الساعه ١٠:٥٦ الليل ، نجد العذيه
كانت ترف تناظر الشباك الي يطل على الأبل
ترف:بنات ابي اروح اشوف الناقه
ساره:يع منجدس ترف وش تبين فيها
ترف:لو سمحتي الا الغلط
رنا:روحي لها مافيه احد عندها الرجال اتوقع راحو لعزيمه ابو راشد
ميار:صح وخذي جلالس معس احتياط يمكن يداهمس احد
ترف:تم بروح ذلحين
طلعت من الغرفه ترف ونزلت تحت للناقه لين وصلت عندها وطلّعت جوالها تصور جنب الناقه
وتسولف معها كأنها تفهمها
"مجلس الرجال"
كان مافيه احد غير سلطان الي عطاهم عذر انه
تعبان لأنه ماله خلق يروح للعشاء حق ابو راشد بعد ماراح حيله كله عند الغنم
طلع عشان يروح يشوف ناقته و يشيك عليها لين لمح بنت حاطه جلالها على كتفها
وتصور جنب ناقه
عرف انها بنت عمه ذيك نفسها من عيونها الي حفظها
استوعب على نفسه ونزل عيونه
راح لها وتحمحم عشان ترفع جلالها
سمعت ترف صوته ولما شافته على طول حطت جلالها على راسها
سلطان:بغيتي شي يابنت عمي
ترف:معليش جيت اشوف الناقه بروح الحين
سلطان:الله معك
مشت ترف وهي تتعرق من التوتر ماتدري ليه كل ماشافته
توترت ، يمكن من عيونه الحاده الي شافتها اخر مره بالسوق
رجعت للبنات ونزلت جلالها وقعدت على فراشها
حور:شفيس رجعتي بسرعه؟
ترف:طفشت وجيت المهم شوفي وش رايك بالصوره
"عند الأبل"
راح سلطان للناقه الي كانت ترف عندها وهي بالأصل ناقته
جلس عندها شوي وراح للمجلس مره ثانيه و باله مهب معه.
الساعه ٢:٣٤ الظهر
الجد:كلامي واضح بزوجك يعني بزوجك انت شايف عمرك! عمرك ٣١ وجالس عندي
مترك:ياجد انا مابي لا تعّب بنت الناس معي افهمني!
الجد:ان ماخذيتها مالك مكان عندي فهمت!
قام مترك بعصبيه وطلع من المجلس او بالأصح البيت كله وركب سيارته ومشى يحاول يهدّي اعصابه بأي شي
دخل خالد المجلس وهو مستغرب ليه طلع مترك معصب
خالد:شفيه ولدي يا يبه؟
الجد:ولدك ذا ابزوجه ساره بنت فيصل اخوك
خالد:تزوجه وانا مدري؟!
الجد:كلامي واضح لك و لولدك ورح قل لأمك تعلم البنيه واهلها
دخل فيصل بعد ماسمع اسم بنته
فيصل:دقيقه يا يبه ليه ازوّج بنتي ذلحين
الجد:بتزوجها وانت ماتشوف الدرب امش انت وياه
فيصل:ماقدر ارفضلك طلب الشكوى على الله
الجد:يلا خالد قم علّم جدتك
قام خالد وهو مايقدر يقول لأبوه شي وهو بنفسه مايعجبه شي مايعجب عياله
راح للبيت وناده امه بصوت عالي عشان تسمعه
الجده:نعم ياولدي شبغيت
خالد:ابوي آمرني ازوج مترك ومترك مايبي و غصّبني ابوي ازوجه
الجده:هذي والله الساعه المباركه الا يستاهل خله يتزوج دخل الثلاثين ولا تزوج
خالد:حتى انتي يايمه؟ المهم روحي علّمي ساره وامها ان ابوي يبي يزوّج ساره لمترك ولدي
الجده:اخيررًا جتنا مناسبه يلا يلا بروح
راحت الجده للصاله وشافت البنات وامهاتهم موجودات وقالت بصوت عالي
الجده:اسمعوني ابشركم سلمان بيزوّج ساره لمترك
انصدمو البنات اما الامهات فرحو
شيخه:مبروك يابنيتي والله ذي الساعه المبارك
كانت ساره منصدمه لدرجه ماتكلمت بحرف واحد ، خذوها البنات للغرفه عشان يتناقشون عن
الموضوع لأن واضح انه الموضوع قوي وهم عارفين شخصيه مترك وعارفين
كيف انه عصبي ويخوّف بالنسبه لهم
الساعه ٣:١٢ الظهر
"غرفه البنات"
ساره:بنات دقيقه خلوني استوعب! هم بيزوجوني لذاك العصبي الي يخوف
حور:لازم نعلّم سلطان على الاقل يحاول يقنع جدي
ترف:ياربي توترت اكثر من ساره شنسوي
ساره:بنات مقدر استوعب انتو كلكم تدرون وتعرفون كيف انه عصبي ويخوّف بزياده!
ميار:ندري ندري بس شنسوي تعرفون جدي اذا قال كلمه والله مايغيرها
ساره:اوف حور مشينا ندور سلطان ونعلّمه
حور:يلا مشينا
مشو حور ساره وهم يدورون اخوهم لين لقوه جالس بالسياره
حور:سلطان مادريت وش صار!
سلطان:وشو؟
تكلمت ساره وهي شوي وتصيح
ساره:بيزوجوني لمترك ولد عمي خالد
قام سلطان من مكانه وطلع من السياره عشزن يستوعب
سلطان:كيف ومتى وليش اصلًا
حور:فكنا من اسئلتك ورح اقنع جدي يغير رأيه
سلطان:هو دامه خله ابوي يزّوج ساره غصب مستحيل يوافق لرأيي بس بروح اجرب
ساره:تكفى حاول
سلطان:احتروني هنا ابقنعه وارد لكم خبر
حور:يلا بنحتريك
راح سلطان لجده وهو مقهور من حركات جده و افعاله
دخل للمجلس بدون مايسلم حتى وقال
سلطان:وش ذنب اختي ساره عشان تزوجها؟
الجد:ها جاك الثاني ، اختك تراها كبيره بعد ولازم تتزوج و اشوف ان مترك يناسبها
سلطان:جدي انا محترمك لأنك جدي لكن انا رافض الزواج ذا
الجد:ماهوب شغلك توافق ولا لا انا زوجتها يعني زوجتها وعطيت ابوك خبر و وافق انت مالك رأي
كان بينفجر سلطان و يخربها لكن سكت وطلع من المجلس وهو مقهور
راح لخواته وهو معصب وقال
سلطان:هو صامل يعني صامل قهرني بغيت انفجر عليه
نزلت دموع ساره من القهر وقالت
ساره:يووه شذنبي طيب مابي ذا الزواج طيب
ضمها سلطان وهو يواسيها وقال
سلطان:وسّعي صدرس يلا عشان نستانس بزواجس
ضربت ساره على ظهره وضحك عليها
حور:يعني تراني موجوده للعلم
سلطان:اذا تزوجتي ان شاء الله واسيتس
حور:وجع فال الله ولا فالك.
