بقلم هند محمد
isis mohamed
الحلقه الثالثة عشر 13
ندى : طب حصل ايه طيب انا عملت ايه علشان تضربنى
( خرج فجر بسرعه وراح رازع الباب وراه وراح على السنترال يكلم اخوه ابراهيم )
فجر : الو
ام فجر : الو ازيك يا حبيبى وحشتنى ازيك وازاى ندى عملين ايه كده برضو كل ده غياب كل شهر تليفون هانت عليك امك يا حبيب امك
فجر : معلش يا ماما هو ابراهيم فين انا عاوزو بسرعه
ام فجر: هندهولك بس طمنى عليك بتاكل كويس وندى وخده بالها منك ولا لا تقل لبسك يا فجر الجو عندك برد البس فلنتين فوق بعض
فجر : فنلتين ايه يا ماما انا مش فايق للكلام ده ابراهيم فين
ام فجر: يوه هندهولك امك موحشتكش يا واد خلاص ولا مراتك ندى منسياك الدنيا وما فيها طبعا تلقيها عماله تودودلك
فجر : نهار اسود عليا ابراهيم فين
ام فجر : ماشى اخوك اهو انا عارفه تلقيها قلبتك عليه اللى متتسماش ام سحلفه دى خد يا واد اخوك عاوزك
ابراهيم : اسلام عليكم ازيك يفجر وحشنى
فجر : وانته كمان باقولك انته تعرف حاجه عن رانيا
ابراهيم : لا معرفش حاجه انته عارف انا مش بروح نحيتهم خالص
فجر : طب انزل دلوقتى واسئل كده هى صحيح اتجوزت ولا لا واسئل شوف اتجوزت مين اعرفلى كل حاجه عنها وانا بكره هكلمك زى دلوقتى تكون موجود وانته اللى ترد عليا فاهم
ابراهيم : اتجوزت ازاى مش انته متفق معاها تستناك انته مش قولتلى كده
فجر : متتعبش قلبى يا يا ابراهيم انا اعصابى مش مستحمله اللى بقولو تعملو ممكن
ابراهيم : ماشى حاضر وندى عامله ايه
فجر : كويسه فى البيت بس متنساش أسئل على كل حاجه فاهم
ابراهيم : ماشى طيب اه فجر بابا عاوزك
ابو فجر : الو ازيك يا فجر وحشتنا
فجر : وانته كمان يا بابا
ابو فجر : ها اخبار المذاكره ايه تمام عاوزك ترفع راسى
فجر : الحمد لله تمام معلش يا بابا المكلمه هتخلص
ابو فجر : ماشى يابنى خلى بالك من نفسك ومن ندى دى امانه خلى بالك منها اوعى تزعلها انا بئمنك عليها
فجر : ( حس فجر بالخجل ) حاضر يا بابا هخلى بالى منها مع السلامه
**** ( بقلم هند محمد @isis Mohamed ) ****
