اسكريبتات

{أميرة أبيها}..

- فين حبيبة بابا؟
- نايمة
- صحيهالي.
- بس هي نامت.
- وأي المشكلة أنا عاملها مفاجأة.
- يووه متبوظش نوم البنت أنا ما صدقت ظبطته على المدرسة.
- يولية خلينا نسرق من العمر ساعات تفضل ذكرى حلوة في عقل بنتنا بدل ما نضيعها في النوم.
- بس ...
- ريماااس أنتِ فين يا حبيبة بابا؟

سابني ودخل أوضتها صحاها وشالها وطلع بيها للأنتريه ونزلها براحة وغمض عينيها.

- هعد من واحد لعشرة اوعي تفتحي عيونك غير لما أقولك.
- حاضر يا بابا.
- يلا واحد اتنين ....
- أفتح؟
- عشررررة فتحي.
- واووو عجلة الله الله.

فضلت تتنطط وجريت تحضن وتبوس في العجلة وركبتها ووقعت بس قامت تاني وحاولت تركبها وتتوازن عليها وكانت هتقع بس أيد باباها لحقتها وسندتها.

- تحفة يا بابا شكرًا شكرًا.
- فين بوسة بابا؟
- أهه
- فين حضن بابا؟
- حضن كبير لبابا.
- ربنا يحميكِ يا عمري وميحرمنيش منك.
- وأنت كمان يارب يا بابا.

سهروا الليل كله ويّا العجلة وريماس مش عايزة تنزل من عليها وباباها بيسندها خايف تقع من عليها وهزارهم وضحكهم مالي الشقة.

- ليه كلفت نفسك؟
- وأنا بشتغل يعني علشان مين؟ مش علشانك أنتِ وبنتي؟
- ربنا يوسع رزقك يارب وميحرمناش منك.
- ولا يحرمني منك يارب.
- بس ريماس مبسوطة أوي بيها، شايف بتلزق فيها استيكراتها وتعلق الميدالية والدبدوب فيها إزاي!
- أهو أنا بقى مش عايز من الدنيا غير فرحتها دي.
- يا بختك يا ست ريماس بحب بابا.
- الخير والبركة في أم ريماس.
- أنا! لا يخويا مانا بقيت عالرف خلاص.
- إزاي بقى! هو لولاكِ كنت هجيب ريماس ولا هيبقالي عيال؟
- أي ست غيري كانت هتجيبلك العيل ويمكن كانت جابتلك الولد زي ما حماتي بتقول.
- اخص عليكِ هتتدخلي في حكمة وعدل ربنا؟ وبعدين أنا ميفرقليش ولد من بنت وريماس بنتي دي أنا خايف أفكر أقولك نخلف عيل كمان أظلمه لأن حبي كلها ليها تقوليلي واد ومش واد.
- اهدى خلاص بهزر معاك.
- الواد عندي زي البنت ويمكن البنت أكتر لأني من زمان وحلمي أخلف بنت وأدلعها.
- قول كده بقى إنك كنت مخطط من الأول وخلاص جبتلك البنت تركنني على الرف.

ضحك وطلع من جيبه غويشتين استانلس كانوا عاجبني قبل كده ولبسهملي:
- عارف إنهم مش مقامك ومقامك أكبر بكتير بس مقدرش عينك تترفع في حاجة ومجبهاش ليكِ ولو أطول أجيبلك نجمة من السماء هجيبهالك.

لا متصنع ود ولا مُزيف مشاعر، حنية الدنيا فيه ووقت ما اتقدملي سألوا عليه وقالولي ده حنين وأيده فرطة عاللي بيحبهم وممكن يأثر على حياتكم بعد كده، شافوها عيب فيه وقلبي اتشبث بيه، هو ده اللي بدور عليه راجل تكون الحنية عنوان ليه.

- بقولك.
- قوليلي.
- هو ينفع النهاردة تجيب أكل جاهز معاك، لأني تعبانة ومش قادرة أقف في مطبخ؟
- سلامتك ألف سلامة مالك بس؟ من إمبارح بقولك نروح نكشف.
- معرفش والله بس التعب زاد وأنا كنت فاكراه دور وهيروح لحاله.
- مش هنستنى أكتر من كده البسي عقبال ماجيلك.
- طب وشغلك؟
- هيجراله أي يعني؟ المهم أنتِ.