واقفات الخمسه يتفرجوا عليه كيف يوتي في سيارته لطلعته مع زوجاته..
وهو يسكر في باب السيارة شافلهم ..ابتسم ابتسامه جانبيه وقدم يسأل..
/خيركم!؟
فداء بزعل:ماتقولش نهار نلم وخياتي نطلعهم ديما فايتنا في جرة نساوينك..
هدى بضحكة صدمه..
/فداء!
اروى قالت..
/صراحة عندها حق حتى حني عندنا حصة فيه خونا هدا..
هدى بصدمه اكبر..
/اروى!
علا:كلنا خاطرنا نطلعوا معاه برواحنا..
هو اللي كان يسمع فيهم بإبتسامه شاف لثريا لقاها تشوفله وهي عاقدة حواجبها قلد ملامح وجهها وقال..
/وثريا باشا!؟
قالت:عندهم حق..فوتهم وطلعنا حني...
كلهم بأصوات متقطعه ماعدا هدى اللي كانت تضحك قالوا..
"ايه ايه..فوتهم..هيا نهربوا عليهم"
ضحك بعدين قدملهم وفتح ايديه وهما ماصدقوا جوه يجروا وخشوا حضنه..
ع طلعة زوجاته لما شافوهم ابتسموا..
الخضر:خلاص خودوها مني كلمه نفضى ان شاء الله نرفعكم للقاره بولي نقعدوا غادي اسبوع المتزوجه تقول لراجلها..
رفع عيونه شاف زوجاته وبدي يغني..
/اهو جي اللي مهبلني اهو جي..
تباعدوا خواته والتفتوا شافولهم بغيره ماعدا هدى اللي كانت مبتسمه..
هو قال لزوجاته..
/هي غزالاتي للسيارة طول..
مشوا الثلاثه وهو مشي وراهم وخواته غصب عنهم ضحكوا ع منظرهم..
وصلوا في السيارة فتح الباب القدامي وقال..
/هي اركبي ياالظبية..
ركبت وهي مبتسمه بخجل..
سكر الباب ومشي للخلفي فتحه وقال.
/ياام العيون الخضر انتي ساهيه وانا ايامي غبر...
ضحكت بخجل وركبت..سكر الباب وشاف للثالثه عطاته نظرته حارقه بعدين فتحت الباب وركبت وسكراته بقوة..
هو قعد واقف رافع حواجبه لثواني بعدين التفت لخواته يغني بصوت هادي..
"عيني يا مطراي يا شقى عيني يا مطراي يا شقى عيني يا مطراي باعدو عني زول مناي يا شقى عيني يا مطراي"
صفقت علا"ماريه" وغنت وراه وخواتها قعدوا يصفقوا معاها وهما يضحكوا..
وهو عاد تحمس والتفت ع السيارة وبدي يدربك عليها ويغني وخواته شاشوا معاه حتى نساوينه كانوا يصفقوا ويضحكوا ماعدا الثالثه اللي كان المعنى عليها...
