THE JAMAICAN ARTISE PA

JADA POV:

" Come Andre , talk because what mi really wah seh right now , aguh hurt yuh feelings but, mi a give yuh a chance fi explain "  mi seh to him .

" babe , yuh have all right fi be upset. Mi wish mi did find out seh a Tanya shoot yuh suh all a wah gwaan coulda be avoided but, eh done happen a ready "

" wait , Tanya? Tanya who yuh tell seh yuh doh want inna yuh life? No man, she this crazy ? more importantly,  where is she now ?" mi ask him inna shock and disbelief.  Mi know seh she woulda be upset and hurt yes  but, to eh point fi try kill mi ? A suh she in love wid Andre ? No , correction, obsessed. She obsessed wid him and sick inna har head .

" mi tek care a it " , eh calmness wid how him seh it mek mi realise weh him mean instantly. 

" suh why yuh neva mek eh police handle it ? and wah bout har mada ? doh get mi wrong, she deserve fi suffa fi all a this weh she do but, yuh tell mi seh har mada a eh mada weh you neva have suh how she aguh manage without har daughta Andre ? Eh betta yuh did inform eh police and mek har guh a prison because at least har mada woulda know wah happen and know why har daughta get lock up but, fi just nuh hear back from har ? "

Him look pon mi , exhaustion and pain inna him eye dem.

" B, yuh know how mi deal wid things liken dem yah a ready , worse yuh coulda dead b. Yuh think seh she deserve fi inna prison a live when your body coulda deh pon ice ? true yuh deveen know how mi heart feel when mi get eh call frah Shanique a tell mi seh yuh house deh pah fiya. Eh only thing weh did a guh through mi mind , a how mi aguh manage fi live wah life weh yuh nuh inna because fi tell yuh eh truth Jada , from yuh come inna mi life is like eh life weh mi did have before nuh mek nuh sense, eh neva have nuh purpose and now mi have you and mi feel like mi have wah reason fi deh yah , yah mi reason Jada , you and wi baby "

" And mi feel eh same way Andre but, mi worried.  Mi worry bout you because mi know this aguh affect you inna some way and mi feel it fi har mada , as much as mi nuh know har, because a eh end a eh day a still har daughta suh she aguh tek it to heart"

" mi know that but, mi neva did aguh choose between you an she , even though weh she do fi mi when mi did a likkle bowy mi will foreva carry that wid mi and grateful  , mi nuh think she deserve fi live afta all a this . Yeh , mi know har mada aguh feel it and that a eh only part mi really wish mi neva affi guh si but, mi already mek eh arrangement fi smaddy find har body suh at least she cah bury har daughta. Right now my main priority a you and wi baby "

Mi shake mi head,

" mi aguh need some time Andre . Inna eh space a wah month mi almost dead twice , eh people dem house burn down and mi just lose all a mi things dem weh mi work hard and buy and mi affi guh pay fi house weh a neva mine, and now mi nuh just have mislef fi think bout, mi have mi baby...sorry, our child fi think bout "

Him hold mi hand as him seh,

" Doh worry bout eh house,  mi will deal  wid it and everything else . Just focus pon yuhself right now, anything yuh need just mek mi know "

" ok but, inna eh meantime mi aguh stay wid mummy.  Mi appreciate everything yuh a do fi mi Andre and yuh know seh mi love yuh but, mi still just need some space . All a this just to much fi process right now and mi need fi just tek some time fi think and rebuild mi life "

Nodding him release mi hand and stand up, " ah, tek all eh time yuh wah . As mi seh if yuh need mi just call , anything mi will handle it " and then him kiss mi forehead and lef .

Afta him gone, mummy and Kerry come back in. Sitting in the chair weh Andre just get up out of , mi mada  ask

" him mention anything bout eh police? dem find out a who do this ?"

" no mummy but, that anuh Andre responsibility"

" mi know but, mi just a wonda . Jada , yah mi daughta and mi love yuh suh mi wah yuh fi listen to mi. Mi nuh know how much unu love each other or how unu relationship a progress but, mi a beg yuh, open yuh dem pon him . Before him come inna yuh life , none a dem crawsis yah neva did a happen and yuh neva did a fight fi yuh life . Mi nah accuse him a nuhun but, just be careful because man like him weh look suh good , have suh much money and successful,  yuh have people weh will do anything fi hurt him and if dem cah get to him dem aguh guh afta eh smaddy dem know him close to "

Well she neva wrong bout that , Andre come wid a whole heap a problem but, mi cah blame eh problem dem pon him because anuh him cause dem . People just wicked and badmind and dem need fi realise seh Andre more than deserve fi deh weh him deh now inna life. Him deserve everything weh him work hard fah even though him neva start off doing eh right thing.

Holding mi hand she continue,

" mi just glad mi neva lose yuh and mi grand pickeny.  Yes Jesus! Mi finally get mi grand baby fi bounce pon mi lap " and mi smile .

" yes Jada , thanks fi carry wi baby " Kerry seh as she come stand up beside mummy , leaning against the chair .

" yuh ready fi get call Aunty Kerry?"

" yeh , suh long as eh baby nuh bawly bawly . Mi love yuh Jada but, mi nuh like hear when baby bawl at all , eh just hurt mi head " and mi laugh. 

" wait , wah happen wid Serena?" Mi ask eh two a dem as eh come back to mi mind seh up until now nuhbody nuh mention har .

"She alright man. She deh inna wah next section cause she neva as bad as  you . As soon as yuh feel likkle better yuh cah guh look fi har if dem nuh release har by dah time deh" mummy seh .

" ok , bowy mi just wish all a this coulda be avoided "

" well eh done happen a ready . Eh best thing yuh cah do now , a fi get better and rebuild yuh life . Yuh know seh mi and Kerry and eh rest a yuh family nah guh nuhweh,suh just focus pon yuhslef suh yah come out a dah sick and depressing place yah ".

As mi feel mislef a get tired now that all a eh energy a talking drain out a mi , mi lock mi eye dem and allow sleep fi tek mi weh . Mi just a pray an hope seh a it this an mi cah just move past all a wah happen and just start ova wid wi baby.

Mi hope suh to enuh Jada but,....... anyways unu remember fi vote,  comment and follow me on here , love unu 🫶❤️.