
بالبيت وسوالفهم ..

من ارجع من الدوام اول كلمه
احجيها وقبل مااسلم :- " هااا يمةة
وينج؟؟ "

كلهم عاشوا حياتهم وحتى احنه
عشنا حياتنا ونسوا هالطفل ..

هو مااذكر عليه طفل لان
غربال جان بالمتوسطه مااعرف
بالاعداديه ! بس جان مغرور
ومايحجي ويانه وبس نلعب جان
يضربنا ويصيح علينا ويدخن وهو
صغير ..

جنت احب العب بالشارع وارسم
بالرمل والعب شدة يا ورد ورجليني
تمتلي تراب .. لو بالشتا اطفر بالطين
والعب بالمطر

بس مجان يخلينا نلعب يصيح
علينا وندخل للبيت نبجي .. وصرت
اضوج اروح البيت جدي بسببه

حتى اسمه ما جنت اعرفه بسبب
خالتي ومن وعيت على الدنيا هو
اسمه غربال وكلنا نصيحله غربال

جانت خالتي نهى تصيح عليه
وتكلب الدنيا بس يضوجنا وتطرده
من البيت

ونفس جملتها الي طول طفولتي
بيت جدي جنت اسمعها واسمع
دعواتها تتبع هالجمله :- غربلتنا
بجيتك فكرتنه ياغربال ياابن
الكح* ابن الحرام وتطردة لو
تذب ملابسه بره غرفة بيبي

ما جنت اعرف معناها وعلى
هالمنوال حفظها ابنها الي جان بعمر
غربال
وجان عرايك اربعه وعشرين ساعه
هو وياه
.. حتى كلمه غربال ما جنت اعرف
معناها وعبالي هو اسمه هيج !

ف بيومها اذكر عمري بـ الـ 10
سنوات جنت خامس ابتدائي رحت
للسادس وجانت عطلة نهاية السنة
وبكل عطلة جان ابويه ياخذنه مكان
يونسنا بيت اجدادي او سفرات
للشمال ,

نايمه بحضن امي واشوف كرتون
" نيلز " ومندمجه وامي تفلي شعري
وكل شوي اكول الها :- ماما هناك
حكي

- كومي .. كومي

كومتني

- هاي شبيج يوم شدعوه عليج هيج
متلعبين بشعري

- سكتي ام لسان وكومي جيبي
من بيت ام نوفل الخياطه ملابس
عاشور لان بعد خمس ايام على
عاشور وحنروح بيت جدج نحيي
الشعائر

- ماما غير من قتلوا الامام هيج
نلبس

- اي ماما مثل كل سنه ونلبس اسود
والسيده رقيه عليها السلام تتذكريها