عشك الملا غربال

بارت ٨

#عشك الملا غربال

______

ضلام والدنيا تخنك .. جثه تعبانه
بلا روح وبلا معين يكلها كومي .. اي
نعم جثه تعبانه مابيها حيل تكوم
اخ .. ياهو الاجه دفرها برجله مشمأز
من وجودها

اصعب شي بالدنيا من تكون غريب
بين اهلك وناسك, عايش يتيم
منبوذ واحد يذبك على الثاني !
وانت مثل السعفه اليابسه
والمسحوكه والمتفتته
تفيد للحرك حتى تصير رماد
ويطيرها الهوى وتنسي !
ومايبقالها بس اثر السواد الخلفه
الحرك
هذا انا  ..

انا المنبوذ والمحروم والمخذول
انا الفتح عينه على الكتل والضرب
والاهانه
انا الي اصيح يمه ويوصلني صدى
صوتي ويكلي ماعندك ام
انا الي لو حطيت اللكمه بحلكي
اتحاسب عليها
انا الي لو نمت انام بالتراب واتغطه
بهدومي تعبان من الدنيا واهلها
انا الكبر قبل عمره
انا الشيب راسي وبعدني صغير

انا المكتوله روحي وانا اشوف
نفسي ثكيل على بيت ابوي
انا الانتجي على الحايط والحايط
يوكع من ثكل همي !

ليش ويَ روحك حَرب ؟
تِرسم العثره بـِ طريقك وين ما
صَحلك دَرب

اييي ليش?
صار اسمي غربال
غربال الغربلهم بدون سبب!

بويةة ترا انا روحي غربلتني
وتيهتني وضيعتني ..

لا شايف ابو
ولا شايف ام
ولا شايف ظهر يسندني!

اجيت تَعبي واخلي جوه راسي
واتوسد عليه بالليل
ماعندي غيره
بشر ماعنده غير التعب ونيس
يونس روحه بي ويسولف وياه
جبتها من الصغر
عِله اعلى عله
وين مايصحلي احط تعبي جوه
راسي وانام  ..

كبرت وانا بحضن الحجيه
وكل ظني هي امي, وهي ابوي,
اسالها :- يمه ابوي . وين?

- ابوك مسافر يمه

- اريدن اروح يمه عبن الدنيا تكتل
يمه وعلي تكتل

- لا يمه لاتحتاج احد بس ربك هاي
دنيانه لو دكت رجلها على البني ادم
المظلوم والماله والي تطحن ضلوعه
طحن بس ربك يوكفلك ويكسر ظهر
الدنيا

- زين يمه انا ليش كلها تكرهني جا
انا شمسوي?

- مامسوي شي يمه يغارون منك
عبنك حليو وابيضاني والعالم تحبك
يمه

- يمه جا اذا هيج انا اذا صرت اسود
يحبوني?

- انت حلو يمه والله يحبك واكفلك
ويسندك لاتخليلك سند غير ربك يمه

- يمه بردان غطيني

- تعال بحضن امك وليدي

رحت وانا طفل خاتل بضلوعها
شارد من البرد الكسر ضلوعي
بسبب عمتي نهى مرات اچذب
اچذب واگول بردان حتى تنومني
بحضنها واشم بريحتها
اشمها حييييييل كون انام وانتهي
بريحه شيلتها الدافية
تجاوبني بلهجتها وهي تلعب بشعري
" جا نام يمه ، عيونك يهودن
ويستراحن حدر شيلتي "