عشك الملا غربال

بارت ٥

#عشك الملا غربال

_____

فزيت بصفنتي, كمت من فراشي
بهدوء حاوطتني الذكريات
واستقرت بعقلي :- يعني اليوم
جاري الحلم ست اسرار
يعني التمت عليج الافكار
وحتستوطن عقلج واحلامج  ... بـ
غربال  ..

فتت الغرفتي وكفت كبال الشباك,
سحبت نفس وسديت البرده ورحت
تمددت بفراشي واني اذكر كل لحظه
بلحظتها!

هاي مشكلتي
اعاني من فرط التفكير
واي موقف يصير وياي يستقر
بعقلي ومخيلتي!
بحيث عقلي عباره عن قصص
وافلام ومسلسلات صارت وياي
بالواقع بس انخزنت بدماغي
واي موقف او شخص يمر بحياتي
عقلي يحفظه ويحفظ احداثه
وشكله وحتى كلامه
وبمرور السنين يصير علي غبار,
وبمجرد لمحه بسيطه عن هذا
الموقف ترجع بيه الذكريات النفس
اليوم الي صار بي الحدث وينمحي
الغبار كأن لم يكن

اكو ناس تسمي "ذكاء مُفرط"
بس اني اسمي "تفكير مُفرط"
لان عقلي كلشي يحفظ وكلشي
يخزن, وهم يعتبر من الاسباب الي
خلتنني اطلع معدل يمنحني اروح
طب عام بدون مااقرا بجهد وتعب

بس " غايةٌ في قلب يعقوب "

وهذا الشي يسببلي تعب وارهاق

تمددت وراسي بقى يدمج الاحداث
غمضت واني اشوف وكأنما مسلسل
كبالي!

ضحكت :- يعني اليوم السهره سهرة
غربال
سحبت الغطه وغمضت واني
استرجع ذاكرتي,

بيومها معفت حضن امي ورجعت
غفت عيني, كعدت وكت العشا
على صوت ابن خالتي نهى " مهيمن "

وهو يصيح بصوت عالي :- لاتشوف
نفسك علينه لاعبالك اسكتلك
غرباااال

غربال :- هـــه شتريد تسوي يعني!
هو انت خلك زعطوط ماتعرف
راسك من رجلك ابن نهى وشيل
ايدك ههههه

كمت من النوم واشوف مهيمن هجم
على غربال وغربال بدفعه وحده دفعه
وضربه بوكس

صاح مهيمن :- للللللكككككك

وعلى صوته اجت خالتي نهى وبيبي
وامي

اخذتني اتريد تدخلني للغرفه
وخالتي نهى اسمعها تكول :- لو
فكيت حلكك تطلع برا البيت وعشا
ماكو ورجلك احشها حش بس تجي
الباب البيت طايح الحظ

بيبي :- مو هو بكيفج بيت الخلفوج
هذا لابيتج ولا بيت رجلج عود من
يصير بيتج تأمري

- لو بيها خير امه جان موجوده مو
انتي كاعده تدافعيله كدامي خلك
مراهق ساقط

خالتي دفعت ابنها ودخلته للغرفه
واشوف غربال بارد ماحجه شي
بس رافع راسه ويخزر بيها وعيونه
حمر
رجعت دفعته من ظهره :- دوخر
شطولك بس طول ولسان وطياح
حظ ابن الدايحه

- نننننهى

بسرعه رفع راسه وخزرها خزره
كصها كص

اخذ قميصه جان بي صبغ, مااعرف
ليش ملابسه وسخه وشعره وايده
وحذائه مشكوك ومليان طين