THE JAMAICAN ARTISE PA

Andre POV:

Mi run two red light just suh mi reach Jada yaad and deveen bada fi park good when mi reach and si eh scene. Crowd a people from eh community did gather
pon eh roadside across from eh house , while eh fire fighta dem a do dem work a try out eh blaze. Eh whole house did deh pon fiya , thick black smoke and flames a leap inna eh air and mi feel sick when mi think bout eh possibility seh Jada still in deh, probably dead by now wid how eh fiya a gwaan .

Wah ambulance did park up infront a one a eh fire brigade truck dem and mi run ova to eh medical people dem weh did deh deh.

" she come out? Tell mi seh unu manage fi tek har out"

" who are you sir? Are you a relative of one of the victims?"

Fuck! She just seh victim, nuh dead people dem use that fi refer to?

"No am Andre Wilson,  Jada Campbell's boyfriend "

" we managed to take out one of the victims already but, Jada Campbell is still..." she stop talk when mi hear eh crowd start shout and exclaimed seh dem tek har out an mi turn round fi si wah fire fighta a carry Jada ova him shoulder.

Eh woman and two other man who look like dem come wid har as part a eh medical team pull out wah gurney out a eh back a eh ambulance and rush ova to eh fire fighta .  Dem put har pon eh gurney and start perform cpr because she neva did a breathe .

Mi feel smaddy grab mi hand an mi look beside mi fi si Shanique.

" oh god , Andre...." she stop when we hear somebody cry out

" unu ketch har quick! Look like a fi har daughta " and mi an Shanique look across eh Street weh eh crowd a people did deh round wah car weh look familiar, and mi realise seh a Jada mada car.

Mi neva wah lef from beside eh medical people dem and Jada but, mi couldn't lef har mada suh .

" she a breathe " one a eh man dem seh and mi look back pon Jada who did deh pon eh gurney and si har chest a move up and dung slow . Dem put on wah oxygen mask ova har nose and mouth and lift har innna eh back a eh ambulance and mi tell Shanique fi guh wid dem to eh hospital, suh mi cah check pon Jada mada inna eh meantime .

Mi push pass people until mi reach eh car weh dem did have eh back seat door open and miss Sherice lay dung inside pon eh backseat . Mi si Kerry face an realise seh she did a cry .

" lock eh door . Yuh have eh car key ?" Mi ask har an she nod har head as she gi mi .

" guh inna eh front passenger seat , wi aguh up a hospital.  Yuh sista alive Kerry , mi sorry seh unu affi deh guh.  through this"

Wi did almost reach up a eh hospital when mi hear miss Sherice groan as she sidung up inna eh backseat .

" weh she deh ? Weh Jada deh ? Oh Jesus christ, mi pickney . Oh god , mi need fi si mi pickney " she did a cry an jah know,  eh sound really  lick mi chip as much as mi did a try haad fi whole it . Eh whole situation just fuck up especially since a mi a eh whole reason fi it.

" mummy calm dung , wi almost reach up a hospital. Jada nuh dead mummy " Kerry seh as she turn round inna har seat and reach out one har hand dem to har mada . Mi drive through eh hospital gate and park inna eh parking space an then mi hold miss Sherice hand while Kerry walk beside wi guh inna eh emergency area. 

Eh lady who wi talk wid did already recognised who mi be, an she mek mi know seh dem a work pon Jada inna eh emergency section but, as soon as dem done wah doctor will come inform wi an mek wi know how har condition stay.

Inna eh meantime she mek wi wait inna eh private waiting area weh wi meet up wid Shanique but, mi honestly neva wah sidung. Mi neva like si how Kerry and miss Sherice look an mi know seh if dem fi eva find out eh truth an know seh a because a me mek Jada almost dead an inna hospital right now , she woulda find a way fi ensure seh har daughta lef mi an mi couldn't even blame har fi that .

Yeh mi know seh anuh me start eh fiya but, a because a me mek Tanya dweet. Even though mi kill har , eh whole situation a weigh pon mi chest because eh way how mi a medz it , Tanya convince harself seh she a dweet because a eh relationship weh wi did have,  an eh fact seh she all get rape just fi protect me , that just mek eh whole thing worse  but, eh nuh mean seh Jada fi dead because a fi mi fuck up life .

Mi know mi deveen suppose to a think dem kind a way yah but, mi just wish sometime seh mi did more firm when she start work fi mi . If mi did just lef har mek she do weh she get pay fi do ,instead a act pon eh way how mi feel bout har , she woulda neva almost lose har life tonight. Mi honestly couldn't process  it if she did dead , mi swear . Even right now as mi memba how she look pon eh gurney , just still suh , wid har eye dem lock nuh sign a life mek mi a pree some kind a way , fi just do one thing an seh fuck life .

As a man mi know mi suppose to strong but, from mi a likkle boy , all a mi life mi a whole it out . Despite all a eh things dem weh mi guh through , mi try mi best fi find wah way fi cope , if anuh weed, a music and now Jada . Weed a sumuh weh mi did addicted to, bun it haad an rum but, wid Jada somtime mi deveen memba seh mi nuh bun a spliff fi all two day, an eh only time mi drink rum a when mi deh pon a event or some form a party.

If mi lose Jada , mi nuh think mi aguh have eh strength fi carry on dah life yah , she a eh only family,  person, inna mi life who push mi an gi mi wah reason fi do weh mi do every day . Eh might sound soft to some man wid likkle bowy mentality but, Jada a mi inspiration,  mi partner an yeh mi neva lucky fi get nuh love when mi a youth but, Jada more than mek up  fi all a eh love weh mi neva get , an eh only way mi a lef dah woman yah a when mi guh 6ft inna eh grung.

Wah doctor push open eh door from eh emergency ward an walk ova to wi and instantly Jada mada and sista get up wid Shanique as wi listen fi hear weh eh doctor a seh .

" goodnight, I am pleased to say Jada Campbell is out of the danger zone but, it will be a long while before she recovers . She suffered some major damages to her lungs and airways due to inhaling the toxic gases and hot air . She also had carbon monoxide poisoning which is why she wasn't breathing but, luckily the medical team was able to resuscitate her by performing emergency CPR. Luckily we were able to ensure that the baby..."

Mi freeze when mi hear weh him seh, an mi did haffi ask him fi repeat

" baby ? Jada pregnant?"

Vote,  comment and share . Love unu 🫶❤️