THE JAMAICAN ARTISE PA

Andre POV:

1 hour earlier

Mi phone vibrate inna mi pants pocket and mi tek it out, once mi sidung inna mi car . eh calla ID show seh a did Davio, one a mi breggin dem inna eh JDF an who inna eh business wid me .

" yow Davio, wah gwaan?"

" find out who responsible fi eh shooting wid yuh woman enuh. Yow bredda a weh yuh find dah mad woman yah dawg?"

Instantly mi alert , every screw inna mi head a turn as mi try figa out a who him a refer to .

" yow Davio , mi nuh inna eh plaything right now bredda suh just mek mi know straight,  a who dweet?"

" wah woman name Tanya Francis. Eh neva haad fi find har since she all lef work and a falla yuh almost everyday afta yuh woman get shot . Mi mek one a mi breggin dem tail har , mumma sick inna har head bredda. Park up cross eh road from eh hospital just fi watch yuh dawg "

Tanya,  fucking mad woman . Eh mek sense though , especially wid how she did deal wid Jada when she did pull up a mi yaad eh time . Mi know some real bloodclaat mad woman out deh but,Tanya a neva smaddy who mi woulda put inna dah category deh.

" a neva that mek mi know stillz , mi find out weh she work because mi have wah link dung deh , an him a mek  mi know seh eh night when eh shooting gwaan , Tanya did lef work early before har shift done and she all lef har phone but, eh did turn off . Right now weh mi really wah know a how yuh know dah b yah ?"

" har madda bredda . Yow hear wah me talk to yuh lata , mi affi tek care a this"

" ah, if yuh need nuhun just shout mi . Cah mek some waste gyal fuck round yuh woman and feel like everything good "

" yeh man , likkle bit"

Suh Tanya really try fi kill Jada ? Over fucking foolishness.  Eh worse part bout eh whole a this , mi neva expect eh fi be she . Yeh mi know she have issues but, because a eh relationship weh me an har mada have mi neva think seh she woulda do sumuh like this cause she know weh mi a come from . She know seh har mada a did eh only escape weh mi did have , an despite wah did gwaan between wi inna high school when she fuck pon mi , mi still respect har because mi respect har mada .

Right now dah respect deh get fuck because , smaddy affi pay . Afta how mi si my woman inna hospital,  an eh fact seh mi coulda lose her all because a some fucking waste gyal who cah understand dem place . Mi already drop off Jada  and har fren a come ova suh mi know seh she good suh mi start mi car and drive to  Tanya house .

A did night by time mi pull up a eh gate and come out mi car . Eh lock pon eh gate did open suh mi just push open eh gate and walk inna eh yard .

Unlike Jada house , Tanya house neva grill up , suh eh verandah did open . Mi walk up eh step dem and when mi reach eh front door mi knock two time . Bout wah minute pass an mi lif mi hand fi knock again but, eh door open and wah man look pon mi .

Oh! Suh she still a fuck eh bredda who work fi me ?

" yow  boss , wah gwaan ? Weh yah do a mi house bredda?"

" mi need fi talk to Tanya . She deh home ?"

Him frown an him expression get serious but, that neva badda me.